சூலூர் கொடூரத்தை திசைதிருப்ப.. உதயநிதியை வைத்து ஏஐ போலி படம்.. தீவிரமாக பரவும் வதந்தி.. தவெக மூவ்

கோவை: சூலூர் பள்ளபாளையத்தில் 10 வயது சிறுமி பாலியல் வன்கொடுமை செய்யப்பட்டு படுகொலை செய்யப்பட்ட விவகாரத்தில், தமிழக அரசு சந்தித்து வரும் கடுமையான சட்டம்-ஒழுங்கு விமர்சனங்களில் இருந்து தப்பிக்கவும், முதல்வர் விஜய்யின் பிம்பத்தைக் காப்பாற்றவும் சமூக வலைதளங்களில் மிக மோசமான 'திசைதிருப்பல்' வேலைகள் அரங்கேறி வருவது வெளிச்சத்திற்கு வந்துள்ளது.

குற்றவாளியை எதிர்க்கட்சியோடு தொடர்புபடுத்தி ஏஐ (Artificial Intelligence) தொழில்நுட்பம் மூலம் போலிப் புகைப்படம் தயாரித்து, அதைத் திட்டமிட்டுப் பரப்பி வரும் ஆளுங்கட்சி ரசிகர்களின் செயல் பெரும் அதிர்ச்சியை ஏற்படுத்தியுள்ளது.

நிர்வாகக் குளறுபடிகளை மறைக்க, கார்ப்பரேட் பாணியில் மக்கள் நரேட்டிவை (Narrative) மாற்ற இன்ஃப்ளூயன்சர்களுக்குப் பெரும் பணம் கைமாறியுள்ளதாக திமுகவினர் வைத்துள்ள புகார்கள் தமிழக அரசியலில் பெரும் புயலைக் கிளப்பியுள்ளன.

ஏஐ மூலம் போலி புகைப்படம்: உதயநிதியுடன் குற்றவாளி?

சூலூர் வழக்கில் கைது செய்யப்பட்டுள்ள முக்கியக் குற்றவாளியான கார்த்திக் என்பவனை எப்படியாவது திமுககாரனாகச் சித்தரித்துவிட்டால், தவெக அரசு மீதான மக்கள் கோபம் அப்படியே திமுக பக்கம் திரும்பிவிடும் என ஆளுங்கட்சி ஐடி விங் கணக்குப்போட்டுள்ளது. இதற்காக, கைது செய்யப்பட்ட கார்த்திக், எதிர்க்கட்சித் தலைவர் உதயநிதி ஸ்டாலினுடன் நெருக்கமாக நின்று சால்வை அணிவிப்பது போன்ற ஒரு புகைப்படத்தை ஏஐ தொழில்நுட்பத்தின் மூலம் தத்ரூபமாக உருவாக்கியுள்ளனர்.

"குற்றவாளி கார்த்திக் தீவிர திமுக உறுப்பினர்; அவருக்கும் உதயநிதிக்கும் நெருங்கிய தொடர்பு இருக்கிறது" என்ற பொய்யான கேப்ஷனுடன் போலிப் புகைப்படம் தவெக ரசிகர்களின் எக்ஸ் (X) பக்கங்கள் மற்றும் முகநூல் பக்கங்களில் காட்டுத்தீயாகப் பரப்பப்பட்டது. ஆனால், டிஜிட்டல் தடயவியல் மற்றும் உண்மைச் சரிபார்ப்பு (Fact-Check) ஆய்வாளர்கள் அந்தப் புகைப்படத்தை ஆராய்ந்தபோது, அது முற்றிலும் ஏஐ மூலம் மார்பிங் (Morphing) செய்யப்பட்ட போலியான படம் என்பது சில நிமிடங்களிலேயே அம்பலமானது.

இன்ஃப்ளூயன்சர்களுக்கு வலை: ரீல்ஸ் செய்ய பணப்பட்டுவாடா?

