''மத்தியில் ஆட்சி மாற்றம் நிகழ்வது உறுதி''! பாஜகவை வெளுத்து வாங்கிய கனிமொழி!

கன்னியாகுமரி: மத்தியில் ஆட்சி மாற்றம் நிகழப்போவது உறுதி என்றும் மதக்கலவரத்தையோ ஜாதி, பிரச்சனைகளையோ தூண்டி அதில் அரசியல் செய்யலாம் என்ற நிலைப்பாடு உடையவர்கள் பாஜகவினர் எனவும் கனிமொழி எம்.பி. விமர்சித்துள்ளார்.

திமுக தேர்தல் அறிக்கையில் இடம்பெற வேண்டிய அம்சங்கள் குறித்து நாகர்கோவிலில் பொதுமக்களை சந்தித்து கருத்துக் கேட்ட போது அவர் பேசியதாவது;

''திமுக தேர்தல் அறிக்கை குழு சந்திப்பு நிகழ்ச்சியில் கலந்து கொள்வதற்காக வந்திருக்கக்கூடிய அத்தனை பேருக்கும் எங்களுடைய நன்றியை தெரிவித்துக் கொள்கிறேன். உங்கள் அத்தனை பேருக்கும் தெரியும் திராவிட முன்னேற்றக் கழகத்தின் தேர்தல் அறிக்கை என்பது மக்களை சந்தித்து மக்களுடைய கருத்துக்களை, கோரிக்கைகளை கேட்டு எழுதப்படக்கூடிய மக்களுடைய தேர்தல் அறிக்கையாகத்தான் நம்முடைய தேர்தல் அறிக்கை இருக்கும். ''

''இப்பொழுது அந்த வழியில் தொழிலாளர்கள், நம்முடைய முதலமைச்சர், கழகத் தலைவர் கட்டளைக்கு இணங்க தேர்தல் சார்ந்து தொழிலாளர், விவசாயிகள், மீனவர்களை சந்தித்து அவர்களுக்கு இருக்கக்கூடிய அந்த கோரிக்கைகளை எல்லாம் தேர்தல் அறிக்கையாக உருவாக்கக்கூடிய அந்த வாய்ப்பை நாங்கள் பெற்று இருக்கிறோம்.''

''இந்த தேர்தல் அறிக்கை என்பது நம்முடைய உரிமைகளை மீட்பதற்கான ஒரு தேர்தல் அறிக்கை. ஒன்றியத்தில் இருக்கக்கூடிய அரசாங்கம் கொஞ்சம் கொஞ்சமாக மாநில உரிமைகளைச் சிதைத்துக் கொண்டிருக்கிறது. ''

''அதேபோல மக்களைப் பிரித்தாளக்கூடிய ஒரு மனப்பான்மையோடு நம்முடைய ஒற்றுமையை சிதைத்து ஒவ்வொரு மாநிலத்தின் அடையாளங்களை எல்லாம் அழித்து மக்களுக்கு இடையே பிரச்சனைகளை உருவாக்கி, வேறு பிரச்சனைகளைக் கொண்டு வந்து அங்கே முன்வைத்து மக்கள் சந்திக்கக்கூடிய அன்றாட பிரச்சனைகளாக இருக்கக்கூடிய வேலைவாய்ப்பு இல்லாதது, விவசாயிகள் பாதிக்கப்பட்டிருக்கிறது, மீனவர்களுடைய உரிமைகளை ஒவ்வொரு நாளும் பறிக்கப்படுவது இவைகள் தான் மறக்கடிக்க செய்து வேறு ஒரு புதிய மதக்கலவரத்தையோ ஜாதி, பிரச்சனைகளையோ தூண்டி அதில் அரசியல் செய்யலாம் என்ற நிலைப்பாடு உடையவர்கள் தான்.''

''ஒன்றிய ஆட்சி நிச்சயமாக மாறும் என்ற நம்பிக்கையோடு நாம் அந்த ஆட்சி மாற்றத்திற்கான உழைப்பை முதலில் செய்து கொண்டிருக்கிறோம். அந்த ஆட்சி மாற்றம் வந்த பிறகு நம்முடைய உரிமைகளை மீட்பதற்காக நம்முடைய கோரிக்கைகளை நிறைவேற்றுவதற்காக அதையும் நீங்கள் எங்களிடம் வழங்க வேண்டும். நிச்சயமாக நம்முடைய முதலமைச்சராக உங்களுடைய வழிகாட்டுதலில் வழியே ஒரு ஆட்சி மாற்றம் இந்த நாட்டிலே உருவாகும். அந்த ஆட்சி மாற்றம் மூலம் இந்த நாட்டை மீட்டெடுப்போம். இந்த நாட்டில் ஜனநாயகத்தை பாதுகாத்து மக்களை ஒற்றுமையாக முன்னேற்றப் பாதையில் அழைத்துச் செல்வோம்.''

English summary

Kanimozhi MP said that there will be a change of government in the center and those who have the position of inciting religious or caste problems and doing politics in it are BJP.