188 பேரை பலி கொண்ட மும்பை ரயில் தொடர் குண்டுவெடிப்பு வழக்கில் 12 பேர் குற்றவாளிகள்: கோர்ட் தீர்ப்பு!

மும்பை: மும்பையில் 2006ஆம் ஆண்டு 188 பேரை பலி கொண்ட ரயில் தொண்டர் குண்டுவெடிப்பு வழக்கில் கைது செய்யப்பட்ட 13 பேரில் 12 பேரை குற்றவாளிகள் என்று சிறப்பு நீதிமன்றம் தீர்ப்பளித்துள்ளது. இந்த வழக்கில் அப்துல் வஹீத் சேக் என்பவர் மட்டும் விடுதலை செய்யப்பட்டுள்ளார். குற்றவாளிகளுக்கான தண்டனை வரும் 14-ந் தேதி அறிவிக்கப்பட உள்ளது.

மும்பையில் கடந்த 2006-ம் ஆண்டு ஜூலை 11-ந் தேதி வெவ்வேறு வழித்தடங்களில் சென்ற 7 மின்சார ரயில்களின் முதல் வகுப்பு பெட்டிகளில் சக்திவாய்ந்த குண்டுகள் அடுத்தடுத்து வெடித்தன. இதில் 188 பேர் பலியானார்கள். 829 பேர் படுகாயம் அடைந்தனர். படுகாயமடைந்தோரில் ஒருவர் கோமா நிலையில் இருந்த நிலையில் 9 ஆண்டுகளுக்குப் பின்னர் நேற்றுதான் உயிரிழந்தார்.

நாட்டையே உலுக்கிய இந்த பயங்கரவாத சம்பவத்தில் ஈடுபட்டதாக கமல் அகமது அன்சாரி (வயது 37), தன்வீர் அகமது அன்சாரி (37), முகமது பைசல் சேக் (36), எக்தேசாம் சித்திக் (30), முகமது மஜித் சபி (32), சேக் ஆலம் (41), முகமது சலீம் அன்சாரி (34), அப்துல் வஹீத் சேக் (34), முசாம்மில் சேக் (27), சொகைல் முகமது சேக் (43), சமீர் அகமது சேக் (36), நவீத் உசைன் கான் (30) மற்றும் ஆசிப் கான் (38) ஆகிய 13 பேரை போலீசார் கைது செய்து மும்பை சிறப்பு நீதிமன்றத்தில் வழக்கு தொடர்ந்தனர்.

இந்த வழக்கில் ஆசம் சிமா உள்ளிட்ட 14 பேர் தொடர்ந்து தலைமறைவாக இருக்கின்றனர். ஏறத்தாழ 9 ஆண்டுகள் மும்பை சிறப்பு நீதிமன்றத்தில் கோர்ட்டில் விசாரிக்கப்பட்டு வந்த இந்த வழக்கின் விசாரணை கடந்த ஆண்டு ஆகஸ்டில் முடிவுக்கு வந்தது.

அரசு தரப்பில் 8 ஐ.பி.எஸ். அதிகாரிகள், 5 ஐ.ஏ.எஸ். அதிகாரிகள் மற்றும் 18 மருத்துவர்கள் உட்பட 192 பேரிடம் வாக்குமூலம் பெறப்பட்டது.

இந்த வழக்கில் இன்று மும்பை சிறப்பு நீதிமன்றம் அளித்த தீர்ப்பில் அன்சாரி உள்ளிட்ட 12 பேர் குற்றவாளிகள் என அறிவிக்கப்பட்டுள்ளனர்.

அப்துல் வஹீத் சேக் என்பவர் மட்டும் விடுதலை செய்யப்பட்டுள்ளார். இவர்களுக்கான தண்டனை விவரம் வரும் 14-ந் தேதி அறிவிக்கப்படும் என்றும் மும்பை சிறப்பு நீதிமன்றம் தெரிவித்துள்ளது.

English summary

12 persons have been convicted in the 2006 train bombing case by the Special MCOCA court at Mumbai