ரூ.15 லட்சம் போடுறதா சொன்னீங்களே.. என்னாச்சு.. நாடாளுமன்றத்தை அதிர வைத்த திமுக எம்பி கிரிராஜன்

டெல்லி: வெளிநாடுகளில் கருப்பு பணத்தை மீட்டு ஒவ்வொரு குடிமகனின் வங்கி கணக்கிலும் ரூ.15 லட்சம் டெபாசிட் செய்யப்படுமென்று பிரதமர் நரேந்திர மோடி வாக்குறுதி என்னவாயிற்று? என பாஜக அரசுக்கு திமுக மாநிலங்களவை உறுப்பினர் இரா.கிரிராஜன் சரமாரியாக கேள்வியெழுப்பியுள்ளார்.

ஜி20 நாடுகளின் மாநாட்டை வெற்றிகரமாக நடத்தி முடித்த கையோடு தற்போது நாடாளுமன்ற சிறப்பு கூட்டத் தொடரை மத்திய அரசு நடத்தி வருகிறது. கடந்த 18ம் தேதி தொடங்கிய இந்த கூட்டத்தெடர் இன்றுடன் நிறைவடைகிறது. இந்நிலையில் இந்த கூட்டத்தொடரில் பங்கேற்று பேசிய தி.மு.க மாநிலங்களவை உறுப்பினர் இரா.கிரிராஜன், "தமிழ்நாட்டில் மக்களுக்கு அளித்த தேர்தல் வாக்குறுதி அனைத்தையும் திராவிட முன்னேற்ற கழக அரசு நிறைவேற்றி வருகிறது.

அதில் ஒன்றான, மகளிருக்கு மாதம் ரூ.1000 வழங்கும் திட்டமான கலைஞர் மகளிர் உரிமைத் தொகை திட்டத்தை அறிமுகப்படுத்தி முதலமைச்சர் மு.க.ஸ்டாலின் இந்தியவிலேயே முன்மாதிரியாக விளங்கி கொண்டிருக்கிறார். மு.க.ஸ்டாலின் தலைமையிலான திராவிட முன்னேற்ற கழக அரசு மக்களுக்கு அளித்த தேர்தல் வாக்குறுதிகளை நிறைவேற்றி இந்தியாவிலே தமிழ்நாடு சிறந்த மாநிலமாக செயல்பட்டு வருகிறது. ஆனால் ஒன்றிய பாஜக அரசோ இதுவரை மக்களுக்கு அளித்த தேர்தல் வாக்குறுதியை நிறைவேற்றவில்லை . இது பா.ஜ.க அரசின் மிகப்பெரிய தேர்தல் ஜும்லாவாக உள்ளது.

வெளிநாட்டில் உள்ள பதுக்கி வைத்திருந்த கருப்பு பணத்தை மீட்டு ஒவ்வொரு குடிமகனின் வங்கி கணக்கில் ரூ.15 லட்சம் டெபாசிட் செய்யப்படுமென்று பிரதமர் நரேந்திர மோடி மக்களுக்கு அளித்த வாக்குறுதி என்னவாயிற்று? அதேபோல அனைத்து நதிகளை இணைப்பதாக வாக்குறுதி அளித்தார். அதுவும் இதவரை நடக்கவில்லை. ஒவ்வொரு பட்ஜெட்டிலும் விவசாயிகள் வருமானம் இரட்டிப்பாக்கப்படும் என்று வாக்குறுதி அளித்தார். மாறாக விவாசாயிகளின் கடன் அதிகரித்து அவர்களின் தற்கொலைகள்தான் இரட்டிப்பாகியுள்ளது.

படித்த இளைஞர்களுக்கு ஒவ்வொரு ஆண்டும் 2 கோடி புதிய வேலைகளை வழங்குவோம் என்ற ஒன்றிய பாஜக அரசின் வாக்குறுதி என்னவாயிற்று? தற்போது இந்தியாவில் வேலையில்லா பிரச்சனைத்தான் அதிகரித்துள்ளது. கடந்த 10 ஆண்டு ஒன்றிய பாஜக அரசின் தேர்தல் வாக்குறுதிகள் அனைத்தும் ஜும்லாவாக உள்ளது" என்று திமுக மாநிலங்களவை உறுப்பினர் இரா.கிரிராஜன் விமர்சித்துள்ளார்.

English summary

What happened to Prime Minister Narendra Modi's promise to recover black money abroad and deposit Rs 15 lakh in every citizen's bank account? DMK Rajya Sabha member I. Girirajan has asked a barrage of questions to the BJP government.