எதிர்க்கட்சிகள் கூட்டத்தில் பங்கேற்க வந்த ராகுல்.. பாட்னாவில் காத்திருந்த தொண்டர்கள்.. உற்சாக வரவேற்பு

பாட்னா: எதிர்க்கட்சிகள் ஆலோசனைக் கூட்டத்தில் பங்கேற்க வந்த காங்கிரஸ் தலைவர் மல்லிகார்ஜூன் கார்கே, ராகுல் காந்திக்கு காங்கிரஸ் கட்சியினர் பாட்னாவில் உற்சாக வரவேற்பு அளித்தனர்.

வரும் நாடாளுமன்ற தேர்தலில் மத்தியில் ஆளும் பாஜகவை எப்படியாவது வீழ்த்திவிட வேண்டும் என முழு வீச்சில் எதிர்கட்சிகள் செயல்பட்டு வருகின்றன. அதே வேளையில், அடுத்த ஆண்டு நடைபெற இருக்கும் நாடாளுமன்ற தேர்தலிலும் வெற்றி பெற்று மூன்றாவது முறையாக ஆட்சி அமைக்கும் முனைப்பில் பாஜக உள்ளது.

பாஜகவின் இந்த வியூகத்தை தவிடு பொடியாக்கி ஆட்சியை பிடிக்கும் வகையில் எதிர்க்கட்சிகளை ஒருங்கிணைத்து தேர்தலில் போட்டியிட வேண்டும் என்ற திட்டத்தில் நிதிஷ் குமார் எதிர்க்கட்சி தலைவர்களை சந்தித்து பேசிவந்தார். இதன் அடுத்த கட்டமாக எதிர்க்கட்சிகளின் ஆலோசனைக் கூட்டத்திற்கு நிதிஷ் குமார் ஏற்பாடு செய்துள்ளார்.

பீகார் மாநிலம் பாட்னாவில் நடைபெறும் இந்த ஆலோசனைக் கூட்டத்தில் கட்சிகளின் தலைவர்கள் மட்டுமே பங்கேற்க வேண்டும் எனவும் பிரதிநிதிகளை அனுப்பக் கூடாது எனவும் ஏற்கனவே நிதிஷ் குமார் கண்டிப்பு காட்டியிருந்தார். அந்த வகையில் இன்று நடைபெறும் ஆலோசனைக் கூட்டத்தில் காங்கிரஸ் கட்சியின் தலைவர் மல்லிகார்ஜூன் கார்கே, ராகுல் காந்தி, திமுக தலைவரும் தமிழக முதல்வருமான மு.க ஸ்டாலின், மேற்கு வங்காள முதல்வர் மம்தா பானர்ஜி, சரத்பவார் என தேசிய அளவில் எதிர்க்கட்சிகளின் தலைவர்கள் இந்தக் கூட்டத்தில் பங்கேற்கிறார்கள்.

காலை 11.30 மணியளவில் இந்தக் கூட்டம் நடைபெறுகிறது. பாஜகவை வீழ்த்தும் வகையில், 400 தொகுதிகளில் பொது வேட்பாளரை நிறுத்துவது குறித்து எதிர்க்கட்சிகள கூட்டத்தில் முடிவு எடுக்கப்படலாம் எனவும் பல முக்கிய தீர்மானங்கள் நிறைவேற்றப்பட வாய்ப்பு உள்ளதாகவும் தெரிகிறது. இந்தக் கூட்டத்தில் பங்கேற்பதற்காக முதல்வர் மு.க ஸ்டாலின் உள்பட பல முக்கிய தலைவர்கள் நேற்றே பீகார் சென்றுவிட்டனர்.

இந்த நிலையில் இன்று காலை காங்கிரஸ் தலைவர் மல்லிகார்ஜூன் கார்கே, ராகுல் காந்தி ஆகியோர் பாட்னா சென்றனர். பாட்னா சென்ற ராகுல் காந்தி, கார்கேவுக்கு கட்சியினர் உற்சாக வரவேற்பு அளித்தனர். கையில் ரோஜாப்பூக்களுடன் காத்திருந்த கட்சி நிர்வாகிகள் ராகுலுக்கு வணக்கம் செலுத்தி பூக்களை கொடுத்து வரவேற்னர்.

English summary

Congress leader Mallikarjun Kharge, who came to participate in the Opposition's consultative meeting, was given a warm welcome by the Congress party in Patna to Rahul Gandhi.