திருப்பரங்குன்றம் மலையேறி திடீர் தரிசனம் செய்த பாஜகவினர்-திமுக அரசுக்கு எச்சரிக்கை கொடுத்த எச்.ராஜா!

Updated: Thursday, January 23, 2025, 15:57 [IST]

Subscribe to Oneindia Tamil

மதுரை: திருப்பரங்குன்றம் மலை உச்சி தர்கா தொடர்பாக சர்ச்சை நீடித்து வரும் நிலையில் இன்று பாஜக மூத்த தலைவர் எச்.ராஜா தலைமையில் 100-க்கும் மேற்பட்ட பாஜகவினர் திடீரென மலையேறி மலை உச்சியில் உள்ள காசி விஸ்வநாதரை தரிசனம் செய்தனர். இது தொடர்பாக கருத்து தெரிவித்த எச்.ராஜா, உத்தர பிரதேசத்தில் அயோத்தி, காசி, மதுரா போல் தமிழகத்தில் திருப்பரங்குன்றம் ஹிந்துக்களை ஒருங்கிணைக்கும் வழிபாட்டுத்தலமாக மாறும் என தெரிவித்தார்.

மதுரை திருப்பரங்குன்றம் மலை உச்சியில் காசி விஸ்வநாதர் கோவில் மற்றும் சிக்கந்தர் பாதுஷா அவுலியா தர்கா ஆகியவை உள்ளன. இந்த தர்காவில் சந்தனக் கூடு திருவிழாவை முன்னிட்டு ஆடு, கோழிகள் பலியிடப்படும். கடந்த வாரம் இதேபோல நடைபெற்ற நிகழ்வுக்கு இந்து அமைப்பினர் கடும் எதிர்ப்பு தெரிவித்ததால் சர்ச்சை வெடித்தது. இதனால் திருப்பரங்குன்றம் மலை உச்சியில் கந்தூரி வழிபாட்டுக்கு போலீசார் தடை விதித்தனர்.

நவாஸ் கனி எம்பி கருத்து

தமிழ்நாடு வக்ஃபு வாரிய தலைவர் நவாஸ் கனி எம்பி அப்பகுதிக்கு நேரில் சென்று ஆய்வு செய்த பின்னர், மத நல்லிணக்கத்திற்கு எடுத்துக்காட்டாக அங்கு தர்காவும், காசி விஸ்வநாதர் ஆலயமும் உள்ளது. தர்காவிற்கு அனைத்து மதத்தினரும் சென்று வருகிறார்கள் விரைவில் அனைத்து தடைகளும் நீக்கப்பட்டு கடந்த காலங்களில் இருந்தது போன்று மக்கள் சிரமம் இன்றி தர்காவிற்கு சென்று வர அனைத்து நடவடிக்கைகளும் மேற்கொள்ளப்படும் எனத் தெரிவித்திருந்தார்.

திருப்பரங்குன்றம் மலையேறிய எச்.ராஜா

இந்த பின்னணியில் இன்று தமிழக பாஜக மூத்த தலைவர் எச்.ராஜா தலைமையில் நூற்றுக்கணக்கான பாஜகவினர் வெற்றிவேல்- வீரவேல்; முருகனுக்கு அரோகரா என சரணகோஷங்களுடன் திருப்பரங்குன்றம் மலை உச்சிக்கு சென்றனர். அங்கு காசி விஸ்வநாதர் கோவிலில் தரிசனம் செய்தனர்.

சிக்கந்தர் மலை அல்ல- ஶ்ரீ கந்தர் மலை

இதனைத் தொடர்ந்து எச்.ராஜா தமது எக்ஸ் பக்கத்தில் பதிவிட்டுள்ளதாவது: கந்த புராணமும், கந்த சஷ்டி கவசமும் இருப்பது போல் கந்தர் மலையும் இந்துக்களுக்காக இருக்கும். திருப்பரங்குன்றத்தில் வீற்றிருப்பது ஸ்ரீகந்தர் மலைதான் சிக்கந்தர் மலை அல்ல!

மத மோதலை தூண்ட முயற்சி

இன்று ஸ்ரீகந்தர் மலையை சிக்கந்தர் மலை என்று கூறி இஸ்லாமிய மத அடிப்படைவாதிகள் மத மோதலை தூண்ட முயற்சிப்பதை வாக்கு வங்கி அரசியலுக்காக அமைதியாக வேடிக்கை பார்த்துக் கொண்டிருக்கிறது திமுக அரசு. இவர்கள் விளையாடுவது ஹிந்துக்களுக்கு எதிராக மட்டுமல்ல இறைவன் முருகனுக்கும் எதிராகத்தான்.

உ.பி. அயோத்தி போல தமிழகத்தின் திருப்பரங்குன்றம்

உத்தர பிரதேசத்தில் அயோத்தி, காசி, மதுரா போல் தமிழகத்தில் திருப்பரங்குன்றம் ஹிந்துக்களை ஒருங்கிணைக்கும் வழிபாட்டுத்தலமாக மாறும். இந்து விரோத திராவிட மாடலுக்கு இறுதி அத்தியாயம் எழுதும் இடமாக திருப்பரங்குன்றம் மாறும். திருப்பரங்குன்றத்தில் இருந்து தமிழகத்திற்கு விடியல் தொடங்கட்டும். முருகப் பெருமானின் சூரசம்ஹாரம் 2026 ல் நடந்தே தீரும். ஒன்றுபட்டு வெல்லட்டும் ஹிந்து சக்தி! வீழட்டும் ஹிந்து விரோத திராவிட தீயசக்தி! இவ்வாறு எச்.ராஜா பதிவிட்டுள்ளார்.