மகாராஷ்டிரா, ஹரியானாவில் பாஜக முதல் முறையாக தனிப்பெரும் கட்சியாக உருவெடுக்கும்: கருத்து கணிப்புகள்

மும்பை/ சண்டிகர்: மகாராஷ்டிரா, ஹரியானா சட்டசபை தேர்தல்களில் தனிப்பெரும் கட்சியாக பாஜக உருவெடுக்கும் என்று தேர்தலுக்குப் பிந்தைய கருத்து கணிப்புகள் தெரிவிக்கின்றன. கடந்த 15 ஆண்டுகளாக மகாராஷ்டிரத்தில் கூட்டணி அமைத்து ஆட்சியமைத்திருந்த காங்கிரஸ், தேசியவாத காங்கிரஸ் கட்சிகள் படுதோல்வியடையும் என்றும், சிவசேனை 2-ஆவது மிகப்பெரும் கட்சியாக உருவெடுக்கும் என்கின்றன கருத்து கணிப்புகள்.

288 இடங்களைக் கொண்ட மகாராஷ்டிரா சட்டசபைக்கும் 90 இடங்களைக் கொண்ட ஹரியானா சட்டசபைக்கும் நேற்று வாக்குப் பதிவு நடைபெற்றது. ஹரியானாவில் முதல் முறையாக 76% வாக்குகளும் மகாராஷ்டிராவில் 64% வாக்குகளும் பதிவாகின.

இதன் பின்னர் ஏபிபி, சாணக்யா, இந்தியா டிவி, இந்தியா டுடே உள்ளிட்ட ஊடகங்கள் கருத்துக் கணிப்புகளை நடத்தி முடிவுகளை வெளியிட்டுள்ளன.

ஏபிபி - பாஜகவுக்கு 144

ஏபிபி நடத்திய தேர்தலுக்குப் பிந்தைய கருத்துக் கணிப்பில் மகாராஷ்டிராவில் பாஜக ஆட்சி அமைப்பதற்கு தேவையான 144 இடங்களைக் கைப்பற்றும் என்று தெரிவிக்கப்பட்டுள்ளது.

2வது பெரிய கட்சி சிவசேனா

அதேபோல் சிவசேனா 77 இடங்களுடன் 2 வது பெரிய கட்சியாக உருவெடுக்கும் என்கிறது ஏபிபி கருத்து கணிப்பு.

காங்கிரஸ்- தேசியவாத காங். படுதோல்வி

மகாராஷ்டிராவில் 15 ஆண்டுகாலம் ஆட்சி நடத்திய காங்கிரஸ் மற்றும் தேசியவாத காங்கிரஸ் படுதோல்வியை சந்திக்குமாம். காங்கிரஸுக்கு 30 இடங்களும் தேசியவாத காங்கிரஸுக்கு 29 இடங்கள்தான் கிடைக்குமாம். மகாராஷ்டிரா நவ நிர்மான் சேனா 3 இடங்களில்தான் வெல்லுமாம்.

இந்தியா டிவி

இந்தியா டிவி நடத்திய தேர்தலுக்குப் பிந்தைய கருத்துக் கணிப்பில் பாஜகவுக்கு 138, சிவசேனா- 59, காங்கிரஸ்- 41, தேசியவாத காங்கிரஸ் 30, மகாராஷ்டிரா நவநிர்மான் சேனா -12 இடங்களைக் கைப்பற்றும் என்கிறது.

இந்தியா டுடே

ஆனால் இந்தியா டுடே நடத்திய தேர்தலுக்குப் பிந்தைய கருத்துக் கணிப்பில் பாஜகவுக்கு 124 இடங்கள்தான் கிடைக்குமாம். சிவசேனாவுக்கு 71, காங்கிரஸ்- 35, தேசியவாத காங்கிரஸ்- 29, மகாராஷ்டிரா நவநிர்மான் சேனாவுக்கு 7 இடங்கள் கிடைக்குமாம்.

சாணக்யா

சாணக்யாவின் கருத்து கணிப்பில் பாஜகவுக்கு 151, சிவசேனாவுக்கு 71, காங்கிரஸ்- 27; தேசியவாத காங்கிரஸ்- 28, மகாராஷ்டிரா நவநிர்மான் சேனா 11 இடங்களைக் கைப்பற்றும் என்று தெரிவிக்கப்பட்டுள்ளது.

ஹரியானாவில்..

ஹரியானா மாநிலத்தில் ஏபிபி நடத்திய தேர்தலுக்குப் பிந்தைய கருத்துக் கணிப்பில் பாஜக 54, இந்திய தேசிய லோக் தள்- 22, காங்கிரஸ் 10 இடங்களைக் கைப்பற்றுமாம்.

இந்தியா டிவி

இந்தியா டிவி நடத்திய கருத்துக் கணிப்பில் பாஜக- 45, இந்திய தேசிய லோக் தள்-23, காங்கிரஸ் 15 இடங்களை கைப்பற்றும். மற்றொரு மாநில கட்சியான ஹெச்.ஜே.சி. 1 முதல் 7 இடங்களைக் கைப்பற்றக் கூடுமாம்.

English summary

At least three exit polls put the Bharatiya Janata Party (BJP) ahead but short of a clear majority in Maharashtra and Haryana on Wednesday, a ringing endorsement of the so-called 'Modi magic' that may have helped the party come into its own in the two politically crucial states.