நீங்க 4G கட்சி... அமித்ஷாவின் ’அக்கப்போர்’ விளக்கம்! பாஜகதான் 2G கட்சி பொளேர் பதிலடி தந்த காங்கிரஸ்!

டெல்லி: காங்கிரஸ் கட்சியை 4G கட்சி என மத்திய உள்துறை அமைச்சர் அமித்ஷா விமர்சித்திருந்ததற்கு காங்கிரஸ் பதிலடி தந்துள்ளது. பாஜகதான் 2G கட்சி என காங்கிரஸ் சாடியுள்ளது.

தெலுங்கானா சட்டசபை தேர்தல் இந்த ஆண்டு நவம்பர் இறுதி அல்லது டிசம்பர் முதல் வாரத்தில் நடைபெற உள்ளது. தெலுங்கானா தேர்தலில் ஆளும் பிஆர்எஸ், காங்கிரஸ், பாஜக என மும்முனைப் போட்டி நிலவுகிறது. ஆளும் பிஆர்எஸ் கட்சி 115 தொகுதிகளுக்குமான வேட்பாளர்களை களமிறக்கியும் விட்டது.

இந்நிலையில் தெலுங்கானாவின் கம்மம் மாவட்டத்தில் நேற்று தேர்தல் பிரசாரப் பொதுக் கூட்டத்தில் மத்திய அமைச்சர் அமித்ஷா பங்கேற்றார். இக்கூட்டத்தில் பேசிய அமித்ஷா, காங்கிரஸ் மற்றும் ஆளும் பிஆர்எஸ் கட்சிகளை கடுமையாக விமர்சித்தார்.

மேலும் காங்கிரஸ் கட்சி 4G கட்சி. அதாவது 4 தலைமுறை கட்சி. ஜவஹர்லால் நேரு, இந்திரா காந்தி, ராஜீவ் காந்தி, ராகுல் காந்தி என 4 ஜெனரேசன் கட்சி. தெலுங்கானாவில் ஆளும் பிஆர்எஸ் கட்சி கேசிஆர், கேடிஆர் எனும் 2G கட்சி. தெலுங்கானா தேர்தலில் 4G கட்சியோ, 2G கட்சியோ வெல்லப் போவது கிடையாது. தெலுங்கானாவில் பாஜகதான் ஆட்சி அமைக்கும். பிஆர்எஸ் கட்சியின் சின்னம் கார். அந்த கார் பத்ராசலத்தைத் தாண்டி போக முடியாது. ஏனெனில் கார், ஓவைசியின் கட்டுப்பாட்டில் இருக்கிறது என கடுமையாக சாடியிருந்தார் அமித்ஷா.

இதற்கு காங்கிரஸ் மூத்த தலைவர் பவன் கேரா அளித்த பதில்: பாஜகதான் 2G கட்சியாக செயல்படுகிறது. மோடி, அமித்ஷாதான் பாஜகவில் அனைத்து முடிவுகளையும் எடுக்கின்றனர். ஜேபி நட்டா, பாஜக தலைவர்தான். ஆனால் அவர் எந்த ஒரு முடிவையும் எடுப்பது இல்லை. அமைச்சரவை பணிகளைப் பார்க்காமல் தெலுங்கானா தேர்தல் பிரசாரம் செய்கிறார் அமித்ஷா. இவ்வாறு பவன் கேரா பதிலளித்தார்.

English summary

Congress leader Pawan Khera said that This BJP is 2G party, Modi and Shah. JP Nadda is the president of the party, yet he doesn't have a role in the party.