இந்த படத்தை பாருங்க.. புரியும்.. இந்தியாவில் "வரிக் கொடுமையை" பாருங்க.. ராகுல் காந்தி ட்வீட்

Updated: Monday, July 18, 2022, 17:06 [IST]

Subscribe to Oneindia Tamil

டெல்லி: உலகின் வேகமாக வளர்ந்துவந்த பொருளாதாரத்தை, தற்போது எப்படி அழிப்பது என்பதே பாஜகவின் திட்டமாக இருப்பதாக காங்கிரஸ் மக்களவை உறுப்பினர் ராகுல் காந்தி விமர்சித்துள்ளார்.

ஜூன் மாதம் நடைபெற்ற 47வது ஜிஎஸ்டி கவுன்சில் கூட்டம் நடைபெற்றது. இதில் பல்வேறு பொருட்கள் மீதான ஜிஎஸ்டி வரியை திருத்தியமைக்க ஜிஎஸ்டி கவுன்சில் கூட்டத்தில் முடிவு செய்யப்பட்டது. அதில் எடையளவுச் சட்டத்தின் பாக்கெட்டுகளில் பேக் செய்து விற்பனை செய்யப்படும் பால், மோர், லஸ்ஸி உள்ளிட்ட பொருட்களுக்கு 5 சதவிகிதம் ஜிஎஸ்டி வரியாக விதிக்கப்பட்டது.

வரி உயர்வு அமல்

அதேபோல் விலக்கு அளிக்கப்பட்ட அத்தியாவசிய பொருட்களான அரிசி, கோதுமை, மாவு உள்ளிட்ட பொருட்களுக்கும் 5 சதவிகிதம் ஜிஎஸ்டி வரி விதிக்கப்பட்டுள்ளது. செக் புக்கிற்கு 18 சதவிகிதம், 12 சதவிகிதமாக இருந்த எல்இடி பல்-புக்கான ஜிஎஸ்டி தற்போது 18 சதவிகிதமாக உயர்ந்தது. இந்தப் பொருட்களுக்கான புதிய ஜிஎஸ்டி வரி மாற்றம் இன்று முதல் அமலுக்கு வந்துள்ளது.

ராகுல் விமர்சனம்

இந்த நிலையில் ஜிஎஸ்டி வரி மாற்றத்தால் இன்று முதல் விலை அதிகமாக இருக்கும் பொருட்களின் பட்டியலை காங்கிரஸ் எம்பி ராகுல் காந்தி ட்விட்டரில் பகிர்ந்து கிண்டல் செய்துள்ளார். இதுகுறித்து ராகுல் காந்தி தனது ட்விட்டர் பக்கத்தில், ஒருகாலத்தில் உலகின் வேகமாக வளர்ந்துவந்த பொருளாதாரத்தை, தற்போது எப்படி அழிப்பது என்பதே பாஜகவின் திட்டமாக உள்ளது. அதுமட்டுமல்லாமல் அதிக வரி விதிப்பதோடு, வேலைவாய்ப்பையும் உருவாக்காமல் இருப்பதாக விமர்சித்துள்ளார்.

வரிவிகிதம்

அதோடு, தயிர், பன்னீர், அரிசி, கோதுமை, பார்லி, வெல்லம் மற்றும் தேன் போன்ற பொருட்களுக்கு தற்போது எப்படி வரி விதிக்கப்படுகிறது என்பதைக் காட்டும் வகையில் வரைபடம் ஒன்றை டிவிட்டரில் அவர் பகிர்ந்துள்ளார். மேலும் ரூ. 5 ஆயிரம் வசூலிக்கப்படும் மருத்துவமனைகளின் அறைகளுக்கு 5 சதவிகித வரியும், ரூ.1000க்கு குறைவான உணவக அறைகளுக்கு 12 சதவிகித ஜிஎஸ்டி-யும் விதிக்கப்பட்டுள்ளது.

ராகுல் கண்டனம்

அதேபோல் சோலார் வாட்டர் ஹீட்டர்களுக்கான ஜிஎஸ்டி 5 சதவிகிதத்தில் இருந்து 12 சதவிகிதமாகவும், எல்இடி விளக்குகள் மற்றும் சாதாரண விளக்குகள் மீதான ஜிஎஸ்டி 12 சதவிகிதத்தில் இருந்து 18 சதவிகிதமாக உயர்த்தப்பட்டுள்ளதாகவும் விமர்சித்துள்ளார். அதேபோல் பொதுமக்கள் பயன்படுத்தும் அத்தியாவசியப் பொருட்கள் மீதான ஜிஎஸ்டி வரியை உயர்த்தியதற்கும் கண்டனம் தெரிவித்துள்ளார்.