பாகிஸ்தான் ராணுவ தளபதி பேச்சு.. அமெரிக்க துணை அதிபர் வருகை.. காஷ்மீர் தாக்குதல்! கனெக்ஷனை பாருங்க

ஸ்ரீநகர்: காஷ்மீரின் பஹல்காம் பகுதியில் பயங்கரவாதிகள் நடத்திய கொடூர தாக்குதலில் 20க்கும் மேற்பட்ட பொதுமக்கள் கொல்லப்பட்டுள்ளனர். 26/11 மும்பை தாக்குதலுக்குப் பிறகு இந்தியாவில் பொதுமக்கள் மீது நடந்த மிகப்பெரிய தாக்குதல் இதுவாகும்.

இந்த துயர சம்பவம் அமெரிக்க துணை அதிபர் ஜே.டி. வான்ஸ் இந்தியா வந்துள்ள நிலையிலும், பிரதமர் நரேந்திர மோடி சவுதி அரேபியாவுக்குப் பயணம் செய்த நிலையிலும் நடந்துள்ளது. இது இந்தியாவின் உள்நாட்டுப் பாதுகாப்புக்கு ஒரு முக்கிய சவாலாகப் பார்க்கப்படுகிறது. வெளிநாட்டு முக்கிய தலைவர்கள் இந்தியாவில் இருக்கும்போது தாக்குதல் நடத்தி அதிக கவனத்தை ஈர்க்க பயங்கரவாதிகள் முயல்வது இது முதல் முறையல்ல.

பழைய சம்பவங்களை நினைவுபடுத்தும் தாக்குதல்

கடந்த காலங்களில், 2000 ஆம் ஆண்டு அமெரிக்க அதிபர் கிளிண்டன் வருவதற்கு முன்பு சித்தசிங்போரா கிராமத்தில் 36 சீக்கியர்கள் கொல்லப்பட்டதும், 2002 ஆம் ஆண்டு அமெரிக்க அதிகாரி ஒருவர் வருகையின்போது காலுச்சாக் பகுதியில் நடந்த தாக்குதலும் இதுபோன்ற சம்பவங்களே. இந்த பஹல்காம் தாக்குதல், பழைய பயங்கரவாத யுக்திகளை நினைவுபடுத்துவதாக பாதுகாப்பு அதிகாரிகள் கூறுகின்றனர்.

2019ல் ஜம்மு காஷ்மீரின் சிறப்பு அந்தஸ்து ரத்து செய்யப்பட்ட பிறகு, அங்கு இயல்பு நிலை திரும்பி வருவதாகவும், சுற்றுலா அதிகரித்திருப்பதாகவும் கூறப்பட்டது. இந்த தாக்குதல் அந்த நிலையை பாதித்துள்ளது.

உலக நாடுகளின் இரங்கல்

இந்த தாக்குதலுக்கு அமெரிக்க துணை அதிபர் ஜே.டி. வான்ஸ் இரங்கல் தெரிவித்துள்ளார். அமெரிக்க அதிபர் டிரம்ப், "பயங்கரவாதத்திற்கு எதிராக அமெரிக்கா இந்தியாவுடன் உறுதியாக நிற்கிறது. உயிரிழந்தவர்களின் குடும்பங்களுக்கு ஆழ்ந்த இரங்கல்கள்" என்று கூறியுள்ளார்.

பாகிஸ்தான் தளபதியின் பேச்சுக்குப் பிறகு நிகழ்வு

பாகிஸ்தான் ராணுவ தளபதி அசிம் முனிர் சமீபத்தில் காஷ்மீர் பாகிஸ்தானுக்கு "நாடி நரம்பு போன்றது" என்று பேசியிருந்தார். இதற்கு இந்திய வெளியுறவு அமைச்சகம், காஷ்மீர் இந்தியாவின் ஒருங்கிணைந்த பகுதி என்றும், பாகிஸ்தான் சட்டவிரோதமாக ஆக்கிரமித்துள்ள பகுதிகளை காலி செய்ய வேண்டும் என்றும் கடுமையான பதிலடி கொடுத்திருந்தது. பாகிஸ்தான் தளபதியின் இந்த பேச்சுக்குப் பிறகு இந்த தாக்குதல் நடந்துள்ளது கவனிக்கத்தக்கது.

பிரதமரின் சவுதி பயணம்

பிரதமர் மோடி சவுதி அரேபியாவில் இருக்கும்போது, இந்த தாக்குதல் குறித்து சவுதி பட்டத்து இளவரசருடன் பேசக்கூடும் என எதிர்பார்க்கப்பட்டது. பயங்கரவாத எதிர்ப்பு போன்ற பாதுகாப்பு விஷயங்களில் இந்தியாவும் சவுதி அரேபியாவும் ஒத்துழைப்புடன் செயல்படுகின்றன.