மணிப்பூரில் கூட்டணி கட்சிகளை கழற்றிவிட்ட பாஜக..60 இடங்களிலும் தனித்து போட்டி..வேட்பாளர்கள் அறிவிப்பு
இம்பால்: மணிப்பூர் சட்டசபை தேர்தலில் பாஜக கூட்டணி கட்சிகளின் தயவு இன்றி தனித்து போட்டியிட முடிவு செய்துள்ளது. இதற்காக 60 வேட்பாளர்கள் கொண்ட பட்டியலை பாஜக வெளியிட்டு இருக்கிறது.
மணிப்பூரில் கடந்த 2017 சட்டசபை தேர்தலில் பாஜக கூட்டணி கட்சிகளின் தயவோடு ஆட்சி அமைத்தது. அங்கு இருக்கும் நாகா பீப்பிள் ப்ரோண்ட், நேஷனல் பீப்பிள் பார்ட்டி ஆகிய கட்சிகளின் உதவியோடு பாஜக அங்கு ஆட்சி அமைத்தது.
மணிப்பூரில் உள்ள 60 இடங்களில் 31 இடங்களில் வென்றால் ஆட்சி அமைக்க முடியும். கடந்த சட்டசபை தேர்தலில் மணிப்பூரில் பாஜக 31 இடங்களை வென்றது.
இருந்தாலும் சரியாக 31 இடங்களை வைத்து ஆட்சி செய்வது ரிஸ்க் என்பதால் நாகா பீப்பிள் ப்ரோண்ட், நேஷனல் பீப்பிள் பார்ட்டி ஆகிய கட்சிகளுடன் பாஜக கூட்டணி வைத்தது. இந்த நிலையில்தான் இந்த முறை பாஜக தனித்து போட்டியிட முடிவு செய்துள்ளது.
நாகா பீப்பிள் ப்ரோண்ட், நேஷனல் பீப்பிள் பார்ட்டி ஆகிய கட்சிகள் கடந்த தேர்தலில் தலா 4 மற்றும் 3 இடங்களை பெற்றது. காங்கிரஸ் 12 இடங்களை தனியாக பெற்றது.
இந்த முறை பாஜக அங்கு தனியாக நிற்கிறது. மாறாக காங்கிரஸ் 6 கட்சிகளின் கூட்டணியை உருவாக்கி உள்ளது. இடதுசாரிகள் கட்சியுடன் காங்கிரஸ் கூட்டணி வைத்துள்ளது. சிபிஐ, சிபிஎம், ரெவலூஷனிரி சோஷலிஸ்ட் பார்ட்டி, பார்வேர்ட் பிளாக், மத சார்பாற்ற ஜனதா தளம் ஆகிய கட்சிகளுடன் காங்கிரஸ் இணைந்து தேர்தலை சந்திக்க உள்ளது.
பாஜக 60 இடங்களிலும் தனியாக வேட்பாளர்களை நிறுத்துகிறது. இதற்கான 60 பேர் கொண்ட பட்டியலை பாஜக இன்று வெளியிட்டது. அதன்படி முதல்வர் என் பைரன் சிங் ஹெய்ன்காங் தொகுதியில் போட்டியிடுவார் என்று அறிவிக்கப்பட்டுள்ளது. மணிப்பூரில் சட்டசபை தேர்தல் பிப்ரவரி 27 மற்றும் மார்ச் 3 தேதிகள் இரண்டு கட்டமாக நடக்கிறது. தேர்தல் முடிவுகள் மார்ச் 3ம் தேதி வெளியாகும்.
வேட்பாளர் பட்டியலை வெளியிட்ட மத்திய அமைச்சர் புபேந்திர யாதவ் தனது பேட்டியில், பாஜக கண்டிப்பாக இந்த முறை பெரும்பான்மை பெறும். 40 இடங்களுக்கும் அதிகமாக வென்று நாங்கள் ஆட்சியை பிடிப்போம். மணிப்பூரை மிகவும் அமைதியாக, நன்றாக பாஜக ஆண்டு இருக்கிறது. மணிப்பூரில் பாஜக பல வளர்ச்சி திட்டங்களை கொண்டு வந்துள்ளது. அதனால் இந்த முறை நாங்கள்தான் வெற்றிபெறுவோம் என்று தெரிவித்துள்ளார்.
Click it and Unblock the Notifications
Sign in with Google