குப் குப்.. "தம்" அடிக்கும் பெண் யானை.. வைரலாக பரவும் வீடியோ

காட்டு யானை ஒன்று புகை விடும் வீடியோ இணையத்தில் வைரலாகியுள்ளது.

பெங்களூரு: கர்நாடக வனப்பகுதியில் யானை ஒன்று கரித்துண்டுகளை சாப்பிட்டு விட்டு, புகையை உமிழும் வீடியோ இணையத்தில் வைரலாகியுள்ளது.

கர்நாடக மாநிலம் நாகர்ஹோல் காட்டில் கடந்த 2016ம் ஆண்டு ஏப்ரல் மாதம் புலிகளின் தடத்தை ஆய்வு செய்யும் பணியில் இந்திய வனவிலங்கு பாதுகாப்பு அமைப்பினர் ஈடுபட்டிருந்தனர். அப்போது, பெண் யானை ஒன்று மரத்தின் கீழ் நின்று புகையை உமிழ்ந்து கொண்டிருக்கும் விசித்திரக் காட்சியை அவர்கள் கண்டனர்.

அந்தப் பெண் யானை நின்று கொண்டிருந்த இடத்தின் அருகில் இருந்த மரம் தீப்பிடித்து அணைந்திருந்தது. இதனால் அம்மரம் அருகே மரக் கரித்துண்டுகள் சிதறிக் கிடந்தன. அந்தத் துண்டுகளை துப்பிக்கையால் எடுத்து சாப்பிட்டுக் கொண்டு தான், அந்த யானை புகையை உமிழ்ந்து கொண்டிருந்தது.

இந்தக் காட்சிகளை ஆய்வில் ஈடுபட்டிருந்த அந்த அமைப்பின் உதவி இயக்குநர் வினய் குமார் தனது செல்போனில் பதிவு செய்தார். இரண்டாண்டுகளுக்குப் பின் கடந்த வாரம் இந்த வீடியோவை வினய் தனது சமூக வலைதளப் பக்கத்தில் பதிவேற்றம் செய்தார்.

முதலில் யானை புகைப் பிடிக்கிறது என அதனைப் பார்த்தவர்கள் ஜாலியாக எடுத்துக் கொண்டனர். ஆனால், இந்த வீடியோவைப் பார்த்த காட்டுயானை குறித்த ஆராய்ச்சியாளர்களுக்கோ பயங்கரக் குழப்பம் ஏற்பட்டுள்ளது. எதற்காக யானை கரித்துண்டுகளை சாப்பிட்டது என்பது இன்னும் அவர்களுக்கு கேள்விக்குறியாக உள்ளது.

கரித்துண்டுகளில் நச்சுத் தன்மை உள்ள போதும், விலங்குகளின் செரிமானத்தை அதிகரிக்கும் திறனும் அதில் உள்ளது என்கிறார்கள் ஆராய்ச்சியாளர்கள். எனவே, அதில் இருக்கும் ஒரு சில மருத்துவத் தன்மைகளால் ஈர்க்கப்பட்டு யானை அவற்றை சாப்பிட்டிருக்கலாம் என்பது அவர்களது கணிப்பு. தொடர்ந்து இது குறித்து அவர்கள் ஆய்வு மேற்கொண்டு வருகின்றனர்.

அதோடு, இன்றும் கிராமப்புறங்களில் பல் மற்றும் ஈறு தொடர்பான பிரச்சினைகளுக்கு கரித்துண்டை நிவாரணியாக பயன்படுத்துகின்றனர். அதன் அடிப்படையில் வீடியோவில் உள்ள காட்டு யானையும், தன் பல் அல்லது ஈறு தொடர்பான பிரச்சினைக்கு மருந்தாகக்கூட இந்தக் கரித்துண்டுகளை சாப்பிட்டிருக்கலாம் எனக் கூறப்படுகிறது.

எது எப்படியோ, ஆராய்ச்சியாளர்களின் இந்தக் கருத்தால், 48 விநாடிகள் உள்ள யானை புகைப்பிடிக்கும் வீடியோ காட்டுத்தீ போல இணையத்தில் வைரலாகப் பரவி வருகிறது.

English summary

A bizarre video of a wild elephant blowing out what appears to be plumes of smoke in Karnataka’s Nagarhole forest has left wildlife lovers baffled.