வரலாற்றில் முதல்முறை.. இந்த தேர்வையும் இனி தமிழிலேயே எழுதலாம்.. மத்திய அரசு சூப்பர் அறிவிப்பு

டெல்லி: சி.ஆர்.பி.எப். தேர்வைத் தொடர்ந்து எஸ்.எஸ்.சி. தேர்வும் தமிழில் நடத்தப்படும் என்று மத்திய அரசு அறிவித்துள்ளது. தேர்வு வரலாற்றில் முதல்முறையாக எஸ்.எஸ்.சி. தேர்வு தமிழ், தெலுங்கு, மலையாளம், கன்னடம் உள்பட 13 மாநில மொழிகளில் நடத்தப்படும் என்று மத்திய அரசு அறிவித்துள்ளது.

வருகிற மே 2ம் தேதி எஸ்.எஸ்.சி. எம்டிஎஸ் தேர்வு தொடங்க உள்ள நிலையில் அறிவிப்பு வெளியாகி உள்ளது.

சிஆர்பிஎப் தேர்வை தமிழ் உள்பட 13 மொழிகளில் எழுதலாம் என்று மத்திய அரசு அண்மையில் அறிவித்திருந்தது. இந்நிலையில் மத்திய பணியாளர் தேர்வாணையம் (SSC) நடத்தும் எம்.டி.எஸ்.(MTS- Multi Tasking Staff) மற்றும் சிஹெச்எஸ்எல் (CHSL - Combined Higher Secondary Level Exam) ஆகிய தேர்வுகளை தமிழ் உள்பட 13 மொழிகளில் நடத்த மத்திய உள்துறை அமைச்சகம் அனுமதி வழங்கி உள்ளது.

இதன் மூலம் மத்திய அரசு ஆண்டு தோறும் நிரப்பும் 10 ஆயிரத்திற்கும் மேற்பட்ட வேலைவாய்ப்புகளுக்கு தமிழர்களும் தங்களது தாய் மொழியான தமிழில் தேர்வு எழுத முடியும்.

முன்னதாக எம்.டி.எஸ்.(MTS- Multi Tasking Staff) மற்றும் சிஹெச்எஸ்எல் (CHSL - Combined Higher Secondary Level Exam) ஆகிய தேர்வுகள் இந்தி மற்றும் ஆங்கிலத்தில் மட்டும் நடத்தப்பட்டு வந்தது.

ஆனால் தேர்வு வரலாற்றில் முதல்முறையாக இனி தமிழ், மலையாளம், கன்னடம், தெலுங்கு, மராத்தி, ஒடிசா, அசாமி, பெங்காலி, குஜராத்தி, உருது, பஞ்சாபி, மணிப்புரி, கொங்கணி என 13 மாநில மொழிகளில் நடத்த மத்திய அரசு அனுமதி வழங்கி உள்ளது.

எஸ்.எஸ்.சி. எம்டிஎஸ் தேர்வு வருகிற மே 2 ஆம் தேதி தொடங்கவுள்ளது. எம்.டி.எஸ்.(MTS- Multi Tasking Staff) பணியில் 10880 இடங்களும் மற்றும் சிஹெச்எஸ்எல் (CHSL - Combined Higher Secondary Level Exam) பணியில் 529 இடங்களும் நிரப்பப்பட உள்ளன.

English summary

For the first time in the history of examination, S.S.C. The central government has announced that the examination will be conducted in 13 state languages including Tamil, Telugu, Malayalam and Kannada.