டெல்லி: கொரோனா காலத்தில் கெஜ்ரிவால் தந்த ரூ5,000..மறக்காத ஆட்டோ ஓட்டுநர்கள்-இலவு காத்த கிளியாக பாஜக!

டெல்லி: டெல்லி யூனியன் பிரதேச சட்டசபை தேர்தல் ஆட்டோ ஓட்டுநர்களும் அவர்களது குடும்ப வாக்காளர்களும் கொரோனா காலத்தில் முதல்வராக இருந்த அரவிந்த் கெஜ்ரிவால் ரூ 5,000 உதவித் தொகை வழங்கியதை இன்றும் மறக்க முடியாது; அதனால் வாக்குறுதிகளை நிறைவேற்றக் கூடிய கட்சியாக ஆம் ஆத்மி கட்சியையே பார்க்கிறோம் என்கின்றனர். இதனால் ஆட்டோ ஓட்டுநர்கள் வாக்குகளை அள்ளலாம் என காத்திருந்த பாஜகவுக்கு பெரும் ஏமாற்றம்தான் என்கின்றனர் அரசியல் பார்வையாளர்கள்.

டெல்லி யூனியன் பிரதேச சட்டசபை தேர்தல் களத்தில் பெரும்பகுதியான வாக்காளர்கள் நடுத்தர வர்க்கத்தினர்தான். மத்திய பட்ஜெட்டில் ரூ.12 லட்சம் வரை வருமான வரி விலக்கு என மத்திய பாஜக அரசு அறிவித்திருப்பதும் கூட டெல்லி தேர்தலில் தாக்கத்தை ஏற்படுத்தும் என கூறப்படுகிறது.

டெல்லியில் ஆட்டோ ரிக்‌ஷா ஓட்டுநர்கள், அவர்களது குடும்பத்தினர் வாக்குகளும் மிக முக்கியமான இடம் பிடித்திருக்கின்றன. இதனால்தான் ஆம் ஆத்மி, பாஜக, காங்கிரஸ் கட்சிகள், ஆட்டோ ஓட்டுநர்களுக்கு மாதந்தோறும் உதவித் தொகை, ஆட்டோ ஓட்டுநர்களின் பெண்களுக்கு திருமண உதவித் தொகை, கல்வி உதவித் தொகை என்கிற வாக்குறுதிகளை வாரி இறைத்துள்ளன.

2011-ம் ஆண்டு டெல்லியில் பதிவு செய்யப்பட்ட ஆட்டோக்களின் எண்ணிக்கை 1 லட்சம். தற்போது பதிவு செய்யப்பட்ட 8 கோடி மோட்டார் வாகனங்களில் 1.1% ஆட்டோ ரிக்‌ஷாக்கள் என கூறப்படுகிறது. இதனால் பல மடங்கு ஆட்டோ ரிக்‌ஷாக்கள் எண்ணிக்கை அதிகரித்துள்ளது. இதனடிப்படையில்தான் டெல்லியில் ஆட்டோ ஓட்டுநர்கள், அவர்களது குடும்பத்தினர் வாக்குகள் முக்கியமானதாக பார்க்கப்படுகிறது.

இதனாலாயே அனைத்து அரசியல் கட்சிகளும் ஆட்டோ ஓட்டுநர்களின் குடும்பங்களின் வாக்குகளை இலக்கு வைத்தும் வாக்குறுதிகளை வாரி இறைத்தன. அதேநேரத்தில் கொரோனா காலத்தில் அரவிந்த் கெஜ்ரிவால் அரசு, ஆட்டோ ஓட்டுநர்களுக்கு ரூ5, 000 வழங்கியதை நாங்கள் மறக்க முடியாது; ஆகையால்தான் எங்களுக்கான வாக்குறுதிகளை நிறைவேற்றும் அரசாக ஆம் ஆத்மி அரசாங்கத்தை பார்க்கிறோம் என்கின்றனர் டெல்லி ஆட்டோ ஓட்டுநர்கள். இத்தகைய வாக்காளர்களின் மனநிலைதான் டெல்லியில் பாஜகவின் எதிர்பார்ப்புகளில் மண் அள்ளிப் போடக் கூடிய சாத்தியம் என்கின்றனர் அரசியல் பார்வையாளர்கள்.

English summary

Auto Drivers Remember Kejriwal’s Rs. 5,000 Aid During COVID – BJP Left Waiting in Hope in the Delhi Assembly Election.