தமிழ்நாட்டின் ராமநாதபுரத்தில் பிரதமர் மோடி போட்டி இல்லை? இன்று 100 வேட்பாளர்களை அறிவிக்கும் பாஜக
டெல்லி: லோக்சபா தேர்தலில் போட்டியிடும் 100 வேட்பாளர்களை பாஜக இன்று அதிகாரப்பூர்வமாக அறிவிக்க இருக்கிறது. முதல் கட்ட பட்டியலில் பிரதமர் மோடி- வாரணாசி, மத்திய அமைச்சர் அமித்ஷா- காந்திநகர், மத்திய அமைச்சர் ராஜ்நாத்சிங் - லக்னோ தொகுதிகளில் போட்டியிடுவர் என அறிவிக்கப்பட உள்ளதாக பாஜக வட்டாரங்கள் தெரிவித்தன.
18-வது லோக்சபா தேர்தல் தேதியை இந்திய தேர்தல் ஆணையம் அடுத்து வரும் சில நாட்களில் வெளியிடக் கூடும். ஒவ்வொரு மாநிலத்திலும் பாஜக, காங்கிரஸ் உள்ளிட்டவை கூட்டணி கட்சிகளுடன் தொகுதிப் பங்கீட்டு பேச்சுவார்த்தையை நிறைவு செய்து வருகின்றன. இதனைத் தொடர்ந்து வேட்பாளர்களை அறிவிப்பதிலும் அரசியல் கட்சிகள் தீவிரம் காட்டி வருகின்றன.
டெல்லியில் பிரதமர் மோடி தலைமையில் நேற்று இரவு பாஜகவின் மத்திய தேர்தல் குழு கூட்டம் நடைபெற்றது. இந்த ஆலோசனைக் கூட்டம் சுமார் 4 மணிநேரம் நடைபெற்றது. இக்கூட்டத்தில் பாஜகவின் முதல் கட்ட வேட்பாளர்கள் பட்டியல் இறுதி செய்யப்பட்டதாகவும் இந்த பட்டியல் இன்று வெளியாகும் எனவும் அக்கட்சி வட்டாரங்கள் தெரிவித்துள்ளன.
பாஜகவின் முதல் கட்ட வேட்பாளர்கள் பட்டியலில் பிரதமர் மோடி மற்றும் மத்திய அமைச்சர்கள் போட்டியிடும் தொகுதிகள் அறிவிக்கப்பட இருக்கிறதாம். பிரதமர் மோடி மீண்டும் உ.பி. வாரணாசி தொகுதியில் போட்டியிடுகிறாராம். மத்திய உள்துறை அமைச்சர் அமித்ஷா, குஜராத்தின் காந்தி நகரிலும் மத்திய பாதுகாப்புத் துறை அமைச்சர் ராஜ்நாத் சிங், உ.பி. லக்னோ தொகுதியிலும் போட்டியிடக் கூடுமாம்.
முன்னதாக பிரதமர் மோடி, தமிழ்நாட்டின் ராமநாதபுரத்தில் போட்டியிடுவார் என தகவல்கள் வெளியாகி இருந்தன. ஆனால் தற்போதைய தகவல்களின்படி பிரதமர் மோடி மீண்டும் வாரணாசி தொகுதியில் மட்டும் போட்டியிடுவார் என்கின்றன பாஜக வட்டாரங்கள்.
மேலும் தற்போது ராஜ்யசபா எம்பியாக உள்ள மத்திய அமைச்சர்களான நிர்மலா சீதாராமன், பூபேந்தர் யாதவ், ஜோதிராதித்ய சிந்தியா, முரளீதரன் சர்பானந்த் சோனோவால் உள்ளிட்டோரும் லோக்சபா தேர்தலில் வேட்பாளர்களாக களமிறக்கப்பட உள்ளனராம். இப்பட்டியலில் நிறைய புதுமுகங்கள், பெண்களுக்கு முக்கியத்துவம் தரப்பட இருக்கிறதாம். உதாரணமாக மேற்கு வங்க மாநிலம் அன்சோலில் திரிணாமுல் காங்கிரஸ் வேட்பாளராக களமிறங்கும் நடிகர் சத்ருகன் சின்ஹாவுக்கு எதிராக போஜ்பூரி நடிகர் பவன் சிங்கை களமிறக்கவும் பாஜக திட்டமிட்டுள்ளதாம்.
அத்துடன் 2019 லோக்சபா தேர்தலில் பாஜக வெற்றிக்குப் போராடிய தொகுதிகள், தோல்வி அடைந்த தொகுதிகள் ஆகியவற்றுக்கு முக்கியத்துவம் கொடுத்து பலமான வேட்பாளர்களை களமிறக்குவது எனவும் பாஜக திட்டமிட்டுள்ளதாக அக்கட்சி வட்டாரங்கள் தெரிவிக்கின்றன.
Click it and Unblock the Notifications
Sign in with Google