தாக்குதல் நிறுத்தத்தை முதலில் ட்ரம்ப் அறிவித்தது ஏன்? பிரதமர் மோடிக்கு ராகுல் காந்தி கடிதம்!
டெல்லி: போர் நிறுத்த அறிவிப்பை அமெரிக்க அதிபர் ட்ரம்ப் முதலில் வெளியிட்டது தொடர்பாக விவாதிக்க வேண்டும் என பிரதமர் மோடிக்கு எதிர்க்கட்சித் தலைவர் ராகுல் காந்தி கடிதம் எழுதியுள்ளார்.
இந்தியா - பாகிஸ்தான் தாக்குதல் குறித்து சிறப்பு நாடாளுமன்ற கூட்டத்தை நடத்த எதிர்க்கட்சி தலைவர் ராகுல் காந்தி பிரதமர் மோடிக்கு கடிதம் எழுதியுள்ளார்.
கடந்த ஏப்ரல் 22 ஆம் தேதி ஜம்மு காஷ்மீரில் உள்ள பஹல்காமில் சுற்றுலா பயணிகள் மீது நடந்த பயங்கரவாத தாக்குதலில் 26 பேர் கொல்லப்பட்டனர். இதற்கு கடுமையான பதிலடி கொடுக்கப்படும் என பிரதமர் மோடி தெரிவித்திருந்த நிலையில், கடந்த மே 7ஆம் தேதி பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் தீவிரவாத முகாம்கள் மீது இந்திய ராணுவ படைகள் தாக்குதல் நடத்தியது.
இதையடுத்து மே 8 மற்றும் 9ஆம் தேதிகளில் இந்தியா - பாகிஸ்தானுக்கிடையே கடும் தாக்குதல் நடைபெற்றது. பாகிஸ்தான் ராணுவம் டிரோன்களைக் கொண்டும், ஏவுகணைகளை கொண்டும் தாக்குதல் நடத்தியது. அவற்றை இந்தியா முறியடித்தது.
பாகிஸ்தான் தாக்குதலுக்கு பதிலடியாக பாகிஸ்தானில் உள்ள ராணுவ தளவாடங்கள் மீது தாக்குதல் நடத்தியது இந்தியா. இதையடுத்து அமெரிக்க அதிபர் டொனால்ட் டிரம்ப் இந்த விவகாரத்தில் தலையிட்டதாக கூறப்பட்டது. நேற்று மாலை இரு நாடுகளும் தாக்குதலை நிறுத்திக்கொள்வதாக அறிவித்தன.
இந்தியா, பாகிஸ்தான் இடையே போர் நிறுத்தம் நேற்று மாலை 5 மணி முதல் அமலுக்கு வந்தது. இருந்தாலும் நேற்று இரவிலும் எல்லையில் பாகிஸ்தான் அத்துமீறி தாக்குதல் நடத்தி வந்தது. இதை இந்தியா வெற்றிகரமாக முறியடித்தது.
இந்நிலையில் இந்த பிரச்சனை தொடர்பாக விவாதிக்க நாடாளுமன்ற சிறப்பு கூட்டத்தொடரை உடனடியாக கூட்ட வேண்டும் என மக்களவை எதிர்க்கட்சித் தலைவரும், காங்கிரஸ் மூத்த தலைவருமான ராகுல் காந்தி, பிரதமர் மோடிக்கு கடிதம் எழுதியுள்ளார். இந்தியாவின் பாதுகாப்பு மற்றும் ராஜாங்க உறவுகள் குறித்து விவாதிக்க சிறப்பு நாடாளுமன்ற கூட்டத்தை கூட்ட மக்களவை எதிர்க்கட்சித் தலைவர் ராகுல் காந்தி கோரிக்கை விடுத்துள்ளார்.
இது குறித்து பிரதமர் மோடிக்கு கடிதம் எழுதியுள்ள ராகுல் காந்தி, "பஹல்காம் தாக்குதல், ஆபரேஷன் சிந்தூர், பாகிஸ்தான் உடனான தாக்குதலை நிறுத்த அமெரிக்க அதிபர் டிரம்ப் அறிவித்தது குறித்து விவாதிக்க வேண்டும். இந்த கோரிக்கையை நிச்சயம் பரிசீலிப்பீர்கள் என்ற நம்பிக்கை இருக்கிறது" எனக் குறிப்பிட்டுள்ளார்.
Click it and Unblock the Notifications
Sign in with Google