அரசுக்கு ஏற்பட்டுள்ள கெட்டப் பெயரைத் துடைக்க, இந்தப் போலி நரேட்டிவை இன்ஸ்டாகிராம் மற்றும் யூடியூப் தளங்களில் ட்ரெண்ட் செய்ய ஒரு கார்ப்பரேட் உத்தி பயன்படுத்தப்பட்டுள்ளதாகத் தகவல்கள் வெளியாகியுள்ளன. இதற்கென லட்சக்கணக்கில் பின்தொடர்பாளர்களைக் கொண்ட (Millions of Followers) சில அரசியல் மற்றும் பொதுப் பக்கங்களை நடத்தும் சமூக ஊடக இன்ஃப்ளூயன்சர்கள் (Influencers) குறிவைக்கப்பட்டுள்ளனர்.

நம்பகமான வட்டாரங்களின்படி, "சூலூர் சம்பவத்தில் சட்டம் ஒழுங்கு தோல்வி அடையவில்லை; குற்றவாளி எதிர்க்கட்சியைச் சேர்ந்தவன் என்பதால் திட்டமிட்டு ஆளுங்கட்சியைப் பழிவாங்குகிறார்கள்" என்ற தொனியில் 'ரீல்ஸ்' (Reels) மற்றும் ஷார்ட்ஸ் வீடியோக்களை உருவாக்க பல இன்ஃப்ளூயன்சர்களுக்குப் பெரும் தொகை விநியோகிக்கப்பட்டுள்ளதாகக் கூறப்படுகிறது.

இதற்கான ஸ்கிரிப்ட்களும், ஏஐ புகைப்படங்களும் ஆளுங்கட்சிக்கு நெருக்கமான ஐடி நிறுவனக் குழுக்களால் அவர்களுக்கு நேரடியாக அனுப்பி வைக்கப்பட்டதாகப் புகார்கள் எழுந்துள்ளன.

இதன் விளைவாக, கடந்த 24 மணி நேரத்தில் திடீரென ஒரே மாதிரியான கருத்துக்களைக் கொண்ட நூற்றுக்கணக்கான வீடியோக்கள் சமூக வலைதளங்களில் அல்காரிதத்தை (Algorithm) ஏமாற்றி முன்னுக்குக் கொண்டு வரப்பட்டுள்ளன.

மக்களின் கவனத்தை திசைதிருப்பும் அவலம்:

ஒரு பச்சிளம் குழந்தையின் கொடூர மரணத்தில் கூட, குற்றவாளிக்கு உரியத் தண்டனைப் பெற்றுத் தருவதை விடுத்து, தங்களின் அரசியல் பிம்பத்தைக் காப்பாற்றுவதற்காகப் பொய்ப் பிரச்சாரங்களை ஏவி விடுவது எந்த மாதிரியான அரசியல் என்ற கேள்வி எழுந்துள்ளது.

முன்னதாக, ஊடகக் கேள்விகளை எதிர்கொள்ளாமல் முதல்வர் விஜய் தப்பியோடியது, ஐ.ஜி ரம்யா பாரதி பிரஸ் மீட்டில் சிரித்தது, அமைச்சர் கீர்த்தன் இது நிர்வாகத் தோல்வியே அல்ல என்று அலட்சியமாகப் பேசியது என தவெக அரசு வரிசையாகச் செய்த சொதப்பல்களால் மக்கள் கடும் கோபத்தில் இருந்தனர். அந்தக் கோபத்தை மடைமாற்றவே, இந்த ஏஐ தொழில்நுட்பப் பொய்களும், இன்ஃப்ளூயன்சர்கள் மூலமாக நடத்தப்படும் கட்டணப் பிரச்சாரங்களும் (Paid Campaigns) கையில் எடுக்கப்பட்டுள்ளன.

"ஆட்சியை விமர்சிப்பவர்களை எதிர்கொள்ள முடியாமல் தவெக, தொழில்நுட்பத்தை தவறாகப் பயன்படுத்தி பொய்களை உற்பத்தி செய்கிறது" என்று எதிர்க்கட்சிகள் சாடியுள்ளன.

English summary

Sulur Case Twist: Fake AI Image of Accused with Udhayanidhi Stalin Sparks Major Political Row