தனி நபர் வருமான வரியில் மாற்றமில்லை.. சலுகை காட்டாத அரசு.. மாத ஊதியம் பெறுவோர் ஏமாற்றம்
டெல்லி: தனி நபர் வருமான வரியில் எந்த ஒரு மாற்றத்தையும் மத்திய பட்ஜெட்டில் நிதியமைச்சர் நிர்மலா சீதாராமன் அறிவிக்கவில்லை.
2021-22ம் நிதியாண்டுக்கான பட்ஜெட்டை, மத்திய நிதி அமைச்சர் நிர்மலா சீதாராமன் நாடாளுமன்றத்தில் இன்று சமர்ப்பித்தார். முதல் முறையாக டிஜிட்டல் முறையில் பட்ஜெட் சமர்ப்பிக்கப்பட்டது.
காலை 11 மணிக்கு ஆரம்பித்த பட்ஜெட் உரை, தொடர்ந்து 1 மணிநேரம் 50 நிமிடங்கள் நீடித்தது. கொரோனா காலத்தில் தாக்கல் செய்யக் கூடிய பட்ஜெட் என்பதால், தனிநபர் வருமானத்தை உயர்த்துவதற்கு உரிய அறிவிப்புகள் வெளியிடப்படும் என்று கடும் எதிர்பார்ப்பு இருந்தது.
வருமான வரி ஸ்லாப்
அதிலும் குறிப்பாக மாதச் சம்பளதாரர்கள் தங்கள் வருமான வரி ஸ்லாப்பில், மாற்றங்கள் வருமா என்று எதிர்பார்த்தனர். ஏனெனில், தற்போது, 2.5 லட்சம் முதல் 5 லட்சம் வருவாய் ஈட்டுவோருக்கு 5% வருமான வரி பெறப்படுகிறது. 5 லட்சம் முதல் 10 லட்சம் வருவாய் பெறுவோரிடம் 20% வருமான வரி பெறப்படுகிறது. 10 லட்சத்திற்கு அதிகமான வருமானம் ஈட்டுவோரிடம் 30% வருமான வரி பெறப்படுகிறது.
சலுகை பற்றி எதிர்பார்ப்பு
இதில் ஏதேனும் மாற்றங்கள் செய்தால் மக்களுக்கு நல்லது என்ற எதிர்பார்ப்பு இருந்தது. அதாவது 5 லட்சம் வரையிலான வருவாய் ஈட்டுவோரிடம் வருமான வரி பெறாமல் தவிர்ப்பது, 5 லட்சம் முதல் 10 லட்சம் வரையில் வருவாய் ஈட்டுவோரிடம் 10 சதவீதம் மட்டும் வருமான வரி பெறுவது உள்ளிட்ட சலுகைகளை அறிவிப்பாரா நிர்மலா சீதாராமன் என்ற எதிர்பார்ப்பு இருந்தது.
அதே வருமான வரி தொடரும்
ஆனால், பட்ஜெட் உரையில் தனிநபர் வருமான வரி தொடர்பான எந்த ஒரு அறிவிப்பும் வெளியாகவில்லை. இதேபோல கார்பொரேட் வரியும் மாறவில்லை. எனவே தற்போது நடைமுறையில் உள்ள அதே போன்ற வருமான வரி ஸ்லாப் தொடரும் என்பது இதன் பொருளாகும். வருமான வரித் தாக்கல் செய்யக் கூடிய விண்ணப்பங்களில், இனிமேல் முதலீட்டு ஆதாயங்கள் மீதான வருமானம், வங்கி வட்டி வருமானம் ஆகியவற்றின் விவரங்கள் முன்கூட்டியே நிரப்பப்பட்டு இருக்கும் என்றும் நிர்மலா சீதாராமன் தெரிவித்தார்.
மாதச் சம்பளதாரர்கள்
வருமான வரி பற்றி அறிவிப்பு வெளியிடாததால், மாத சம்பளக்காரர்கள் மிகுந்த ஏமாற்றம் அடைந்துள்ளனர். வருமான வரியில் மிச்சமானால் அது பிற செலவீனங்களுக்கு பயன்படுத்தப்படும் வாய்ப்பு இருந்தது. இப்போது அரசுக்கே அந்த பணம் வரியாக போகப்போகிறது என்று மாதச் சம்பளதாரர்கள் அங்கலாய்க்கிறார்கள்.
Click it and Unblock the Notifications
Sign in with Google