குலாம் நபி ஆசாத்தை தொடர்ந்து மணிஷ் திவாரி? காங். தலைவர் தேர்தல் நடைமுறை குறித்து சரமாரி விமர்சனம்
டெல்லி: காங்கிரஸ் கட்சி தலைவர் பதவிக்கான நடைமுறைகளை பகிரங்கப்படுத்த வேண்டும் என்று அக்கட்சியின் மூத்த தலைவர்களில் ஒருவரான மணிஷ் திவாரி வலியுறுத்தி உள்ளார்.
காங்கிரஸ் கட்சியில் இருந்து மூத்த தலைவர்களில் ஒருவரான குலாம் நபி ஆசாத் வெளியேறிவிட்டார். ஜம்மு காஷ்மீர் அரசியலை மையமாக வைத்து தனிக் கட்சி தொடங்குவதில் முனைப்பாக இருக்கிறார் குலாம் நபி ஆசாத். ஜம்மு காஷ்மீர் மாநிலத்தின் காங்கிரஸ் நிர்வாகிகள் ஒட்டுமொத்தமாக குலாம் நபி ஆசாத்துக்கு ஆதரவு தெரிவித்துள்ளனர்.
அசோக் கெலாட்
இந்த நிலையில் அக்டோபர் 17-ந் தேதி நடைபெற உள்ள காங்கிரஸ் கட்சியின் தலைவர் பதவியை முன்வைத்து அக்கட்சியில் குழப்பம் தொடர்ந்து கொண்டிருக்கிறது. காங்கிரஸ் தலைவர் தேர்தலில் போட்டியிட சோனியா காந்தி குடும்பம் மறுத்துவிட்டது. அத்துடன் தங்களது சாய்ஸாக ராஜஸ்தான் முதல்வர் அசோக் கெலாட்டை முன்னிறுத்துகிறது சோனியா காந்தி குடும்பம்.
சசி தரூர் போட்டி?
அசோக் கெலாட்டுக்கு எதிராக அதிருப்தியாளர்களின் வேட்பாளராக சசி தரூர் போட்டியிட வாய்ப்புள்ளதாக கூறப்படுகிறது. இது தொடர்பாக சசி தரூர் பூடகமாகவே பதிலளித்தும் வருகிறார். இந்த நிலையில் காங்கிரஸ் கட்சியின் தேர்தல் ஆணைய தலைவர் மதுசூதன் மிஸ்த்ரி, தலைவர் தேர்தல் நடைமுறைகள் குறித்து தெரிவித்த கருத்துகள் சர்ச்சையாகி உள்ளது.
மணிஷ் திவாரி சாடல்
இது தொடர்பாக தமது ட்விட்டர் பக்கத்தில் பதிவிட்டுள்ள மணிஷ் திவாரி, தலைவர் தேர்தலில் யார் யார் வாக்களிப்பார்கள் என்ற விவரங்கள் பகிரங்கப்படுத்தமாட்டாது என்கிறார் மதுசூதன் மிஸ்த்ரி. இந்த விவரங்களை மாநில காங்கிரஸ் கமிட்டிகளிடம் வாங்கி கொள்ளலாம் என்கிறார். காங்கிரஸ் தலைவர் தேர்தலில் போட்டியிடுகிறவர் ஒவ்வொரு மாநில காங்கிரஸ் கமிட்டி அலுவலகத்துக்கும் சென்று இந்த விவரங்களை வாங்கவா முடியும்? ஏன் இந்த விவரங்களை காங். அதிகாரப்பூர்வ இணையதளத்தில் வெளியிடக் கூடாது என கேள்வி எழுப்பியுள்ளார்.
மணிஷ் திவாரி வெளியேறுகிறார்?
குலாம்நபி ஆசாத் தலைமையிலான காங்கிரஸின் அதிருப்தி கோஷ்டியில் இருந்தவர் மணிஷ் திவாரி. கடந்த சில மாதங்களாகவே காங்கிரஸ் மேலிடத்துக்கு எதிராக கருத்துகளை கூறி வருகிறார். இதனால் காங்கிரஸில் இருந்து வெளியேறுவார் மணிஷ் திவாரி எனவும் கூறபப்பட்டு வருகிறது. தற்போது குலாம் நபி ஆசாத் வெளியேறிய நிலையில் மணிஷ்திவாரியின் இந்த கலகக் குரல் முக்கியத்துவமானதாக பார்க்கப்படுகிறது.
Click it and Unblock the Notifications
Sign in with Google