கேதார்நாத் கோவிலில் பிரதமர் மோடி வழிபாடு- ரூ400 கோடி திட்டங்களுக்கு அடிக்கல் நாட்டினார்!

டேராடூன்: உத்தரகாண்ட் மாநிலம் கேதார்நாத் கோவிலில் பிரதமர் மோடி இன்று காலை வழிபாடு நடத்தினார். மேலும் ரூ400 கோடி மதிப்பிலான திட்டங்களுக்கும் பிரதமர் மோடி அடிக்கல் நாட்டினார்.

இத்தாலி தலைநகர் ரோம் மற்றும் ஸ்காட்லாந்தின் கிளாஸ்கோ நகர் ஆகிய இடங்களில் நடைபெற்ற ஜி20 உச்சி மாநாடு, பருவநிலை மாநாடு ஆகியவற்றில் பிரதமர் மோடி பங்கேற்றிருந்தார். இம்மாநாடுகளில் பங்கேற்று விட்டு பிரதமர் மோடி நாடு திரும்பினார்.

இதையடுத்து நேற்று ராணுவ வீரர்களுடன் தீபாவளி திருநாளை பிரதமர் மோடி கொண்டாடினார். இன்று காலை உத்தரகாண்ட் மாநிலம் டேராடூன் சென்றடைந்தார் பிரதமர் மோடி. அங்கு மாநில ஆளுநர் குர்மித் சிங், முதல்வர் புஷ்கர் சிங் தாமி ஆகியோர் பிரதமர் மோடியை வரவேற்றனர்.

அங்கிருந்து கேதார்நாத் சென்ற பிரதமர் மோடி வழிபாடு நடத்தினார். பிரதமர் மோடி ஏற்கனவே பலமுறை கேதார்நாத் கோவிலில் வழிபாடு நடத்தி உள்ளார். தற்போது 5-வது முறையாக கேதார்நாத்தில் பிரதமர் மோடி வழிபாடு நடத்தினார்.

மேலும் கேதார்நாத்தில் 2013-ம் ஆண்டு மேகவெடிப்பால் ஏற்பட்ட பெருவெள்ளத்தில் அடித்துச் செல்லப்பட்ட ஆதி சங்கரரின் நினைவிடத்தை பிரதமர் மோடி திறந்து வைத்தார். கேதார்நாத் கோவில் வளாகத்தில் 12 அடியிலான ஆதி சங்கரர் திருவுருவச் சிலையையும் பிரதமர் மோடி திறந்து வைத்தார். கேதார்நாத் கோவிலில் நடைபெற்று வரும் கட்டுமானப் பணிகளை பிரதமர் மோடி ஆய்வு செய்தார்.

Prime Minister Narendra Modi pays obeisance to Lord Shiva at Kedarnath temple in Uttarakhand pic.twitter.com/V9gIdrrgTo

— ANI (@ANI) November 5, 2021

மந்தாகினி ஆற்றில் பாலம், புரோகிதர்களுக்கான வீடுகள், மந்தாகினி ஆற்றில் தடுப்புச் சுவர், விருந்தினர் மாளிகைகள், மருத்துவமனை உள்ளிட்டவைகளுக்கு பிரதமர் மோடி அடிக்கல் நாட்டினார். பிரதமர் மோடி கேதார்நாத் வருகையையொட்டி கேதார்நாத் கோவில் மலர்களால் அலங்கரிக்கப்பட்டது. கோவிலில் மகா ருத்ரா அபிஷேகம் செய்து தேச நலனுக்காக பிரதமர் மோடி பிரார்த்தனை மேற்கொண்டார்.

பிரதமர் மோடி வருகை குறித்து கருத்து தெரிவித்த உத்தரகாண்ட் முதல்வர் புஷ்கர் சிங் தாமி, பிரதமர் மோடியின் வருகை எங்களுக்கு பெருமிதம் தரக் கூடியது. பிரதமர் மோடி கேதர் பாபா மீது அளவற்ற நம்பிககி கொண்டவர். பிரதமர் மோடியின் வருகையால் மகிழ்ச்சி அடைகிறோம் என்றார்.

English summary

Prime Minister Narendra Modi offers prayers at Kedarnath temple.