டொனால்ட் டிரம்ப் படத்துக்கு வெற்றித் திலகமிட்டு டெல்லியில் இந்து சேனா சிறப்பு வழிபாடு

டெல்லி: அமெரிக்க அதிபர் தேர்தலில் டொனால்ட் டிரம்ப் வெற்றி பெற டெல்லியில் இந்து சேனா அமைப்பினர் சிறப்பு வழிபாடு நடத்தினர்.

அமெரிக்க அதிபர் தேர்தலில் டொனால்ட் டிரம்ப் மீண்டும் வெல்ல வேண்டும் என்பது இந்திய வலதுசாரிகளின் கருத்து. ஜம்மு காஷ்மீர் விவகாரத்தில் சீனாவுக்கு எதிராக இந்தியாவின் பக்கம் நின்றவர் டொனால்ட் டிரம்ப் என்பது அவர்கள் கருத்து.

ஆனால் அமெரிக்கா வாழ் இந்தியர்களோ விசா, வரிவிதிப்பு உள்ளிட்ட பல்வேறு பிரச்சனைகளின் அடிப்படையில் டிரம்ப்-க்கு எதிராக இருக்கின்றனர் என்கின்றன கருத்து கணிப்பு. டிரம்ப்பை எதிர்த்து போராடும் ஜோ பிடனுக்கே அமெரிக்கா வாழ் இந்தியர்களின் ஆதரவு இருக்கிறது என்கின்றன இந்த கருத்து கணிப்புகள்.

குறிப்பாக இந்திய வம்சாவளி பெண் கமலா ஹாரீஸ் துணை அதிபர் தேர்தலில் போட்டியிடுவதும் ஜனநாயக கட்சி வேட்பாளர் ஜோ பிடனுக்கு அமெரிக்கா வாழ் இந்தியர்கள் ஆதரவளிக்க ஒரு காரணமாக இருக்கலாம். இந்த நிலையில் கமலா ஹாரீஸின் சொந்த ஊரான மன்னார்குடி அருகே உள்ள துளசேந்திரபுரத்தில் அவர் வெற்றி பெற சிறப்பு வழிபாடுகள் நடத்தப்பட்டன.

இதேபோல் டொனால்ட் டிரம்ப் தேர்தலில் வெற்றி பெற டெல்லியில் இந்து சேனா அமைப்பின் சிறப்பு பூஜைகள், யாகங்கள் நடத்தினர். டொனால்ட் டிரம்ப்பின் உருவ படத்தை வைத்து அவருக்கு வெற்றித் திலகமிட்டு வழிபாடுகள் நடத்தப்பட்டன. டொனால்ட் டிரம்ப்பின் வெற்றி மூலமாக சீனா, பாகிஸ்தானுக்கு பதிலடி கொடுக்க முடியும் என்பது இந்து சேனா அமைப்பினர் நம்பிக்கை.

English summary

Prayers for Donald Trump win in Delhi by Hindu Sena.