அடுத்தது ரூபாய் நோட்டில் காந்திக்கு பதில் அவர் படம்- அதானே? மத்திய அரசு மீது கேசிஆர் கட்சி பாய்ச்சல்

Updated: Friday, September 16, 2022, 16:44 [IST]

Subscribe to Oneindia Tamil

ஹைதராபாத்: குஜராத் மாநிலம் அகதமாபாத் மருத்துவ கல்லூரி மருத்துவமனையின் பெயரை மாற்றி பிரதமர் மோடி பெயரை சூட்டியதற்கு தெலுங்கானா ராஷ்டிரிய சமிதி கட்சி கடுமையாக எதிர்த்துள்ளது.

தெலுங்கானா மாநிலத்திலும் சட்டசபை தேர்தல் ஜூரம் அனலடிக்கத் தொடங்கி உள்ளது. தெலுங்கானாவுக்கு முன்கூட்டியே சட்டசபை தேர்தல் நடத்துவதற்கு முதல்வர் சந்திரசேகர ராவ் தலைமையிலான தெலுங்கானா ராஷ்டிரிய சமிதி கட்சி (டிஆர்எஸ்) தயாராகி வருகிறது.

தெலுங்கானா நிலவரம்

தெலுங்கானாவைப் பொறுத்தவரையில் தெலுங்கானா ராஷ்டிரிய சமிதிக்கு எதிர்க்கட்சியாக காங்கிரஸ்தான் இருந்து வருகிறது. ஆனால் காங்கிரஸின் இடத்தை எப்படியாவது பிடித்துவிட வேண்டும் என்பதில் பாஜக தீவிரமாக உள்ளது. தெலுங்கானாவில் ஆளும் டிஆர்எஸ்/ பாஜக என்ற நிலைமைதான் உருவாக வேண்டும் என்பது பாஜகவின் திட்டம். இதற்காக இந்துத்துவா செயல் திட்டங்களை கையில் எடுத்து தீவிரமாக களப்பணியாற்றுகிறது பாஜக.

டிஆர்எஸ் வியூகம்

இன்னொரு பக்கம், காங்கிரஸ் அல்லாத எதிர்க்கட்சிகளுடன் மிக நெருக்கம் காட்டுகிறது டிஆர்எஸ். மேலும் தேசிய அளவிலான கட்சி ஒன்றையும் முதல்வர் சந்திரசேகர ராவ் தொடங்க உள்ளார். அண்மையில் பீகார் முதல்வர் நிதிஷ்குமாரையும் கேசிஆர் சந்தித்து பேசி பெரும் பரபரப்பை கிளப்பி இருந்தார். அத்துடன் பாஜகவின் பி டீம், டிஆர்எஸ் என்ற விமர்சனங்கள் இம்மியளவும் துளிர்க்கக் கூடாது என்பதில் அக்கட்சி மிக கவனமாக உள்ளது.

மத்திய அரசுக்கு பதிலடி

இந்நிலையில் தெலுங்கானா ராஷ்டிரிய சமிதியின் செயல்தலைவரும் தொழில்துறை அமைச்சருமான கே.டி.ராமராவ், பாஜகவை மிக கடுமையாக விமர்சித்துள்ளார். அவர் தமது ட்விட்டர் பதிவில் பதிவிட்டுள்ளதாவது: அகமதாபாத்தின் எல்ஜி மருத்துவ கல்லூரியின் பெயர் பிரதமர் மோடியின் பெயரால் மாற்றம் செய்யப்பட்டுள்ளது. ஏற்கனவே சர்தார் படேல் ஸ்டேடியத்தின் பெயருக்கும் பிரதமர் மோடியின் பெயர் சூட்டப்பட்டிருக்கிறது. இப்படியே போனால், இனி அச்சடிக்கும் ரூபாய் நோட்டுகளில் மகாத்மா காந்தியின் படத்துக்கு பதில் பிரதமர் மோடியின் படத்தை அச்சிடுங்கள் என நிதி அமைச்சர் நிர்மலா சீதாராமன் உத்தரவிடக் கூடும். இவ்வாறு கேடி ராமராவ் விமர்சித்துள்ளார்.

அகமதாபாத் பெயரை மாற்றுங்களேன்..

முன்னதாக, ஜார்க்கண்ட் முன்னாள் முதல்வர் ரகுபர் தாஸ், தெலுங்கானாவில் பாஜக ஆட்சிக்கு வந்தால் ஹைதராபாத் பெயரை பாக்யா நகர் என மாற்றுவோம் என கூறியிருந்தார். இதற்கு பதிலடியாக அகமதாபாத் நகருக்கு அதானியின் பெயரை ஏன் சூட்டக் கூடாது என கிண்டலடித்திருந்தார் ராமராவ் என்பதும் குறிப்பிடத்தக்கது.