லோக்சபா தேர்தல்: மார்ச் 9-க்கு பின் தேதி அறிவிப்பு?ஆந்திரா உட்பட 4 மாநில சட்டசபைகளுக்கும் தேர்தல்!

டெல்லி: நாட்டின் 18-வது லோக்சபா தேர்தல் தேதியை மார்ச் 9-ந் தேதிக்குப் பின்னர் இந்திய தேர்தல் ஆணையம் அதிகாரப்பூர்வமாக அறிவிக்க இருப்பதாக டெல்லி தகவல்கள் தெரிவிக்கின்றன. லோக்சபா தேர்தலுடன் ஆந்திரா, அருணாச்சல பிரதேசம், சிக்கிம் மற்றும் ஒடிஷா மாநில சட்டசபைகளுக்கும் தேர்தல் தேதியை இந்திய தேர்தல் ஆணையம் அறிவிக்க இருப்பதாகவும் கூறப்படுகிறது.

17-வது லோக்சபா பதவி காலம் முடிவடைகிறது. இதனைத் தொடர்ந்து 18-வது லோக்சபா தேர்தலுக்கான ஏற்பாடுகளை இந்திய தேர்தல் ஆணையம் முழுவீச்சில் மேற்கொண்டு வருகிறது. அனைத்து மாநிலங்கள், யூனியன் பிரதேசங்களிலும் லோக்சபா தேர்தல் ஏற்பாடுகள் அனைத்தும் தயார் நிலையில் இருப்பதாக தேர்தல் ஆணைய வட்டாரங்கள் தெரிவித்துள்ளன.

அதேபோல ஆந்திரா, அருணாச்சல பிரதேசம், சிக்கிம், ஒடிஷா ஆகிய 4 மாநில சட்டசபைகளின் பதவி காலமும் ஏப்ரல்- மே மாதங்களில் முடிவடைகிறது. இதனால் இந்த 4 மாநிலங்களுக்கும் லோக்சபா தேர்தலுடன் தேர்தல் நடைபெறும் என்பது எதிர்பார்ப்பு. மேலும் ஜம்மு காஷ்மீர் யூனியன் பிரதேச சட்டசபைக்கும் தேர்தல் தேதி அறிவிக்கப்படலாம் எனவும் கூறப்படுகிறது.

தற்போது இந்திய தேர்தல் ஆணையம் அனைத்து மாநிலங்களிலும் ஆய்வுகளை நடத்திய நிலையில் மார்ச் 9-ந் தேதிக்குப் பின்னர் தேர்தல் தேதி அறிவிக்கப்படக் கூடும் என்கின்றன டெல்லி தகவல்கள். கடந்த 17-வது லோக்சபா தேர்தலைப் போலவே ஏப்ரல் மாதம் 2-வது வாரம் தொடங்கி மே 2-வது வாரம் வரை பல்வேறு கட்டங்களாக லோக்சபா மற்றும் 4 மாநில சட்டசபை தேர்தல்களை தேர்தல் ஆணையம் நடத்த வாய்ப்புகள் அதிகம் உள்ளது.

18-வது லோக்சபா தேர்தலில் மொத்தம் 97 கோடி வாக்காளர்கள் வாக்களிக்க உள்ளனர். தமிழ்நாட்டில் 39 லோக்சபா தொகுதிகள் உள்ளன. இவற்றில் 7 தனித் தொகுதிகள். 18-வது லோக்சபா தேர்தலில் தமிழ்நாட்டில் வாக்களிக்க உள்ள வாக்காளர்கள் மொத்த எண்ணிக்கை 6,18,90,034. இவர்களில் பெண்கள் 3,14,85,724; ஆண்கள் 3,03,96,330; 3-ம் பாலினத்தவர் 8,294, மாற்றுத்திறனாளிகள் 4,32,805 உள்ளனர். 2019-ம் ஆண்டு 17-வது லோக்சபா தேர்தலில் 71.87% வாக்குகள் பதிவாகி இருந்தன என்பது குறிப்பிடத்தக்கது.

English summary

Sources said that Lok Sabha election 2024 Poll dates likely to be announce after March 9.