பாபா ராம்தேவின் பதஞ்சலி நிறுவனத்தின் விளம்பரங்களுக்கு எதிராக 33 புகார்கள்... மத்திய அமைச்சர் தகவல்

டெல்லி: யோகா குரு பாபா ராம்தேவின் பதஞ்சலி நிறுவனத்தின் விளம்பரங்களுக்கு எதிராக 33 புகார்கள் வந்துள்ளது என லோக்சபாவில் தெரிவிக்கப்பட்டுள்ளது.

பன்னாட்டு நிறுவனங்களுக்கு சவால் விடும் வகையில் பதஞ்சலி நிறுவனமும் டூத்பேஸ்ட், தேன், நூடுல்ஸ், கூந்தல் தைலம், சமையல் எண்ணெய், சோப், உள்ளிட்ட பல்வேறு பொருட்களை இந்தியாவில் அறிமுகப்படுத்தியது.

பதஞ்சலி தயாரிப்புப் பொருள்கள் ரசாயனக் கலப்பு இல்லை. இயற்கையான உள்நாட்டுத் தயாரிப்பு என்ற பெயருடன் பத்திரிகை, தொலைக்காட்சிகளில் விளம்பரமும் அளிக்கப்பட்டது. இதனால் குறுகிய காலத்திலேயே அழகு சாதனப் பொருள்கள் சந்தையில் பதஞ்சலி தயாரிப்புகள் முக்கிய இடம் பெற்றன. இதனால் பன்னாட்டு நிறுவனங்களின் இந்தியச் சந்தை பாதிக்கப்பட்டது.

இதனிடையே, பதஞ்சலி நிறுவனத்தின் விளம்பரங்களில் போட்டி நிறுவனங்கள் குறித்து தவறாக சித்தரிக்கப்பட்டு தகவல் பரப்புவதாக இருப்பதாக புகார் எழுந்தது. முக்கியமாக, பதஞ்சலி தயாரிப்பு கூந்தல் தைலம் இயற்கையானது. மற்ற நிறுவனத்தின் தயாரிப்புகளை பயன்படுத்தினால் புற்றுநோய் ஏற்படும் அபாயம் உள்ளது. பதஞ்சலி ஆட்டா மாவு இந்தியாவின் "நம்பர் ஒன்' என்று மற்றொரு விளம்பரம் கூறுகிறது என தவறான தகவல்களை பரப்புவதாக போட்டி நிறுவனங்கள் புகார் அளித்தன.

இதை ஆய்வு செய்த இந்திய விளம்பரத் தர நிர்ணய கவுன்சில் பதஞ்சலி நிறுவனத்திற்கு கண்டனம் தெரிவித்திருந்தது.

இந்நிலையில், பதஞ்சலி நிறுவனத்தின் விளம்பரங்களுக்கு எதிராக 30-க்கும் மேற்பட்ட புகார்கள் வந்துள்ளன என நாடாளுமன்றத்தில் தெரிவிக்கப்பட்டுள்ளது. இது குறித்து மத்திய தகவல் ஒலிபரப்புத்துறை இணை அமைச்சர் ராஜ்யவர்தன் மக்களவையில் எழுத்துப்பூர்வமாக அளித்த தகவலில் கூறப்பட்டுள்ளதாவது: பதஞ்சலி நிறுவனத்தின் விளம்பரத்திற்கு எதிராக, கடந்த ஓராண்டில் மட்டும் 33 புகார்கள் வந்துள்ளன.

மத்திய நுகர்வோர் துறை அளித்த தகவலின்படி, பதஞ்சலியின் 17 விளம்பரங்கள் இந்திய விளம்பரத் தர நிர்ணய கவுன்சிலின் விதிமுறைகளை மீறும் வகையில் இருக்கிறது. பதஞ்சலி நிறுவனத்தின் பொருட்கள் மீது பதிவு செய்யப்பட்டுள்ள விளம்பரங்களும் ஆய்வு செய்யப்பட்டது. இதில் அந்நிறுவனத்தின் 6 பொருட்கள் இந்திய விளம்பரத் தர நிர்ணய கவுன்சிலின் கட்டுப்பாடுகளை மீறுவதாக உள்ளது என்று தெரிவிக்கப்பட்டுள்ளது.

English summary

Over 30 complaints against advertisements of yoga guru Ramdev's Patanjali Ayurved Ltd were received between April 2015 and July 2016, parliament was told on Monday.