ரஷ்யாவில் இருந்து இறக்குமதியாகும் ஸ்புட்னிக் V கொரோனா தடுப்பூசி ....விரைவில் பயன்பாட்டுக்கு வரும்!

Updated: Thursday, April 15, 2021, 15:46 [IST]

Subscribe to Oneindia Tamil

டெல்லி: ரஷ்யாவில் இருந்து முதல் கட்டமாக இறக்குமதி செய்யப்படும் ஸ்புட்னிக் V கொரோனா தடுப்பூசியானது இந்தியாவில் விரைவில் பயன்பாட்டுக்கு வரும் என்றும் நமது நாட்டில் தயாரிக்கப்படும் ஸ்புட்னிக் V தடுப்பூசி ஓரிரு மாதங்களில் கிடைக்கும் என்றும் தகவல்கள் வெளியாகி உள்ளன.

இந்தியாவில் ஒருநாள் கொரோனா பாதிப்பு 2 லட்சத்தை தாண்டியதாக உள்ளது. இந்தியாவில் இரட்டை மரபணு மாற்றமடைந்த கொரோனா வைரஸ்தான் மிக அதிவேகத்தில் பரவி வருகிறது.

ஸ்புட்னி V தடுப்பூசி

அதேநேரத்தில் கொரோனாவை தடுக்க தடுப்பூசிகள் போடும் நடவடிக்கையும் முடுக்கிவிடப்பட்டுள்ளது. கோவாக்சின், கோவிஷீல்டு ஆகிய தடுப்பூசிகள் நமது நாட்டில் பயன்படுத்தப்பட்டு வருகின்றன. இதனுடன் ரஷ்யாவின் ஸ்புட்னி V தடுப்பூசியை பயன்படுத்தவும் மத்திய அரசு அனுமதி வழங்கியது.

இந்தியாவில் எப்போது கிடைக்கும்?

தற்போதைய நிலையில் ரஷ்யா தயாரிப்பு ஸ்புட்னிக் V தடுப்பூசியானது இம்மாதம் இறுதி முதல் ஜூன் மாதம் வரை பயன்படுத்தப்படலாம்; இதையடுத்து உள்நாட்டிலேயே பல்வேறு நிறுவனங்கள் தயாரித்து வரும் ஸ்புட்னிக் V தடுப்பூசியானது ஜூலை முதல் செப்டம்பருக்குள் பயன்பாட்டுக்கு வந்துவிடும் என்கின்றனர் இதனை தயாரித்து வரும் டாக்டர் ரெட்டி நிறுவன மருத்துவர்கள்.

ரஷ்யாவில் இருந்து இறக்குமதி

முதல் கட்டமாக ரஷ்யாவில் இருந்து ஸ்புட்னிக் V தடுப்பூசி இறக்குமதி செய்யப்பட உள்ளது. இந்த தடுப்பூசிகளை மே முதல் வாரத்தில் இந்தியாவுக்கு ரஷ்யா அனுப்பி வைக்கக் கூடும்.

ஸ்புட்னி V தடுப்பூசி சிறப்புகள் என்ன?

ஸ்புட்னிக் V தடுப்பூசியானது 91.6% கொரோனாவை தடுக்கும் வலிமை கொண்டது. இந்தியாவில் ஆண்டுக்கு 850 மில்லியன் டோஸ்கள் தயாரிக்கப்பட உள்ளன. 18 வயதுக்கு மேல் உள்ளவர்களுக்கு 21 நாட்கள் இடைவெளியில் 2 டோஸ்களாக ஸ்புட்னிக் V தடுப்பூசி போட்டுக் கொள்ளலாம். சர்வதேச சந்தையில் ஸ்புட்னி V தடுப்பூசி விலை ஒரு டோஸ் 10 அமெரிக்க டாலர் என்பது குறிப்பிடத்தக்கது.