அடுத்த பஞ்சாயத்து... மதச்சார்பற்ற என்ற வார்த்தையை அரசியலமைப்பில் இருந்து நீக்க சிவசேனா வலியுறுத்தல்!

மும்பை: மதச்சார்பற்ற என்ற வார்த்தையை இந்திய அரசியல் அமைப்பில் இருந்து நீக்க வேண்டும் என்று சிவசேனா புதிய பஞ்சாயத்தை கிளப்பியுள்ளது.

குடியரசு தினத்தை முன்னிட்டு, மத்திய தகவல் மற்றும் ஒலிபரப்பு துறை அமைச்சகம் வெளியிட்ட விளம்பரத்தில் இடம்பெற்றுள்ள அரசியலமைப்பின் முன்னுரைப் பக்கப் படம் சர்ச்சையை ஏற்படுத்தியுள்ளது. அரசியலமைப்பின் முன்னுரையில் உள்ள மதச்சார்பின்மை, சோஷலிஸம் ஆகிய இரு வார்த்தைகள் விளம்பரத்தில் இடம்பெறாமல் இருந்ததே இச்சர்ச்சைக்கு காரணம்.

விளம்பரம் தொடர்பாக அரசியல் கட்சிகள் இடையே வார்த்தை போர் தொடங்கியுள்ளது. இதற்கிடையே சிவசேனா கட்சியின் எம்.பி. சஞ்சய் ராவுத் கூறுகையில், மத்திய அரசின் குடியரசு தினவிழா விளம்பரத்தில் வார்த்தைகள் (மதச்சார்பின்மை மற்றும் சோஷலிஸம்) விலக்கப்பட்டதை நாங்கள் வரவேற்கிறோம். கவனக்குறைவு காரணமாக இது நடைபெற்று இருக்கலாம்.

இது இந்திய மக்களின் உணர்வுகளை கவுரவிப்பது போல் உள்ளது. இம்முறை தவறுதலாக இந்த வார்த்தைகள் நீக்கப்பட்டு இருந்தாலும், இந்தவார்த்தைகள் அரசியலமைப்பில் இருந்து நிரந்தரமாக நீக்கப்பட வேண்டும்.

மதத்தின் அடிப்படையிலே இந்தியா பிரிக்கப்பட்டுள்ளது என்று பால் தாக்கரே மற்றும் அவருக்கு முன்பாக வீர் சாவர்கர் ஆகியோர் தெரிவித்துள்ளனர். பாகிஸ்தான் இஸ்லாமியர்களுக்காக உருவாக்கப்பட்டது. இதனால் மீதம் உள்ளவை அனைத்தும் இந்துக்களின் தேசமே. சிறுபான்மை சமூகம் ஒரு அரசியல் வளர்ச்சிக்காகவே பயன்படுத்தப்படுகிறது, இப்படியிருக்கையில் இந்துக்கள் தொடர்ந்து அவமதிக்கப்பட்டு வருகின்றனர் என்றார்.

விளம்பரத்தில் இரு வார்த்தைகள் இடம்பெறாததற்கு காங்கிரஸ் கட்சியின் தலைவர் மணிஷ் திவாரி நேற்று கடும் கண்டனம் தெரிவித்தார். ஆனால் தற்போதைய தகவல் மற்றும் ஒலிபரப்புத் துறை அமைச்சர், விளம்பரத்தில் இடம்பெற்றுள்ள படம் கடந்த ஆண்டு ஏப்ரல் மாதம் காங்கிரஸ் தலைமையிலான ஐக்கிய முற்போக்கு கூட்டணி அரசால் பயன்படுத்தப்பட்டது என்று விளக்கம் அளித்தார்.

English summary

Shiv Sena - a key constituent in the ruling National Democratic Alliance (NDA) - on Wednesday sought to retain the "mistake" of omission of two vital words - "secular" and "socialist" - from the preamble to the Indian Constitution.