ஆன்லைனில் ஒரு மார்க்.. ரிசல்டில் ஒரு மார்க்! நீட் விடைத்தாளை பார்க்க அனுமதி! மதுரை ஐகோர்ட் கிளை

Updated: Saturday, September 17, 2022, 18:42 [IST]

Subscribe to Oneindia Tamil

மதுரை: நீட் தேர்வில் தனக்கு வழங்கப்பட்ட விடைத்தாள் மாறியுள்ளதாக மாணவி தொடர்ந்த வழக்கில் நீதிமன்றம் முக்கிய உத்தரவைப் பிறப்பித்து உள்ளது

நாட்டில் உள்ள மருத்துவ இடங்கள் நீட் தேர்வு மூலமாகவே நிரப்பப்பட்டு வருகிறது. இதற்காக யுஜி மற்றும் பிஜி நீட் நுழைவுத் தேர்வுகள் தனித்தனியாக நடத்தப்படுகிறது.

அதன்படி இந்த ஆண்டு நீட் தேர்வுக்கான நுழைவுத் தேர்வு கடந்த ஜூலை 17இல் நடைபெற்றது. தேர்வு முடிவுகள் கடந்த ஆகஸ்ட் 31ஆம் தேதி வெளியிடப்பட்டது.

வழக்கு

இதற்கிடையே நீட் தேர்வு தொடர்பாக மதுரையைச் சேர்ந்த ஜெயசித்ரா என்ற மாணவி வழக்கு தொடர்ந்துள்ளார். நீட் தேர்வில் தனது விடைத்தாள் மாறி விட்டதாகக் கூறி இந்த மாணவி உயர் நீதிமன்ற மதுரை கிளையில் வழக்கு தொடர்ந்து உள்ளார். நீட் தேர்வில் 720க்கு 500க்கு மேல் மதிப்பெண்கள் பெறுவோம் என நம்பிக்கையுடன் இருந்த நிலையில், 114 மதிப்பெண்கள் பெற்றதாக முடிவுகள் வந்துள்ளதாக வழக்கு தொடர்ந்து இருந்தார்.

இரு வேறு மதிப்பெண்கள்

இதன் காரணமாக விடைத்தாளை நேரில் பார்க்க அனுமதி தர வேண்டும் என்று மாணவி ஜெயசித்ரா வழக்கு தொடர்ந்து இருந்தார். இந்த வழக்கு இன்று நீதிமன்றத்தில் விசாரணைக்கு வந்தது. அதில் ஆன்லைனில் 564 மதிப்பெண்கள் காட்டுவதாகவும் ஆனால் தனக்கு வந்த தேர்வு முடிவில் 114 மதிப்பெண்களே உள்ளதாகவும் அந்த மாணவி தனது மனுவில் குறிப்பிட்டு உள்ளார்.

உத்தரவு

இந்த வழக்கை விசாரித்த நீதிபதி நீட் தேர்வின் விடைத்தாளான ஓஎம்ஆர் சீட்டை நேரடியாகச் சென்று பார்க்க ஜெயசித்ராவுக்கு அனுமதி அளித்து உத்தரவிட்டார். தேர்வில் தேர்ச்சி பெற்றால் மட்டுமே மருத்துவக் கல்லூரியில் சேர முடியும் என்பதால் மாணவி கோரிக்கை ஏற்கப்பட்டதாகவும் நீதிபதி தனது உத்தரவில் தெரிவித்து உள்ளார்.

முதல்முறை இல்லை

முன்னதாக நீட் தேர்வில் குளறுபடி நடந்துள்ளதாகச் சென்னையைச் சேர்ந்த மாணவியும் உயர் நீதிமன்றத்தில் மனுத்தாக்கல் செய்து இருந்தார். அதில் தேர்வில் 720க்கு 600க்கும் மேல் மதிப்பெண்கள் பெறும் நம்பிக்கையுடன் இருந்த நிலையில் 132 மதிப்பெண்கள் பெற்றதற்கான விடைத்தாள் தனக்கு வழங்கப்பட்டுள்ளதாகக் கூறியிருந்தார். எனவே விடைத்தாளில் உள்ள கைரேகையைச் சரி பார்த்தால் தனது விடைத்தாள் எது எனக் கண்டுபிடிக்க முடியும் என்றும் இதற்காக உத்தரவிட வேண்டும் என வழக்கு தொடர்ந்து இருந்தது குறிப்பிடத்தக்கது.