இனி எப்படி டார்ச்சர் பண்ணுவீங்க..உங்க வேலை வேண்டாம்! கம்பெனி முன் குத்தாட்டம்..மேனேஜர் முறைக்கிறாரே!
மும்பை: மகாராஷ்டிரா மாநிலம் புனேவில் ஊதிய உயர்வு தராததோடு அதிக அழுத்தம் கொடுத்ததால் பணியில் இருந்து விலகிய ஊழியர் மேனேஜரின் கண் முன்னே டோல் அடித்து உற்சாக நடனமாடி வேலையை விட்டுச் சென்ற காட்சிகள் சமூக வலைதளங்களில் பரவி வருகிறது.
உலகளாவிய பொருளாதார நெருக்கடி காரணமாக பல நிறுவனங்கள் தங்கள் ஊழியர்களை பணியில் இருந்து அதிரடியாக நீக்கி வருகின்றன. இது ஒரு பக்கம் என்றால் பல நிறுவனங்கள் தங்கள் திறமையான ஊழியர்களை தக்க வைத்துக் கொள்ள வேண்டும் என பல்வேறு சலுகைகளை வாரி வழங்குகின்றன.
அதே நேரத்தில் நாளுக்கு நாள் பெருகிவரும் வேலை வாய்ப்புகள், ஊதிய உயர்வு போன்ற காரணங்களால் பல ஊழியர்கள் தங்கள் பணியாற்றும் நிறுவனங்களை மாற்றி வருகின்றனர்.
ராஜினாமா: ஒரு சிலர் பனி அழுத்தம் மற்றும் ஊதிய உயர்வு கொடுக்காதது ஆகிய பிரச்சினைகளைக்காக நிறுவனங்களை மாற்றி வருகின்றனர். இந்த நிலையில் நீண்ட காலமாக தனக்கு ஊதிய உயர்வு வழங்காத நிறுவனத்தை விட்டு ஊழியர் ஒருவர் வெளியேறி இருக்கிறார். வெளியேறியது மட்டுமல்லாமல் தனது கடைசி நாளை டோல் அடித்து உற்சாகமாக நடனமாடிய காட்சிகள் தான் தற்போது சமூக வலைதளங்களில் வேகமாக பரவி வருகிறது.
கொண்டாட்டம்: புனேவில் உள்ள பிரபல நிறுவனத்தில் விற்பனை அதிகாரியாக பணியாற்றிய அனிகேத் ரந்தீர் என்பவர் தனது வேலையை ராஜினாமா செய்துள்ளார். ராஜினாமா செய்தது மட்டுமல்லாமல் கடைசி நாளைக் கொண்டாடும் வகையில் தனது அலுவலகத்தின் முன் தனது நாசிக் டோல் கலைஞர்களை அழைத்து வந்து மேலம் அடித்து நடனமாடியுள்ளார். மேலும் தனது நண்பர்களையும் அழைத்து வந்து நடனமாட வைத்துள்ளார்.
மேலாளருக்கு அழைப்பு: நிறுவனத்தின் முன் அவர் நடனமாடியது மட்டுமல்லாமல் தன்னுடன் சேர்ந்து நடனமாடுமாறு தனது அலுவலக மேலாளரையும் அழைத்தார். ஆனாலும் அதனை கோபத்துடன் பார்த்துக் கொண்டிருந்த மேலாளர் முறைத்தவாறு அங்கு இருந்து சென்றார். சிறிது நேரத்தில் அனிகேத் மேலாளரையும், அவரது நிறுவனத்தையும் திட்டி விட்டு அங்கிருந்து சென்றார்
என்ன காரணம்?: இந்த நிலையில் அனிகேத் 3 வருடங்களாக நேரம் காலம் பார்க்காமல் உழைத்த போதும் தான் நிறைய சிரமங்களை சந்தித்ததாகவும், சம்பள உயர்வு இல்லாமல் மூன்று வருடங்கள் அந்த நிறுவனத்தில் பணிபுரிவதாகவும் கூறினார். மேலும் தனது நிறுவனத்தின் உரிமையாளரால் அவமரியாதை செய்யப்பட்டதாகவும், நிறுவனத்தில் தான் பணியாற்ற போது அனுபவித்த ஆரோக்கியமற்ற சூழல் காரணமாகவே தற்போது நடனமாடி தனது உற்சாகத்தை வெளிப்படுத்தியதாக கூறியுள்ளார்.
Click it and Unblock the Notifications
Sign in with Google