சீன எல்லையில் அல்ல, டெல்லியில்தான் பிரச்சினை: ஓவைசி குற்றச்சாட்டு! நாடாளுமன்ற விவாதம் நடத்த கோரிக்கை

Updated: Monday, November 8, 2021, 19:28 [IST]

Subscribe to Oneindia Tamil

டெல்லி: சீனா-இந்தியா உறவுகள் குறித்து முழு நாடாளுமன்ற விவாதம் நடத்தப்பட வேண்டியது அவசியம் என்று, அகில இந்திய மஜ்லிஸ்-இ-இடிஹதுல் முஸ்லிமின் கட்சித் தலைவர் அசாதுதின் ஓவைசி தெரிவித்தார்.

அமெரிக்க காங்கிரசுக்கு பென்டகன் அளித்த அறிக்கையில், அருணாச்சல பிரதேசத்தில், சீனா ஒரு கிராமத்தையே உருவாக்கியுள்ளதாக, தெரிவிக்கப்பட்டிருந்தது.

மத்திய அரசு இவ்வாறான ஆக்கிரமிப்புகள் குறித்து இதுவரை எதுவும் கூறவில்லை. இந்த நிலையில், ஓவைசி வரிசையாக ட்விட்டர் பதிவுகளை வெளியிட்டுள்ளார்.

நாடாளுமன்ற கூட்டம்

ஓவைசி தனது ட்விட்டர் பதிவில், "சீனா-இந்திய உறவுகள் மற்றும் எல்லையில் உள்ள விவகாரங்கள் குறித்து முழு நாடாளுமன்ற விவாதத்தை நாங்கள் கோருகிறோம். அனைத்து கட்சி எம்பிக்கள் குழுவை அனைத்து சர்ச்சைக்குரிய எல்லைப் பகுதிகளுக்கும் அழைத்துச் செல்ல வேண்டும். நமது இறையாண்மையை மீண்டும் நிலைநாட்டவும், பொதுமக்களுக்குத் தெரிவிக்கவும் இது வாய்ப்பை ஏற்படுத்தும்." என்று தெரிவித்துள்ளார்.

சீனாவிற்கு ஆதாயம்

அவர் மேலும் தனது ட்வீட்டில், "தேவைப்பட்டால், மக்களவை விதி 248 இன் கீழ் சபையின் ரகசிய கூட்டத்தை நடத்தலாம்" என்றும், "பிரதமர் மோடியின் மௌனம், மறுப்பு போன்ற வியூகம் இந்தியாவிற்குத்தான் பின்னடைவை ஏற்படுத்துகிறது. நமது நாடு பலவீனமாக இருப்பதை போன்ற தகவல், சீனாவிற்கு வாய்ப்பாக அமைந்து விடுகிறது. உண்மையை எதிர்கொள்ள நமது இயலாமையை இது உணர்த்துகிறது." என்று தெரிவித்துள்ளார் ஓவைசி.

மக்கள் பிரிவினை

துரதிர்ஷ்டவசமாக இந்த அரசு இந்தியர்களை பிரித்து வைப்பதன் மூலம் உள்நாட்டில் நம்மை பலவீனப்படுத்துகிறது. உள்நாட்டின் இந்த பிளவு, அண்டை நாடுகளுடன் நமது பகையை அதிகரிக்க செய்து விடுகிறது. இதை சீனா பயன்படுத்திக் கொள்கிறது.

டெல்லியில்தான் பிரச்சினை

2014க்கு முன்பு, எல்லையில் பிரச்சனை இல்லை, டெல்லியில் தான் பிரச்சனை என்று பிரதமர் மோடி கூறி வந்தார். முன்னெப்போதையும் விட இப்போதுதான் அந்த வார்த்தை சரியாக பொருந்திப் போகிறது. முதல்வராக இருந்தபோது மோடி தேசிய பாதுகாப்பு பற்றி பெரிதாக பேசுவார் ஆனால் இப்போது பிரதமராக உள்ள மோடி சீனாவின் பெயரைக் கூட உச்சரிக்கவில்லை. என்ன நடந்தது? ஏன் இந்தத் தயக்கம்? இவ்வாறு ஓவைசி ட்விட்டரில் கேள்விகள் எழுப்பியுள்ளார்.