அசத்தல்! சந்திரயான் 3 விஞ்ஞானிகள் குழுவில் திண்டுக்கல் குக்கிராம அரசு பள்ளி முன்னாள் மாணவர்கள்!

திண்டுக்கல்: சந்திரயான் 3 விஞ்ஞானிகள் குழுவில் திண்டுக்கல் மாவட்டத்தை சேர்ந்த அரசு பள்ளி முன்னாள் மாணவர்களான ரவிச்சந்திரன், காமேஷ் குரு ஆகியோரும் இடம்பெற்றிருந்ததை பெருமிதமாக கொண்டாடுகின்றனர் உள்ளூர் மக்கள்.

இந்தியாவின் விண்வெளி ஆய்வுத் துறையின் புதிய சரித்திரமாக நிலவின் தென் துருவத்தில் சந்திரயான் 3 விண்கலம் தரை இறக்கபப்ட்டது. நிலவின் தென் துருவப் பகுதியில் கால் பதித்த முதல் நாடு இந்தியா என்ற பெருமையைப் பெற்றுள்ளது.

இந்தியாவை தலைநிமிரவைத்த சந்திரயான் 3 திட்ட இயக்குநர் வீரமுத்துவேல், தமிழ்நாட்டின் விழுப்புரம் மாவட்டத்தைச் சேர்ந்தவர். சந்திரயான் 3 விஞ்ஞானிகள் குழுவில் தமிழ்நாட்டைச் சேர்ந்த பலரும் இடம் பெற்றிருக்கும் தகவல்கள் வெளியாகி வருகின்றன.

சந்திரயான்-3 விண்கலம் தொடர்பான பணிகளில் கட்டளைகளை பிறப்பிக்கும் டெலிகமாண்ட் சாப்ட்வேர் வடிவமைப்பாளராக பணிபுரிந்தது திண்டுக்கல் மாவட்டத்தை சேர்ந்த பெண் விஞ்ஞானி கெளரிமணி ராமராஜ். இவர் பழனி அருகே கணக்கன்பட்டியைச் சேர்ந்தவர்.

இதேபோல சந்திரயான் 3 குழுவில் இடம் பெற்றிருந்த ரவிச்சந்திரன், காமேஷ் குரு ஆகிய 2 விஞ்ஞானிகள் திண்டுக்கல் மாவட்டத்தைச் சேர்ந்தவர்கள். திண்டுக்கல் மாவட்டம் ஒட்டன்சத்திரம் அருகே உள்ள சத்திரப்பட்டி வேலூர் கிராமத்தைச் சேர்ந்தவர் ரவிச்சந்திரன். அங்கு அரசு உயர்நிலைப்பள்ளியில் 10-ம் வகுப்பு வரை படித்தார். பழனியில் உள்ள பழனியாண்டவர் பாலிடெக்னிக்கில் டிப்ளமோ பட்டம் பெற்றார். பின் பிஇ, எம்இ என உயர் கல்வி கற்று இஸ்ரோவில் இணைந்தார். தற்போதைய சந்திரயான் 3 குழுவிலும் இடம்பெற்றிருந்தார் விஞ்ஞானி ரவிச்சந்திரன்.

மேலும் திண்டுக்கல் மாவட்டம் சாணார்பட்டி அருகே கம்பிளியம்பட்டியைச் சேர்ந்த காமேஷ் குரு, அரசு மேல்நிலைப் பள்ளியில் 10-ம் வகுப்பு வரை படித்தார். பின்னர் திண்டுக்கல் எம்.எஸ்.பி. பள்ளியில் 12-ம் வகுப்பு கற்றார். இதனைத் தொடர்ந்து பொறியியல் பட்டம் உள்ளிட்டவை பெற்று இஸ்ரோவில் இணைந்தார். தற்போது சந்திரயா 3 விஞ்ஞானிகள் குழுவிலும் இடம்பெற்றுள்ளார். திண்டுக்கல் மாவட்டத்தை சேர்ந்த விஞ்ஞானிகள் சந்திரயான் 3 குழுவில் இடம்பெற்றிருபதை மாவட்ட மக்கள் கொண்டாடி மகிழ்கின்றனர்,

English summary

Two More Dindigul Scientists participated in the Chandrayaan-3 Team.