தினமும் 350 கி.மீ பயணித்து அலுவலகம் வரும் கர்நாடகா அமைச்சர் ரேவண்ணா.. குமாரசாமியின் அண்ணன்தான்

பெங்களூர்: கர்நாடக அமைச்சர் எச்.டி.ரேவண்ணா, தினமும் 300 கிலோமீட்டர் தூரத்திற்கு பயணித்து, பெங்களூரிலுள்ள அலுவலகம் வந்து செல்கிறார்.

முன்னாள் பிரதமரும், மஜத தேசிய தலைவருமான எச்.டி.தேவகவுடாவின் மூத்த மகன்தான் இந்த ரேவண்ணா. இவரது தம்பியும், மஜத மாநில தலைவருமான எச்.டி.குமாரசாமிதான் இப்போது, கர்நாடக முதல்வராக உள்ளார்.

ரேவண்ணாவிற்கு பவர்புல்லான பொதுப் பணித்துறை இலாகா கொடுக்கப்பட்டுள்ளது.

தினமும் நீண்ட பயணம்

இருப்பினும், ரேவண்ணா தினமும், தனது தொகுதியான ஹாசன் மாவட்டம் ஹொலேநரசிபுராவில் இருந்து பெங்களூருக்கு காரில் வந்து மீண்டும், அங்கு திரும்புகிறார். மறுநாள் மீண்டும் பெங்களூர் வருகிறார். பெங்களூர்-ஹொலேநரசிபுரா நடுவே அப் அன்டு டவுண், அதாவது போக்குவரத்து தூரம் என்பது சுமார் 350 கி.மீ. இவ்வளவு தூரத்தை தினமும் அவர் தினமும் பயணித்துக்கொண்டுள்ளார்.

ஜோசியர் சொல்படி

ரேவண்ணா ஜாதகம், நல்ல நேரம், வாஸ்து போன்றவற்றில் மிக, மிக, மிக நம்பிக்கை உள்ளவர். வீட்டை விட்டு வெளியே போக வேண்டும் என்றாலும் நல்ல நேரம் பார்த்துதான் கிளம்புவார். தேவகவுடாவும் அப்படித்தான் என்றபோதிலும், ரேவண்ணா அளவுக்கு கிடையாது. இருப்பினும் கொஞ்சமே சீட் வென்றாலும் தங்கள் குடும்பத்திற்கு பிரதமர் பதவி, முதல்வர் பதவி, நல்ல அமைச்சர் பதவிகள் தேடி வர காரணம் பூஜை, ஜோதிடங்கள்தான் என்பதில் ரேவண்ணாவுக்கு அசைக்க முடியாத நம்பிக்கை உண்டு.

வெளியான செய்திகள்

சட்டசபையில் பேச வேண்டும் என்றாலும் கூட ராகு காலமாக இருந்தால் ரேவண்ணா பேசமாட்டார். அந்த நேரத்தில் நைசாக வெளியே சென்றுவிடுவார். எனவே, ரேவண்ணா ஜோதிடர் அறிவுரைப்படிதான் ஹொலேநரசிபுராவில் இருந்து தினமும் பெங்களூர் வந்து செல்கிறார் என்று கன்னட ஊடகங்களில் செய்திகள் வெளியாகியுள்ளன.

வீடு கிடைக்கவில்லையாம்

இதுகுறித்து ரேவண்ணாவிடம் கேட்டபோது, ஜோதிடர் கூறியதற்காகவெல்லாம் இல்லப்பா.. அமைச்சருக்கான வீடு பெங்களூரில் எனக்கு இன்னும் ஒதுக்கப்படவில்லை. அதனால்தான் ஹொலேநரசிபுராவில் இருந்து இங்கே வருகிறேன் என்கிறார். ஆனால், பெங்களூரின் பத்மநாபநகரில் தேவகவுடா வீடு உள்ளது. ஜேபிநகரில் சகோதரர் குமாரசாமி வீடு உள்ளது. எனவே அரசு வீடு கிடைக்கவில்லை என்பதற்காக தினமும் 350 கி.மீ பயணிப்பதாக ரேவண்ணா கூறுவதை யாரும் நம்ப தயாராக இல்லை.

English summary

Karnataka Minister HD Revanna, the son of former PM HD Deve Gowda, made headlines in local papers for a reason which took everyone by surprise in the state. Little did everyone knows that since he became a minister in the Congress-JDS coalition government is travelling more than 350 kms each day from Holenarasipura (his constituency) to Vidhan Souda in Bengaluru.