அமெரிக்க ஜனாதிபதி போட்டியாளர்களில் ஹிலாரி கிளிண்டனுக்கு ஆதரவு அதிகரிப்பு

வாஷிங்டன்: குடியரசுக் கட்சி சார்பில் ஜனாதிபதி வேட்பாளராக யாரை நிறுத்துவது என்பதை உட்கட்சி தேர்தல் நடத்தி தீர்மானிக்க உள்ளனர். ஒரு டஜனுக்கும் மேலான தலைவர்கள் உட்கட்சி தேர்தலில் போட்டியிடும் இருக்கும் நிலையில், எதிரணியில் ஹிலாரி கிளிண்டன் எந்த போட்டியும் இல்லாமல் அனைத்து வேட்பாளர்களையும் விட அதிக ஆதரவு பெற்று வந்தார்.

குறிப்பாக பெண்கள் மத்தியில் அவருக்கு ஆதரவு பெருமளவில் இருந்து வருகிறது. அமெரிக்காவின் முதல் பெண் ஜனாதிபதி என்ற பெருமை ஹிலாரி க்ளிண்டனுக்குக் கிடைக்கும் என்று பரவலாகப் பேசப்படுகின்றது.

இந்த நிலையில் அவரை எதிர்த்து ஜனநாயகக் கட்சியில் போட்டியிடும் 74 வயது பெர்னி சான்டர்ஸ்க்கு நியூஹாம்ஷையர் மற்றும் ஐயோவா மாகாணங்களில் ஹிலாரிக்கு இணையான ஆதரவு கிடைத்திருந்தது.

ஹிலாரி க்ளிண்டன் இரண்டாவது முறையாக ஜனாதிபதித் தேர்தலுக்கான உட்கட்சி தேர்தலில் போட்டியிடுகிறார். முன்னதாக 2008ம் ஆண்டுக்கான தேர்தல் போது, ஹிலாரி தான் ஜனாதிபதி வேட்பாளர் ஆவார் என்று எதிர்பார்க்கப்பட்டது.

முதல் தடவை செனட்டராக இருந்த பராக் ஒபாமா, யாரும் எதிர்பார்க்காத வகையில் ஹிலாரியை விட அதிக ஆதரவு பெற்று ஜனாதிபதி வேட்பாளராகி வெற்றி பெற்று இரண்டு தடவை அதிபராகவும் ஆகிவிட்டார்.

ஒபாமாவைப் போல், முதல் தடவையாக வெர்மாண்ட் மாகாண செனட்டராக வெற்றி பெற்ற பெர்னி சான்டர்ஸ், களத்தில் குதித்த போது வெறும் பரபரப்புக்காக போட்டியிடுகிறார் என்று தான் கருதப்பட்டது. ஆனால் அவர் ஹிலாரி கிளிண்டனுக்கு இணையான செல்வாக்கை பெற்றிருந்தார்.

இந்நிலையில், சிஎன்என்/ஓஆர்சி நடத்தியுள்ள சமீபத்திய கருத்துக்கணிப்பு ஹிலாரிக்கு ஆதரவான அம்சங்களை வெளிக்கொண்டுவந்துள்ளது.

வெளியுறவுத்துறை கொள்கைகளில் 72 சதவீதம் மக்கள், ஹிலாரிக்கும், 15 சதவீதம்பேர் பெர்னிக்கும் ஆதரவு தெரிவித்துள்ளனர். ஐஎஸ்ஐஎஸ் விவகாரத்திலும் ஹிலாரிக்கு 63 சதவீதம், பெர்னிக்கு 18 சதவீதம் பேர் ஆதரவு தெரிவித்துள்ளனர்.

அதேநேரம், ஜனாதிபதி வேட்பாளர் டொனால்ட் டிரம்ப்புக்கும், ஹிலாரிக்கும் நடுவேயான தனிப்பட்ட கருத்துக்கணிப்பில், 2 சதவீத ஆதரவை மட்டுமே ஹிலாரி அதிகம் பெற்றுள்ளார். டிரம்புக்கு 47 சதவீதம், ஹிலாரிக்கு 49 சதவீதம்பேர் ஆதரவு தெரிவித்துள்ளனர். டெட் க்ரூஸ், ஹிலாரியைவிட 2 சதவீதம் வாக்குகள் பெற்றுள்ளதும் இதில் குறிப்பிடத்தக்கது. எனவே குடியரசு தலைவர் பதவி வேட்பாளர்கள் நடுவே சரிநிகர் மோதல் நிலவி வருவது உறுதியாகிறது.

English summary

A latest opinion poll has shown Democratic presidential aspirant Hillary Clinton now possesses a commanding lead over her nearest rival Bernie Sanders, with a strong debate performance bolstering her favorability numbers in the US.