வாட்சை தொலைத்த மேக்ரான்! டிரம்புக்கு கிடைத்த டுகாட்டி பைக்! G7 மாநாட்டில் நடந்த சுவாரசிய சம்பவங்கள்

Updated: Wednesday, June 17, 2026, 10:18 [IST]

Subscribe to Oneindia Tamil

பாரிஸ்: பிரான்ஸில் நடைபெற்ற ஜி7 உச்சி மாநாட்டில் பங்கேற்றிருந்த அந்நாட்டு அதிபர் இம்மானுவேல் மேக்ரான் தனது விலை உயர்ந்த வாட்சை தொலைத்திருக்கிறார். அதேபோல, டிரம்புக்கு டுகாட்டி பைக் ஒன்று பரிசளிக்கப்பட்டிருக்கிறது. இப்படி இந்த மாநாட்டில் பல சுவாரசியமான சம்பவங்கள் நடந்திருக்கின்றன.

ஆண்டுக்கு ஒருமுறை ஜி7 உச்சி மாநாடு நடப்பது வழக்கம். அந்த வகையில் இந்த ஆண்டு பிரான்ஸில் இந்த மாநாடு நடைபெற்றது. இதில் அமெரிக்கா, இத்தாலி, ஜப்பான், கனடா, ஜெர்மனி, பிரான்ஸ் மற்றும் பிரிட்டன் ஆகிய உறுப்பு நாடுகளின் தலைவர்களும், இந்தியா போன்ற நாடுகளிலிருந்து சிறப்பு அழைப்பாளர்களும் பங்கேற்றிருந்தனர்.

ஜி7 மாநாட்டில் சுவாரசியம்

உலகமே உற்று நோக்கிக்கொண்டிருந்த இந்த மாநாட்டில் பல சுவாரசிய சம்பவங்கள் நடந்திருக்கின்றன. இதில் முதல் சம்பவம் மேக்ரான் தனது வாட்சை தொலைத்ததுதான். பிரான்ஸ் நிறுவனத்தை சேர்ந்த பெல் & ரோஸ் நிறுவனம்தான் இந்த வாட்சை தயாரித்திருந்தது. போர் விமானிகள், விண்வெளி வீரர்கள், ஆழ்கடல் நீந்துபவர்கள், வெடிகுண்டு நிபுணர்கள் போன்றோர் பயன்படுத்தும் வகையில் வடிவமைக்கப்பட்டிருந்தது என்பதுதான் இந்த வாட்சின் சிறப்பம்சம்.

வாட்சை தொலைத்த மேக்ரான்

இதன் விலை ரூ.4-5 லட்சம் வரும். இதில் பேட்டரி கிடையாது. கைகளின் அசைவுகளை வைத்தே இயங்கும் வகையில் வடிவமைக்கப்பட்டிருக்கிறது. இப்பேர்ப்பட்ட வாட்சைதான் மேக்ரான் தொலைத்துவிட்டார். தகவல் தெரிந்ததும் பதறிய பாதுகாப்பு அதிகாரிகள், உணவருந்திய அறை முழுவதும் இன்ச் பை இன்ச்சாக சோதனை செய்தனர். இதனையடுத்து சோபா இடுக்கில் இருந்து வாட்ச் மீட்கப்பட்டது.

மெலோனியின் புகைப்பழக்கம்

இரண்டாவது சம்பவம், இத்தாலி அதிபர் மெலோனி புகைப்பிடிப்பதை நிறுத்தியதுதான். மெலோனி செயின் ஸ்மோக்கர் என்பது அரசியல் வட்டாரத்தில் அனைவருக்கும் தெரிந்ததுதான். இப்படி இருக்கையில், இவர் மாநாட்டு பிஸியில் கடந்த 4 நாட்களாக சிகிரெட்டை தொடவில்லை என்று கூறியிருக்கிறார். டிரம்ப் மற்றும் மேக்ரானுடன் பேசிக்கொண்டிருந்தபோது இதை தெரிவித்திருக்கிறார். ஒரு வழியாக நான் புகைப்பிடிப்பதை விட்டுவிட்டேன் என்று அவர் சொன்னது, மைக் மூலம் வெளி உலகத்திற்கு தெரிய வந்திருக்கிறது. இதனால் பலரும் அவருக்கு வாழ்த்துகளை தெரிவித்து வருகின்றனர்.

டுகாட்டி பைக்

மூன்றாவது சம்பவம், டிரம்புக்கு கிடைத்த டுகாட்டி பைக்தான். டுகாட்டி ஓட்டுற வயசா இது? என்று உங்களுக்கு கேள்வி எழலாம். ஆனால், பாருங்களேன் அவருக்கு டுகாட்டி கொடுக்க வேண்டும் என்று தோன்றியிருக்கிறதே! அவர்களை சொல்ல வேண்டும்.

இத்தாலியின் புகழ்பெற்ற டுகாட்டி நிறுவனம், பிரத்யேக சூப்பர் ரேசிங் பைக்கை டிரம்புக்கு பரிசளித்துள்ளது. பைக்கை வாங்கிக்கொண்ட டிரம்ப், “இதை ஓட்டுற வயசு எனக்கு இல்ல.. என் பேரன், பேத்திகளுக்கு தரேன்” என்று சிரித்துக்கொண்டே கூறியிருக்கிறார். இது தொடர்பான வீடியோ சோஷியல் மீடியாக்களில் டிரெண்டிங்கில் இருக்கிறது.

இந்த மாநாட்டில் மோடியும், மெலோனியும் சந்தித்து பேச.. மெலோடி என்கிற ஹாஷ்டேக் டிரெண்டானது. இப்படியாக ஜி7 மாநாட்டில் பல சுவாரசியமான சம்பவங்கள் நடந்திருக்கின்றன.