பொங்கலுக்கு விடுமுறை இல்லை... பாஜக அரசின் அதிரடியால் அதிர்ச்சியில் மத்திய அரசு ஊழியர்கள்!

நாடு முழுவதும் பொங்கல் விடுமுறை கட்டாயம் அல்ல என மத்திய அரசு இன்று அறிவித்துள்ளது. இதனால் தமிழகத்தில் பணியாற்றி வரும் மத்திய அரசு ஊழியர்கள் அதிர்ச்சி அடைந்துள்ளனர்.

டெல்லி: நாடு முழுவதும் பொங்கல் விடுமுறை கட்டாயம் அல்ல என மத்திய அரசு இன்று அறிவித்துள்ளது. மேலும் கட்டாய விடுமுறை தினத்திலிருந்து பொங்கல் விடுமுறை நீக்கப்பட்டுள்ளது. இதனால் தமிழகத்தில் உள்ள மத்திய அரசு ஊழியர்கள் அதிர்ச்சி அடைந்துள்ளனர்.

ஆண்டு முழுவதும் விவசாயப் பணிகளை மேற்கொண்டு வரும் விவசாயிகள் சூரியன், மழை, பனி உள்ளிட்ட இயற்கை சக்திகளுக்கும், கடவுளுக்கும் நன்றி செலுத்தும் பண்டிகையாக பொங்கலை முன்னோர்கள் கொண்டாடினர். பிற்காலத்தில் விவசாயிகள் மட்டுமின்றி அனைத்து தரப்பு மக்களும் பொங்கல் பண்டிகையை கொண்டாட தொடங்கினர்.

ஒவ்வொரு ஆண்டும் ஜனவரி 14 ம் தேதி பொங்கல் திருநாள் கொண்டாடப்பட்டு வருகிறது. இந்நிலையில் நாடு முழுவதும் பொங்கல் பண்டிகைக்கு விடுமுறை கட்டாயம் இல்லை என மத்திய அரசு அறிவித்துள்ளது. மேலும், விருப்ப விடுமுறையாக அன்றைய தினத்தை எடுத்துக்கொள்ளலாம் எனவும் தெரிவிக்கப்பட்டுள்ளது.

தமிழகத்தின் முக்கியமான பண்டிகை பொங்கல். தமிழர்கள் பண்டிகை இது. இப்பண்டிகை கட்டாய விடுமுறை தினத்திலிருந்து மத்திய அரசு நீக்கியுள்ளதால் தமிழகத்தில், மத்திய அரசு ஊழியர்கள் பொங்கல் பண்டிகையை கொண்டாட முடியாத நிலைக்கு தள்ளப் பட்டுள்ளனர். ஆனால் மலையாள மக்கள் கொண்டாடும் ஓணம் பண்டிகைக்கு பொது விடுமுறை விடப்படுவது குறிப்பிடத்தக்கது.

தமிழர் விரோத மத்திய பாஜக அரசின் இந்த அறிவிப்பால் தமிழக மத்திய அரசு ஊழியர்கள் முழுமையாக விடுமுறையை கொண்டாட முடியாத நிலைக்குத் தள்ளப்பட்டுள்ளனர்.

English summary

The centre's announcement of cancellation of Pongal holiday from the list of declared holiday across the nation has shocked the central govt staffs in Tamil Nadu.