ராஜ்யசபாவில் மீனவர்களுக்காக கூட்டாக குரல் கொடுத்த திமுக, அதிமுக எம்.பி.க்கள்

டெல்லி: இலங்கை கடற்படை கைது செய்த 18 மீனவர்களை விடுவிக்கக் கோரி திமுக, அதிமுக எம்.பி.க்கள் இன்று ராஜ்யசபாவில் மத்திய அரசை கேட்டுக் கொண்டார்கள்.

கடந்த 23ம் தேதி கடலில் மீன்பிடித்துக கொண்டிருந்த தமிழக மீனவர்கள் 14 பேரை இலங்கை கடற்படையினர் கைது செய்தனர். மேலும் கடந்த வெள்ளிக்கிழமை மேலும் 4 பேரை கைது செய்தனர். இந்நிலையில் இந்த விவகாரம் குறித்து திமுக மற்றும் அதிமுக எம்.பி.க்கள் இன்று ராஜ்யசபாவில் பேசினர்.

பூஜ்ய நேரத்தின்போது திமுக எம்.பி. திருச்சி சிவா பேசுகையில்,

தூக்கு தண்டனை விதிக்கப்பட்ட 5 தமிழக மீனவர்கள் விடுதலையாக உதவிய பிரதமர் மோடிக்கு நன்றி. ஆனால் அவர்களின் படகுகளை இலங்கை விடுவிக்கவில்லை. இலங்கை சிறைகளில் 24 மீனவர்கள் வாடி வருகிறார்கள். இலங்கை கடற்படையினர் தமிழக மீனவர்களின் 78 படகுகளை தங்கள் வசம் வைத்துள்ளனர். மீனவர்களையும், அவர்களின் படகுகளையும் விடுவிக்க மத்திய அரசு நடவடிக்கை எடுக்க வேண்டும். கச்சத்தீவை மீட்டால் தான் இந்த பிரச்சனைக்கு நிரந்தர தீர்வு ஏற்படும்.

படகுகளை விடுவிக்குமாறு தான் இலங்கை அதிபரை கேட்டுக் கொண்டும் அவர் விடுவிக்கவில்லை என பாஜக தலைவர் ஒருவர் தெரிவித்துள்ளார். இது போன்று பொறுப்பிலாமல் பேசுவதை ஆளுங்கட்சி நிறுத்திக் கொள்ள வேண்டும் என்றார்.

அதிமுக எம்.பி. எஸ். முத்துக்கருப்பன் பேசுகையில்,

இலங்கை கடற்படை தமிழக மீனவர்களை கைது செய்யும் முன்பு அவர்கள் மீது கற்களை எறிந்து தாக்கியுள்ளது. மீனவர்களில் 3 பேர் 18 வயதுக்குட்பட்டவர்கள். மத்திய அரசு தான் மீனவர்களை விடுவிக்கவும், இலங்கை கடற்படையின் அட்டூழியத்தை தடுத்து நிறுத்தவும் நடவடிக்கை எடுக்க வேண்டும் என்றார்.

முன்னாள் பிரதமர் ராஜீவ் காந்தியை கொல்ல உத்தரவிட்ட விடுதலைப்புலிகள் இயக்க தலைவர் பிரபாகரனின் பிறந்தநாளை தமிழக தலைவர் ஒருவர் கேக் வெட்டி கொண்டாடியுள்ளார். இது வன்மையாக கண்டிக்கப்பட வேண்டியது என்று தொழில் அதிபரும், நியமன எம்.பி.யுமான அசோக் எஸ். கங்குலி தெரிவித்தார்.

English summary

In a rare display of unanimity among Tamil parties, DMK and AIADMK on Monday pressed the Centre to secure release of 18 fishermen recently arrested by Sri Lanka, even as they thanked Prime Minister Narendra Modi for securing release of five others on death row.