நீங்க டெல்லியில் ஜி20 மாநாடு நடத்துங்க.. நான் ஐரோப்பாவுக்கே போய் கலக்கறேன்.. ”டூர்” போகும் ராகுல்!

டெல்லி: ஜி20 மாநாட்டுக்காக உலக நாடுகளின் தலைவர்கள் டெல்லிக்கு வருகை தர உள்ளனர். அதே நேரத்தில் மூத்த காங்கிரஸ் தலைவர் ராகுல் காந்தி ஐரோப்பிய நாடுகளுக்கு சுற்றுப் பயணம் மேற்கொள்கிறார்.

மூத்த காங்கிரஸ் தலைவர் ராகுல் காந்தி வெளிநாடுகளுக்கு பயணம் மேற்கொண்டாலே இந்தியாவில் அரசியல் சர்சைகள் வெடித்து கிளம்பும். அண்மையில் அமெரிக்கா சென்ற ராகுல் காந்தி, மத்திய பாஜக அரசை கடுமையாக விமர்சித்தார். இதனால் ராகுல் காந்திக்கு மத்திய அமைச்சர்கள் பலரும் கடும் கண்டனம் தெரிவித்தனர். வெளிநாட்டில் ராகுல் காந்தி பேசும் ஒவ்வொரு பேச்சும் உன்னிப்பாக கவனிக்கப்பட்டு அரசியல் களத்தில் விவாதப் பொருளாகிறது.

செப்டம்பர் 9,10 ஆகிய நாட்களில் டெல்லியில் ஜி20 மாநாடு நடைபெற உள்ளது. இம்மாநாட்டில் பங்கேற்க உலக நாடுகளின் தலைவர்கள் டெல்லி வருகை தர உள்ளனர்.

டெல்லி ஜி20 மாநாட்டுக்கு முன்னதாக செப்டம்பர் 6-ந் தேதி ராகுல் காந்தி ஐரோப்பிய நாடுகளுக்கு பயணம் மேற்கொள்கிறார். செப்டம்பர் 7-ந் தேதி பெல்ஜியம் நாட்டில் ஐரோப்பிய யூனியன் எம்.பிக்களை ராகுல் காந்தி சந்தித்து பேசுகிறார். மணிப்பூர் வன்முறைகளுக்கு ஐரோப்பிய யூனியன் கடும் கண்டனம் தெரிவித்திருந்த நிலையில் ராகுல் காந்தி, ஐரோப்பிய யூனியன் எம்.பிக்களை சந்திக்க உள்ளார். ராகுல் காந்தி, ஏற்கனவே மணிப்பூருக்கு சென்று வன்முறை பாதித்த இடங்களையும் பாதிக்கப்பட்ட மக்களையும் சந்தித்தார். ஐரோப்பிய யூனியன் எம்.பிக்களுடனான சந்திப்பின் போது, மணிப்பூர் பயண விவரங்களை ராகுல் காந்தி பகிர்ந்து கொள்ளக் கூடும் என தெரிகிறது.

இதனைத் தொடர்ந்து பிரான்ஸ் செல்லும் ராகுல் காந்தி அங்கு தொழிலாளர்கள் இயக்கப் பிரதிநிதிகளை சந்திக்கிறார். பின்னர் நார்வே நாட்டின் ஆஸ்லோ நகருக்கும் செல்கிறார் ராகுல். ஐரோப்பிய பயணத்தின் போது செய்தியாளர்களையும் சந்தித்து உரையாடுகிறார் ராகுல் காந்தி.

English summary

Senior Congress leader Rahul Gandhi will visit to Europe next month and meet European Union MPs.