கொல்கத்தாவில் பிரதமர் மோடி குறித்த ஆவணப் படம் வெளியீடு! டெல்லி பல்கலை வெளியே 144 தடை உத்தரவு!

நாட்டின் பல பல்கலைக் கழகங்களில் பிரதமர் மோடி குறித்த ஆவணப்படத்தை திரையிட்டுள்ளனர்.

டெல்லி: பிரதமர் மோடி குறித்த ஆவணப்படம் மேற்கு வங்க மாநிலம் கொல்கத்தாவின் பிரசிடென்சி பல்கலைக் கழகத்தில் வெளியிடப்பட்டது. டெல்லி பல்கலைக் கழகத்தில் தொடர்ந்து பதற்றம் நிலவுவதால் அப்பல்கலைக் கழகத்துக்கு வெளியே 144 தடை உத்தரவ் அமல்படுத்தப்பட்டுள்ளது.

2002-ம் ஆண்டு உலகை அதிரவைத்த குஜராத் இனப்படுகொலைகள் நிகழ்ந்தன. கோத்ரா ரயில் எரிப்பில் இந்து சாதுக்கள் எரித்து படுகொலை செய்யப்பட்டனர். இதன் எதிர்வினையாக இஸ்லாமியர்கள் படுகொலை செய்யப்பட்டனர். இந்த மத மோதல்களில் சுமார் 1,000க்கும் அதிகமானோர் கொல்லப்பட்டனர்.

குஜராத் மத மோதல்களின் போது அம்மாநில முதல்வராக இருந்தவர் தற்போதைய பிரதமர் மோடி. குஜராத் வன்முறைகள் தொடர்பாக பிரதமர் மோடி மீது குறச்சாட்டுகள் முன்வைக்கப்பட்டன. ஆனால் இந்த குற்றச்சாட்டுகளை அனைத்து நீதிமன்றங்களும் நிராகரித்துவிட்டன.

இந்நிலையில் பிபிசி ஊடகம், குஜராத் படுகொலைகளை முன்வைத்து ஆவணப்படம் ஒன்றை வெளியிட்டது. ஆனால் பிரதமர் மோடியை மையமாக வைத்து இந்த ஆவணப்படம் உருவாக்கப்பட்டிருந்தது. இதனை மத்திய அரசு கடுமையாக எதிர்த்தது. இந்த ஆவணப்படத்தை சமூக வலைதளங்களில் இருந்து நீக்கவும் மத்திய அரசு உத்தரவிட்டது.

ஆனால் எதிர்க்கட்சிகள் மற்றும் பல்வேறு மாணவர் அமைப்பினர் பல்கலைக் கழகங்கள் உள்ளிட்ட கல்வி நிறுவனங்களில் இந்த ஆவணப்படத்தை வெளியிட்டு வருகின்றனர். இதற்கு கடும் எதிர்ப்பும் கிளம்பியுள்ளது.

டெல்லி, ஹைதராபாத், புதுச்சேரி பல்கலைக் கழகங்களில் குஜராத் படுகொலைகள் தொடர்பான ஆவணப்படம் வெளியிடப்பட்டது. இதற்கு வலதுசாரி அமைப்புகள் கடும் எதிர்ப்பு தெரிவித்தன. சில பல்கலைக் கழகங்களில் போட்டியாக காஷ்மீர் ஃபைல்ஸ் திரைப்படம் வெளியிடப்பட்டது.

இந்நிலையில் மேற்கு வங்கம் கொல்கத்தாவில் பிரசிடென்சி பல்கலையிலும் இந்த ஆவணப்படம் ஒளிபரப்பப்பட்டது. மேலும் டெல்லி பல்கலைக் கழகத்தில் ஆவணப் படத்தை வெளியிட முயற்சிகள் மேற்கொள்ளப்பட்டன. இதனால் டெல்லி பல்கலைக் கழக வளாகத்தில் பதற்றம ஏற்பட்டது. இதனைத் தொடர்ந்து டெல்லி பல்கலைக் கழகத்துக்கு வெளியே 144 தடை உத்தரவு பிறப்பிக்கப்பட்டிருக்கிறது. மேலும் டெல்லி போலீசார் பீம் ஆர்மி அமைப்பை சேர்ந்த மாணவர்களை கைது செய்தும் உள்ளனர்.

English summary

BBC Documentry on PM Modi screened in many universities in the States.