பிரதமர் மோடி அமைச்சரவையில் பெண் அமைச்சர்களின் எண்ணிக்கை 11 ஆக அதிகரிப்பு- 7 பேர் புதுமுகங்கள்

டெல்லி: பிரதமர் மோடி தலைமையிலான மத்திய அமைச்சரவையில் பெண் அமைச்சர்கள் எண்ணிக்கை 11 ஆக அதிகரித்துள்ளது. இவர்களில் 7 பேர் புதுமுகங்கள்.

மத்திய அமைச்சரவையில் நிர்மலா சீதாராமன், ஸ்மிருதி இரானி, சாத்வி நிரஞ்சன் ஜோதி, ரேணுகா செருதா ஆகியோர் மத்திய அமைச்சர்களாக உள்ளனர். நிர்மலா சீதாராமனும் ஸ்மிருதி இரானியும் கேபினட் அமைச்சர்கள். சாத்வி நிரஞ்சன் ஜோதி, ரேணுகா செருதா இருவரும் இணை அமைச்சர்கள்.

இந்த நிலையில் நேற்று மத்திய அமைச்சரவை விரிவாக்கம் செய்யப்பட்டது. 7 இணை அமைச்சர்கள், கேபினட் அமைச்சர்களாக பதவியேற்றனர். 36 பேர் புதுமுகங்களும் அமைச்சரவையில் இடம்பெற்றனர். புதுமுகங்கள் 36 பேரில் 7 பேர் பெண்கள். இதனையடுத்து மத்திய அமைச்சரவையில் பெண் அமைச்சர்களின் எண்ணிக்கை 11 ஆக அதிகரித்தது. புதியதாக பதவியேற்ற 7 பெண்கள் அமைச்சர்கள் விவரம்:

அப்னா தள் அனுபிரியா படேல்

உத்தரப்பிரதேசத்தின் மிர்சாபூர் லோக்சபா தொகுதி எம்.பி.யாக 2 முறை வெற்றி பெற்றவர். பாஜகவின் கூட்டணி கட்சியான அப்னா தள் கட்சித் தலைவராக உள்ளார். தொழில் மற்றும் வர்த்தகத் துறை இணை அமைச்சராக உள்ளார். பிரதமர் மோடியின் முந்தைய அமைச்சரவையில் சுகாதாரத்துறை இணை அமைச்சராகவும் பணியாற்றியவர்.

கர்நாடகாவின் சோபா கரந்த்லஜே

கர்நாடகாவின் உடுப்பி-சிக்மகளூர் தொகுதி எம்.பி. 2 முறை லோக்சபா எம்.பி.யாக வென்றவர். கர்நாடகா எம்.எல்.ஏ., எம்.எல்.சி.யாகவும் இருந்துள்ளார். கர்நாடகாவின் மின்சாரத்துறை, ஊரக மேம்பாடு மற்றும் உணவு, பொதுவிநியோகத்துறை அமைச்சராகவும் பதவி வகித்தவர் சோபா கரந்த்லஜே. தற்போது மத்திய வேளாண் துறை, குடும்ப நலன் இணை அமைச்சர் பொறுப்பு வழங்கப்பட்டுள்ளது.

குஜராத்தின் தர்ஷனா ஜர்தோஸ்

குஜராத்தின் சூரத் லோக்சபா தொகுதியில் இருந்து 3 முறை வென்றவர் தர்ஷனா ஜர்தோஸ். சூரத் மாநகராட்சி கவுன்சிலராகவும் குஜராத் சமூக நலத்துறை உறுப்பினராகவும் இருந்தவர். தற்போது ஜவுளி மற்றும் ரயில்வே துறை இணை அமைச்சர் பொறுப்பு வழங்கப்பட்டுள்ளது.

டெல்லி மீனாக்‌ஷி லேகி

டெல்லியில் இருந்து 2வது முறை லோக்சபாவுக்கு தேர்ந்தெடுக்கப்பட்டவர் மீனாக்‌ஷி லேகி. உச்சநீதிமன்றத்தின் வழக்கறிஞர். வெளியுறவுத் துறை மற்றும் கலாசாரத்துறை இணை அமைச்சர் பொறுப்பு வழங்கப்பட்டிருக்கிறது.

ஜார்க்கண்ட் அன்னபூர்னா தேவி

ஜார்க்கண்ட் மாநிலத்தை சேர்ந்த அன்னபூர்னா தேவி, 4 முறை எம்.எல்.ஏவாக இருந்தவர். ஜார்க்கண்ட் மாநிலத்தின் கோடர்மா லோக்சபா தொகுதி எம்.பி.யாக உள்ளார். ஜார்க்கண்ட் மாநில அமைச்சராகவும் இருந்தவர். தற்போது மத்திய கல்வித்துறை இணை அமைச்சர் பொறுப்பு வழங்கப்பட்டுள்ளது.

திரிபுராவின் பிரதிமா பௌமிக்

திரிபுரா எம்.பி.யான பிரதிமா பௌமிக், சமூக நீதித்துறை இணை அமைச்சராகி உள்ளார். திரிபுராவைச் சேர்ந்த ஒருவர் மத்திய அமைச்சரவையில் இடம்பெறுவது இதுவே முதல் முறை.

மகாராஷ்டிராவின் பாரதி பவார்

மகாராஷ்டிராவை சேர்ந்தவர் டாக்டர் பாரதி பவார். முதல் முறையாக லோக்சபா எம்.பி.யாகி உள்ளார். நாசிக் ஜில்லா பரிஷத் உறுப்பினராகவும் இருந்தவர். சுகாதாரம், குடும்ப நலன் துறை இணை அமைச்சர் பதவி கொடுக்கப்பட்டுள்ளது.

English summary

Here is details of PM Modi Govt's Seven new women ministers.