சாய்னா பற்றி ஆபாச கருத்து .. அமைச்சர் ட்விட்டரில் காட்டம்.. சிக்கலில் சிக்கி தவிக்கும் சித்தார்த்

Updated: Tuesday, January 11, 2022, 20:24 [IST]

Subscribe to Oneindia Tamil

டெல்லி: இந்தியாவுக்கு அளப்பரிய சாதனைகளை புரிந்த ஒரு ஆளுமையான சாய்னா நேவால் குறித்து மிகவும் தரம் தாழ்ந்த கருத்துகளை ஒருவர் தெரிவிப்பார் என்றால் அவரது மட்டமான மனநிலையையே காட்டுகிறது என சட்டத் துறை அமைச்சர் கிரண் ரிஜிஜு தெரிவித்துள்ளார்.

பிரதமர் நரேந்திர மோடியின் கார் பஞ்சாப் மாநிலத்தில் ஒரு பாலத்தில் காத்திருக்க வைத்த சம்பவம் அவரது பாதுகாப்பு குறித்த கேள்வியை எழுப்பியது. இது தொடர்பாக பஞ்சாப் மாநில அரசு, காவல் துறை உள்ளிட்டோரிடம் விளக்கம் கேட்கப்பட்டு வருகிறது.

பிரதமரின பாதுகாப்பு குறைபாடு குறித்து பாட்மிண்டன் வீராங்கனை சாய்னா நேவால் ஒரு ட்வீட் போட்டிருந்தார். அதில் பிரதமருக்கே பாதுகாப்பில் சமரசம் செய்யப்பட்டுள்ளது என்றால் இந்த தேசத்தில் ஒருவரும் பாதுகாப்பாக இருப்பதாக சொல்ல முடியாது என சாய்னா நேவால் தெரிவித்திருந்தார்.

ஆபாச ஒப்பீடு

இவர் ஜனவரி 5ஆம் தேதி போட்ட ட்வீட்டை நடிகர் சித்தார்த் ரீட்வீட் செய்து சாய்னாவுடன் மிகவும் ஆபாசமான அர்த்தம் கொடுக்கக் கூடிய வார்த்தையை ஒப்பிட்டு பேசியிருந்தார். இது பெரும் கண்டனத்துக்குள்ளாகியுள்ளது. இந்தியாவை உலக அரங்கில் பெருமைப்படுத்திய ஒரு ஆளுமையை சர்வ சாதாரணமாக ஆபாசமான கருத்தால் எதிர்கொள்வது எந்த மாதிரியான கோழைத்தனம் என பலர் கேள்வி எழுப்பியுள்ளார்கள்.

சித்தார்த் விவகாரம்

பிரதமரை பிடிக்காவிட்டால் அவருக்கு ஆதரவானவர்கள் மீது இத்தகைய மோசமான சொல்லடிகளால் வசைப்பாடுவது எந்த மாதிரியான மனநிலை என்றும் நெட்டிசன்கள் கேட்கிறார்கள். சித்தார்த் விவகாரம் விஸ்வரூபம் எடுத்துள்ளது. இவருக்கு நாடு முழுவதும் கண்டனங்கள் வலுத்துள்ளன. கருத்தை நல்ல கருத்தால் எதிர்கொள்ளாமல் இப்படி ஆபாசமாக பேசி பெண்ணுக்கு மன உளைச்சலை ஏற்படுத்துவது சரியா என கண்டனங்கள் பெருகுகின்றன.

சித்தார்த்திற்கு குவியும் கண்டனங்கள்

இதுகுறித்து மத்திய அமைச்சர் கிரண் ரிஜிஜு சித்தார்த்தின் பெயரை குறிப்பிடாமல் ஒரு கருத்தை வெளியிட்டுள்ளார். அதில் அவர் கூறுகையில் சாய்னா நேவால் விளையாட்டுத் துறையில் செய்த அளப்பரிய சாதனைகளால் இந்தியாவே பெருமை கொள்கிறது. அவர் ஒலிம்பிக்கில் தங்கம் வென்றவர். அதை காட்டிலும் சிறந்த தேசபக்தர்.

மோசமான கருத்து

இத்தகைய சிறந்த ஆளுமை மீது அது மாதிரியான மோசமான கருத்துகளை ஒருவர் முன்வைக்கிறார் என்றால் அது அவரது மட்டமான மனநிலையையே காட்டுகிறது என்றார். இந்த நிலையில் சித்தார்த் மீது தேசிய மகளிர் ஆணையம் புகார் அளித்துள்ளது. அதன் பேரில் அவர் மீது வழக்குப் பதிவு செய்யப்பட்டுள்ளது.