செப்டம்பர் 21ல் இலங்கை அதிபர் தேர்தல்! தேர்தல் ஆணையம் அறிவிப்பு!

Updated: Friday, July 26, 2024, 12:01 [IST]

Subscribe to Oneindia Tamil

கொழும்பு: செப்டம்பர் 21 ஆம் தேதி இலங்கை அதிபர் தேர்தல் நடைபெறும் என அந்நாட்டு தேர்தல் ஆணையம் அதிகாரப்பூர்வமாக அறிவித்துள்ளது. கடந்த 2019ஆம் ஆண்டு இலங்கையில் தேர்தல் நடந்த நிலையில் தற்போது 5 ஆண்டுகள் கழித்து மீண்டும் தேர்தல் நடைபெறுகிறது.

கடந்த 2019ஆம் ஆண்டு நடந்த இலங்கை அதிபர் தேர்தலில் கோத்தபய ராஜபக்ச வென்றார். அது போல் பிரதமராக மகிந்த ராஜ்பக்ச தேர்வு செய்யப்பட்டார். இந்த நிலையில் 2022ஆம் ஆண்டு இலங்கையில் பொருளாதார நெருக்கடி ஏற்பட்டது.

அத்தியாவசிய பொருட்கள் கிடைக்காமல் பொதுமக்கள் கடும் அவதிக்குள்ளாகினர். விலைவாசி கட்டுக்கடங்காமல் உயர்ந்து கொண்டே இருந்தது. பால், பிஸ்கெட் ஆகியவற்றின் விலையும் உயர்ந்தது. பெட்ரோல் போன்ற எரி பொருட்களை வாங்க மக்கள் நீண்ட வரிசையில் காத்திருந்தனர். பொருளாதார நெருக்கடியால் இலங்கையில் அரசுக்கு எதிரான போராட்டங்கள் வெடித்தன.

நாடு முழுவதும் பதற்றம் ஏற்பட்டது. அதை எதிர்கொள்ள முடியாமல் அதிபரும் பிரதமரும் நாட்டைவிட்டே தப்பி சிங்கப்பூரில் தஞ்சம் அடைந்தனர். இதையடுத்து அதிபரும் பிரதமரும் பதவி விலகினர். பல ராஜபக்சவின் வீடுகளில் எல்லாம் தஞ்சமடைந்தனர். அவருடைய அதிபர், பிரதமர் இல்லங்களிலும் குடி போனார்கள். பிறகு இடைக்கால புதிய அதிபரார ரணில் விக்கிரமசிங்கேவும் பிரதமராக தினேஷ் குணவர்த்தனா ஆகியோர் தேர்வு செய்யப்பட்டனர்.

பிறகு உலக நாடுகளின் உதவியால் இலங்கை மெல்ல மெல்ல மீண்டும் வருகிறது. இந்த நிலையில் அதிபர், பிரதமரின் பதவிக்காலம் வரும் நவம்பர் 17ஆம் தேதியுடன் முடிவுக்கு வருகிறது. இதனால் செப்டம்பர் 17 முதல் அக்டோபர் 16-க்குள் தேர்தல் நடத்தப்படும் என தேர்தல் ஆணையம் தெரிவித்திருந்தது.

இந்த நிலையில் செப்டம்பர் 21 ஆம் தேதி இலங்கைக்கு புதிய அதிபருக்கான தேர்தல் நடைபெறும் என இலங்கை தேர்தல் ஆணையம் அதிகாரப்பூர்வமாக அறிவித்துள்ளது. இதற்காக ஆகஸ்ட் 15 ஆம் தேதி முதல் வேட்புமனுக்கள் ஏற்கப்படும் என்றும் அறிவித்துள்ளது. இந்த தேர்தலில் தற்போதைய அதிபர் ரணில் விக்கிரமசிங்கவும் இலங்கையில் கடைசி கட்ட போரின் போது ராணுவ தளபதியாக இருந்த சரத் பொன்சேகாவும் போட்டியிடுகிறார்கள்.

இதுகுறித்து சரத்பொன்சேகா தனது ட்விட்டர் பக்கத்தில் கூறியிருப்பதாவது: கடந்த 76 ஆண்டுகளாக ஊழல் கட்சிகள் இலங்கையை ஆட்சி செய்து மிகப் பெரிய பொருளாதார நெருக்கடியை ஏற்படுத்தின. ஊழலை வேரறுக்க வேண்டும். இதற்காக அதிபர் தேர்தலில் போட்டியிடுகிறேன் என அவர் தெரிவித்துள்ளார்.