வென்றாலும் பாஜகவுக்கு உறுத்தலைக் கொடுக்கும் அகிலேஷ் யாதவின் சமாஜ்வாதி கட்சி.. 10% வாக்குகள் அதிகரிப்பு!

டெல்லி: உத்தரப்பிரதேச சட்டசபை தேர்தலில் பாஜக 255 இடங்களில் வென்று ஆட்சியைத் தக்க வைத்திருந்தாலும் சமாஜ்வாதி கட்சியின் வாக்கு சதவீதம் சுமார் 10% அதிகரித்திருப்பது அக்கட்சிக்கு ஆகப் பெரும் சவாலாக இருக்கும் என்கின்றனர் அரசியல் பார்வையாளர்கள்.

5 மாநில சட்டசபை தேர்தல்களில் உ.பி.யில் அகிலேஷ் யாதவின் சமாஜ்வாதி கட்சி தமது வாக்கு சதவீதத்தை மிக அதிகமாக உயர்த்தி காட்டியிருக்கிறது. பஞ்சாப்பில் ஆம் ஆத்மி கட்சியின் வாக்கு சதவீதம் இரு மடங்காக உயர்ந்துள்ளது.

பாஜக, சமாஜ்வாதி

உத்தரப்பிரதேசத்தில் 2017-ம் ஆண்டு தேர்தலை ஒப்பிடுகையில் பாஜகவின் வாக்கு சதவீதம் 2% உயர்ந்துள்ளது. 2017-ல் பாஜகவின் வாக்கு சதவீதம் 39.7% ஆக இருந்தது. தற்போது 41.6% ஆக அதிகரித்துள்ளது. அதேநேரத்தில் 2017-ல் அகிலேஷ் யாதவின் சமாஜ்வாதி கட்சியின் வாக்கு சதவீதம் 21.8% ஆக இரருந்தது. தற்போது சமாஜ்வாதி கட்சியின் வாக்கு சதவீதம் 31.2% ஆக உயர்ந்துள்ளது.

காங். படுமோசம்

உ.பியில் பகுஜன் சமாஜ் மற்றும் காங்கிரஸ் கட்சிகளின் வாக்கு சதவீதம் மிகப் பெரிய சரிவை சந்தித்துள்ளன. 2017-ல் பகுஜன் சமாஜ் கட்சியின் வாக்கு சதவீதம் 22.2% ஆக இருந்தது. தற்போதைய தேர்தலில் இது 12.7% ஆக வீழ்ச்சி அடைந்துள்ளது. காங்கிரஸ் கட்சி ஏற்கனவே 6.3% வாக்குகளைப் பெற்றிருந்தது. இம்முறை அதைவிட படுமோசமாக வெறும் 2.4% வாக்குகளைத்தான் காங்கிரஸ் கட்சியால் பெற முடிந்துள்ளது. உ.பி.யில் மிக சிறிய கட்சியான ராஷ்டிரிய லோக் தள் கட்சியின் வாக்கு சதவீதம் 3% என்பதும் குறிப்பிடத்தக்கது.

ஆம் ஆத்மி இருமடங்கு மெர்சல்

பஞ்சாப் மாநிலத்தில் 2017-ல் ஆம் ஆத்மி கட்சியின் வாக்கு சதவீதம் 23.7% ஆக இருந்தது. இது தற்போது இரு மடங்காக அதிகரித்துள்ளது. ஆம் ஆத்மி கட்சியின் தற்போதைய வாக்கு சதவீதம் 42% ஆக விஸ்வரூபம் எடுத்திருக்கிறது. பஞ்சாப்பில் காங்கிரஸ் கட்சியின் வாக்கு சதவீதம் 38.5% த்தில் இருந்து 23% ஆக சரிந்துள்ளது. சீக்கியர்களின் கட்சியான சிரோமணி அகாலி தளம் தமது செல்வாக்கை படிப்படியாக இழந்து வருகிறது. அகாலிதளத்தின் வாக்கு சதவீதம் 25.2%-ல் இருந்து 18.4% ஆக குறைந்துள்ளது.

உத்தரகாண்ட் காங். அதிகரிப்பு

உத்தரகாண்ட் மாநிலத்தில் பாஜக ஆட்சியைத் தக்க வைத்திருக்கிறது. அதேநேரத்தில் காங்கிரஸின் வாக்கு சதவீதம் அதிகரித்திருக்கிறது. 2017 சட்டசபை தேர்தலில் உத்தரகாண்ட் மாநிலத்தில் காங்கிரஸின் வாக்கு சதவீதம் 33.5%. இது தற்போது 37.9% ஆக உயர்ந்துள்ளது. 2017-ம் ஆண்டு தேர்தலை ஒப்பிடுகையில் பாஜகவின் வாக்கு சதவீதம் சரிந்திருக்கிறது என்பது குறிப்பிடத்தக்கது. உத்தரகாண்ட்டில் ஆளும் பாஜகவின் வாக்கு சதவீதம் 46.5% -ல் இருந்து 44.3% ஆக குறைந்திருக்கிறது.

கோவா கட்சிகள் வாக்கு சதவீதம்

கோவா மாநிலத்தில் தனிப்பெரும்பான்மை கட்சியாக பாஜக அதிக இடங்களைப் பெற்றுள்ளது. இம்மாநிலத்தில் பாஜகவின் வாக்கு சதவீதமானது 32.5%-ல் இருந்து 33.3% ஆக சற்று அதிகரித்திருக்கிறது. காங்கிரஸ் கட்சியின் வாக்கு சதவீதம் கணிசமாக சரிவை எதிர்கொண்டிருக்கிறது. காங்கிரஸின் வாக்கு சதவீதமானது 28.4%-ல் இருந்து 23.5% ஆக குறைந்துள்ளது.

மணிப்பூர் காங். படுவீழ்ச்சி

மணிப்பூரில் விஸ்வரூப வெற்றியைப் பெற்றிருக்கும் பாஜகவின் வாக்கு சதவீதம் 36.3%-ல் இருந்து 37.7% ஆக உயர்ந்துள்ளது. ஆனால் காங்கிரஸ் வாக்கு சதவீதம் படுமோசமாக குறைந்துள்ளது. 2017 தேர்தலில் காங்கிரஸ் கட்சி 35.1% வாக்குகளைப் பெற்றிருந்தது. இம்முறை 16.6% வாக்குகளை மட்டுமே பெற்றுள்ளது. தேசிய மக்கள் கட்சியின் வாக்கு சதவீதம் 17.1%. அந்த கட்சியைவிட காங்கிரஸின் வாக்கு சதவீதம் குறைந்து போயுள்ளது.

English summary

According to the Election commission data Akilesh Yadav's Samajwadi Vote share 10% increased compare to 2017 Polls in UP.