இனி டாலருக்கு வேலை இல்லை.. BRICS நாடுகளை வைத்து.. அமெரிக்காவிற்கு இந்தியா வைத்த பெரிய ஆப்பு!

நியூயார்க்: உலகளாவிய வர்த்தகத்தில் அமெரிக்க டாலரின் (USD) ஆதிக்கத்தைக் கட்டுப்படுத்தும் வகையில், BRICS நாடுகளுடனான வர்த்தகத்தை 100% இந்திய ரூபாயில் மேற்கொள்ள இந்தியா ஒரு வரலாற்றுச் சிறப்புமிக்க நடவடிக்கையை எடுத்துள்ளது. இதற்கு அண்மையில் அதிகாரப்பூர்வ சுற்றறிக்கை ஒன்றை வெளியிட்டது.

இந்த நடவடிக்கை உலகச் சந்தைகளில் டாலரின் மேலாதிக்கத்தின் வீழ்ச்சியை விரைவுபடுத்தக்கூடும் என்று ஆய்வாளர்கள் கருதுகின்றனர். இந்தியா மீது அமெரிக்கா கோபத்தில் உள்ள நிலையில், அமெரிக்காவிற்கு மேலும் நெருக்கடி கொடுக்கும் விதமாக இந்தியா இந்த அறிவிப்பை வெளியிட்டு உள்ளது.

BRICS: இனி டாலருக்கு வேலை இல்லை

முன்னதாக, இந்திய ரிசர்வ் வங்கி (RBI) வங்கிகளுக்கு ஒரு அறிவுறுத்தலை வெளியிட்டது. இதன் மூலம் வோஸ்ட்ரோ கணக்குகளை திறப்பதற்கு முன்அனுமதி தேவையில்லை என அறிவித்தது. இந்த புதிய கொள்கையின் கீழ், மற்ற நாடுகளின் ஏற்றுமதியாளர்களும் இறக்குமதியாளர்களும் இனிமேல் இந்திய ரூபாயைப் பயன்படுத்தி வர்த்தக செட்டில்மென்டுகளை சிறப்பு வோஸ்ட்ரோ கணக்குகள் மூலம் மேற்கொள்ளலாம்.

எளிமையாகச் சொன்னால், வேறு எந்த நாடாவது இந்தியாவிடமிருந்து பொருட்களை வாங்க விரும்பினால், அவர்கள் தங்கள் நாணயத்தை முதலில் அமெரிக்க டாலராக மாற்ற வேண்டிய அவசியமில்லை. அவர்கள் தங்கள் வோஸ்ட்ரோ கணக்கில் உள்ள இந்திய ரூபாயைப் பயன்படுத்தலாம். இதேபோல, இந்தியாவிலிருந்து பொருட்கள் வாங்கப்படும்போதும் இந்த நடைமுறை பொருந்தும்.

இந்தியா அமெரிக்கா மோதல்

முன்னாள் அமெரிக்க அதிபர் டொனால்ட் டிரம்ப் இந்தியப் பொருட்கள் மீது 50% வரி விதித்ததற்குப் பிறகு இந்த கொள்கை அறிவிக்கப்பட்டது. இந்திய ரூபாயை வலுப்படுத்தும் இந்த நடவடிக்கையை, அமெரிக்காவின் வர்த்தக நடவடிக்கைகளுக்கு பிரதமர் நரேந்திர மோடியின் நிர்வாகம் நேரடிப் பதிலடியாகக் கருதுகிறது. BRICS நாடுகளுடன் கூடுதலாக, இந்திய ரூபாயில் நேரடியாகப் பணம் செலுத்தும் வாய்ப்பை வழங்கும் சுற்றறிக்கையை இந்தியா பல நாடுகளுக்கும் அனுப்பியுள்ளது.

இந்த நடவடிக்கை இந்தியாவின் சர்வதேச வர்த்தக நிலையில் முக்கிய பங்காற்றுவதோடு, சர்வதேச சந்தைகளில் டாலரின் ஆதிக்கத்தை குறைக்கும் என எதிர்பார்க்கப்படுகிறது. ரிசர்வ் வங்கியின் அறிக்கையின்படி, வெளிநாட்டு நிறுவனங்கள் வோஸ்ட்ரோ கணக்குகளைத் திறக்க இனி அனுமதி தேவையில்லை. வங்கிகள் இந்த செயல்முறையை எளிதாக்கும், இதனால் மேலும் பல நிறுவனங்கள் இந்திய ரூபாயை ஒரு பரிவர்த்தனை நாணயமாகப் பயன்படுத்த முடியும்.

BRICS நாடுகள் அமெரிக்கா மோதல்

இந்த ஏற்பாடு, உலகச் சந்தைகளில் பொதுவாகப் பயன்படுத்தப்படும் 'கோர்ரெஸ்போண்டென்ட் பேங்கிங்' (correspondent banking) வழிமுறைகளைப் போன்றது என ரிசர்வ் வங்கி விளக்கமளித்துள்ளது. இந்த முயற்சி BRICS நாடுகளுக்கு வர்த்தகத்தில் பயனளிக்கும் என்றும், டிரம்ப் காலத் தடைகளின் தாக்கத்தைத் தவிர்க்க ரூபாயைப் பயன்படுத்த உதவும் என்றும் எதிர்பார்க்கப்படுகிறது. எனினும், இத்திட்டத்தில் இணைவதற்கு முன் அனைத்து நிறுவனங்களும் 'உங்கள் வாடிக்கையாளரை அறிந்து கொள்ளுங்கள்' (KYC) விதிமுறைகளைப் பின்பற்ற வேண்டும் என ரிசர்வ் வங்கி வலியுறுத்தியுள்ளது.

வோஸ்ட்ரோ கணக்குகளை எளிதாக்குவதன் மூலம் வெளிநாட்டிலிருந்து அதிக ரூபாய் வரத்து கிடைக்கும் என்றும், இது உள்நாட்டு அந்நிய செலாவணி விகிதத்தை வலுப்படுத்தும் என்றும், மேலும் பணமாற்று செலவுகளைக் குறைக்கும் என்றும் மத்திய வங்கி நம்புகிறது. இந்த செலவுகள் நேரடியாக அந்நிய செலாவணி சந்தையால் தீர்மானிக்கப்படும். இந்தியா ரூபாயை அமெரிக்க டாலருக்கு போட்டியாகப் பயன்படுத்தும் நிலையில், மற்ற BRICS உறுப்பு நாடுகளும் சர்வதேச வர்த்தகத்தில் தங்கள் உள்ளூர் நாணயங்களின் பயன்பாட்டை ஊக்குவிக்கத் தொடங்கியுள்ளன.

English summary

India massive plan against US Donald Trump, with the help of BRICS Countries