ஜாதிவாரி கணக்கெடுப்பு, பெண்களுக்கு ரூ1 லட்சம், பெண்களுக்கு 50% வேலை வாய்ப்பு- காங்கிரஸ் அதிரடி!

டெல்லி: ஏழைப் பெண்களுக்கு ஆண்டுக்கு ரூ.1 லட்சம் நிதி வழங்கப்படும்; மத்திய அரசு பணிகளில் பெண்களுக்கு 50% இடஒதுக்கீடு வழங்குவோம், நாடு முழுவதும் ஜாதிவாரி மக்கள் கணக்கெடுப்பு நடத்துவோம் என்பது உள்ளிட்ட 25 முக்கிய வாக்குறுதிகளுடனான தேர்தல் அறிக்கைக்கு காங்கிரஸ் கட்சியின் செயற்குழு கூட்டம் இன்று ஒப்புதல் அளித்துள்ளது.

18-வது லோக்சபா தேர்தல் நாடு முழுவதும் ஏப்ரல் 19-ந் தேதி முதல் 7 கட்டங்களாக நடத்தப்பட உள்ளது. அனைத்து வாக்குகளும் ஜூன் 4-ந் தேதி எண்ணப்பட்டு முடிவுகள் அறிவிக்கப்படும். மேலும் ஆந்திரா, ஒடிஷா, அருணாச்சல பிரதேசம் உள்ளிட்ட மாநில சட்டசபைகளுக்கும் தேர்தல் நடைபெற உள்ளது.

லோக்சபா தேர்தலுக்கான 82 வேட்பாளர்கள் அடங்கிய பட்டியலை இதுவரை 2 கட்டங்களாக காங்கிரஸ் வெளியிட்டுள்ளது. முதல் கட்டமாக 39 வேட்பாளர்களும் இரண்டாம் கட்டமாக 43 வேட்பாளர்களும் அறிவிக்கப்பட்டனர். மூத்த காங்கிரஸ் தலைவர் ராகுல் காந்தி கேரளா மாநிலம் வயநாடு லோக்சபா தொகுதியில் மீண்டும் போட்டியிடுகிறார். 2019 தேர்தலில் அமேதி, வயநாடு ஆகிய தொகுதிகளில் ராகுல் காந்தி போட்டியிட்டார். இதில் அமேதியில் தோற்ற ராகுல் காந்தி, வயநாடு தொகுதியில் அமோக வெற்றியைப் பெற்றார்.

இதனைத் தொடர்ந்து டெல்லியில் இன்று காங்கிரஸ் கட்சியின் செயற்குழுக் கூட்டம் நடைபெற்றது. இந்தக் கூட்டத்தில் லோக்சபா தேர்தலுக்கான காங்கிரஸ் கட்சியின் தேர்தல் அறிக்கைக்கு ஒப்புதல் அளிக்கப்பட்டது. தமிழ்நாட்டைச் சேர்ந்த மூத்த காங்கிரஸ் தலைவர் ப.சிதம்பரம் தலைமையில் காங்கிரஸ் தேர்தல் அறிக்கை தயாரிக்கும் குழு அமைக்கப்பட்டது.

காங்கிரஸ் கட்சியின் தேர்தல் அறிக்கையில் 25 முக்கிய வாக்குறுதிகள் இடம் பெற உள்ளன. பிரதமர் மோடி அறிவித்து வரும் மோடியின் உத்தரவாதம் என்ற முழக்கத்துக்குப் பதிலடி தரும் வகையில் 25 உத்தரவாதங்கள் காங்கிரஸ் கட்சியின் தேர்தல் அறிக்கையில் இடம் பெற உள்ளன.

இது தொடர்பாக கருத்து தெரிவித்திருந்த காங்கிரஸ் மூத்த தலைவர் ஜெய்ராம் ரமேஷ், மோடி உத்தரவாதம் என தனிநபர் ஒருவராக அறிவிக்கிறார். ஆனால் காங்கிரஸ் கட்சியோ தமது தேர்தல் அறிக்கையில் ஒரு கட்சியின் சார்பாக உத்தரவாதங்களை அறிவிக்க உள்ளது என்றார்.

காங்கிரஸ் கட்சியின் தேர்தல் அறிக்கையில் இடம் பெறும் முக்கிய வாக்குறுதிகள்:

- நாடு முழுவதும் ஜாதிவாரி கணக்கெடுப்பு நடத்தப்படும்

- ஏழை பெண்களுக்கு ஆண்டுக்கு ரூ1 லட்சம் நிதி உதவி வழங்கப்படும்

- மத்திய அரசு பணிகளில் பெண்களுக்கு 50% இடஒதுக்கீடு வழங்கப்படும்

-இடஒதுக்கீடு உச்சவரம்பு 50% என்பதை நீக்க அரசியல் சாசன திருத்தம் மேற்கொள்ளப்படும்

- "இந்தியா" கூட்டணி ஆட்சியில் 30 லட்சம் இளைஞர்களுக்கு உடனடியாக வேலை வாய்ப்பு வழங்கப்படும்.

English summary

Congress Working Committee will approve its Lok Sabha Election 2024 Manifesto on today.