இமாச்சல பிரதேசத்தில் நவ.12-ல் தேர்தல்;டிச.8-ல் வாக்கு எண்ணிக்கை! அக்.17 முதல் வேட்பு மனுத் தாக்கல்!

Updated: Friday, October 14, 2022, 16:02 [IST]

Subscribe to Oneindia Tamil

டெல்லி: இமாச்சல பிரதேச சட்டசபைக்கு நவம்பர் 12-ந் தேதி தேர்தல் நடைபெறும்; டிசம்பர் 8-ந் தேதி வாக்கு எண்ணிக்கை நடைபெறும் என தலைமை தேர்தல் ஆணையம் அறிவித்துள்ளது. இமாச்சல பிரதேச சட்டசபை தேர்தலுக்கான வேட்பு மனுத் தாக்கல் வரும் 17-ந் தேதி தொடங்குகிறது.

சட்டசபை தேர்தலை எதிர்கொள்ளும் இமாச்சல பிரதேசத்தில் மொத்தம் 68 இடங்கள் உள்ளன. இம்மாநிலத்தில் ஆட்சி அமைக்க தேவையான பெரும்பான்மை 35 இடங்கள். இமாச்சல பிரதேசத்திலும் பாஜக ஆளும் கட்சியாக உள்ளது. இம்மாநில முதல்வராக ஜெய்ராம் தாக்கூர் பதவி வகித்து வருகிறார். இமாச்சல பிரதேச சட்டசபையின் பதவிக் காலம் அடுத்த ஆண்டு ஜனவரி 8-ந் தேதியுடன் முடிவடைகிறது.

இமாச்சல் நவ.12-ல் தேர்தல்; டிச.8-ல் வாக்கு எண்ணிக்கை

இந்த நிலையில் இமாச்சல பிரதேச சட்டசபை தேர்தல் தேதியை தலைமை தேர்தல் ஆணையர் ராஜீவ் குமார் இன்று டெல்லியில் அறிவித்தார். இதன்படி இமாச்சல பிரதேச சட்டசபைக்கு நவம்பர் 12-ந் தேதி வாக்குப் பதிவு நடைபெறும். டிசம்பர் 8-ந் தேதி வாக்குகள் எண்ணப்பட்டு முடிவுகள் அறிவிக்கப்படும்.

இமாச்சல பிரதேச தேர்தல் அட்டவணை

வேட்பு மனுத் தாக்கல் தொடக்கம் அக். 17
வேட்பு மனுத் தாக்கல் நிறைவு அக். 25
வேட்பு மனுக்கள் மீது பரிசீலனை அக்.27
வேட்பு மனுக்கள் வாபஸ் பெற கடைசிநாள் அக்.29
வாக்குப் பதிவு நாள் நவம்பர் 12
வாக்கு எண்ணிக்கை நாள் டிசம்பர் 8

2017 தேர்தல் வென்ற இடங்கள்

2017-ம் ஆண்டு இமாச்சல பிரதேச சட்டசபை தேர்தலில் பாஜக 44 இடங்களிலும் காங்கிரஸ் 21 இடங்களிலும் வென்றது. பாஜகவுக்கு 48.8% வாக்குகளும் காங்கிரஸுக்கு 41.7% வாக்குகளும் கிடைத்தன. தற்போது இமாச்சல பிரதேச சட்டசபையில் பாஜகவுக்கு 43; காங்கிரஸுக்கு 22 எம்.எல்.ஏக்கள் உள்ளனர்.

மும்முனை போட்டி- கருத்து கணிப்பு

இமாச்சல பிரதேசத்திலும் பாஜக, காங்கிரஸ் என இருமுனைப்போட்டிதான் இருந்து வந்தது. தற்போது ஆம் ஆத்மி, இந்த மாநில தேர்தல் களத்திலும் இறங்கி உள்ளது. ஆகையால் இமாச்சல பிரதேசத்திலும் மும்முனைப் போட்டி ஏற்பட்டுள்ளது. இமாச்சல பிரதேச சட்டசபை தேர்தலில் பாஜக 45; காங்கிரஸ் 29; ஆம் ஆத்மி 1 இடங்களில் வெல்ல வாய்ப்புள்ளது என்கிறது சி வோட்டர் கருத்து கணிப்பு. கடந்த முறை 48.8% வாக்குகளைப் பெற்ற பாஜக இம்முறை 45.2%; காங்கிரஸ் கட்சி 41.7%-ல் இருந்து 33.9%; ஆம் ஆத்மி கட்சி 9.5% வாக்குகளைப் பெறும் என தெரிவித்திருந்தது இக்கருத்து கணிப்பு என்பது குறிப்பிடத்தக்கது.