இஸ்லாமியர்கள் அல்லாத பிற மதப் பத்திரிக்கைகள் ‘அல்லா’ என்ற சொல்லை பயன்படுத்த தடை

கோலாலம்பூர்: மலேசியாவில் இஸ்லாமியர்கள் அல்லாத பிற மதப் பத்திரிக்கைகள் ‘அல்லா' என்றச் சொல்லைப் பயன் படுத்த தடை விதித்து மலேசிய நீதிமன்றம் உத்தரவிட்டுள்ளது.

கடந்த 2009ம் ஆண்டு மலேசிய கீழ்நீதிமன்றம் ஹெரால்ட் என்ற கிறிஸ்தவப் பத்திரிக்கைக்கு அல்லா என்ற வார்த்தையைப் பயன் படுத்த அனுமதி வழங்கி தீர்ப்பளித்தது.

இந்நிலையில் மீண்டும் இதே பிரச்சினை குறித்து தொடரப்பட்ட வழக்கில், நேற்று மலேசிய நீதிமன்றத்தின் 3 நீதிபதிகள் அடங்கிய குழு, இஸ்லாமியர்கள் அல்லாத பிற மதப் பத்திரிக்கைகள் ‘அல்லா' என்ற சொல்லைப் பயன் படுத்தக் கூடாது என பரபரப்புத் தீர்ப்பளித்துள்ளனர்.

மேலும், இத்தீர்ப்பில் அவர்கள் தெரிவித்துள்ள கருத்தாவது, ‘கிறிஸ்துவ மத நம்பிக்கையின் ஒரு பகுதியாக இந்த அல்லா என்ற வார்த்தை கட்டாயம் இல்லை என்பதாலும், கடவுளைக் குறிக்க அல்லா என்ற வார்த்தை முஸ்லிம்களுக்கு மட்டுமே உரியது என்பதால், மற்றவர்கள் குறிப்பிடுவதில் குழப்பம் ஏற்படும் என்பதாலும் இந்த முடிவை எடுத்துள்ளதாக நீதிபதிகள் குறிப்பிட்டுள்ளனர். இதே கருத்தைத்தான் மலேசிய அரசும் நீதிமன்றத்தில் எடுத்துரைத்து வாதிட்டது. மேலும், 2008ல் பொதுமக்களின் மன நிலைக்கு ஏற்ப, பத்திரிகையில் இந்த வார்த்தையை பயன்படுத்த அனுமதித்த உள்துறை அமைச்சகத்தின் முடிவை தடை செய்வதாகவும்' கூறியுள்ளது.

மலேசியாவில் உள்ள கத்தோலிக்க மதத்தின் செய்தித்தாள்கள் சார்பில் வழக்குரைஞர்கள் தாக்கல் செய்த மனுவில், மலேசியாவிலும், மலேசியாவை அடுத்த புருனே தீவிலும் நூற்றாண்டுகளாக மலாய் பேசும் கிறிஸ்துவர்கள் அல்லா என்ற வார்த்தையை பயன்படுத்தி வருகின்றனர் என தங்கள் பக்க நியாயத்தை எடுத்துரைத்தார்கள்.

மேலும், மத உணர்வுக்கு எதிரான இந்த உத்தரவுக்கு எதிர்ப்பு தெரிவித்து மலேசியாவின் உச்ச நீதிமன்றத்தை அணுகுவோம் என அவர்கள் தெரிவித்துள்ளனர்.

தீர்ப்பு வழங்கப்பட்ட போது, 200க்கும் அதிகமான முஸ்லிம்கள் நாட்டின் தலைமையிடமான புத்ராஜெயாவுக்கு வெளியே கூடியிருந்து இத்தீர்ப்புக்கு வரவேற்பு அளிக்கும் வகையில், "அல்லாஹு அக்பர்" என்று கோஷமிட்டது குறிப்பிடத்தக்கது.

நீதிமன்றத்தின் இந்த உத்தரவு, மலேசிய சிறுபான்மை மக்களின் உரிமை விவகாரத்தில் தலையிடும் முடிவு என்ற அளவில் மத ரீதியான பதற்றம் உருவாக வழி வகுக்கும் என்று அஞ்சப்படுகிறது.

English summary

A Malaysian appeals court on Monday upheld a government ban against the use of the word “Allah” to refer to God in non-Muslim faiths, overruling claims by Christians in this Muslim-majority nation that the restriction violates their religious rights.