Amit Shah: அமித்ஷாவை நோக்கி பறந்த டிரோன்.. காரைக்காலில் சுட்டு வீழ்த்திய வீரர்கள்..சிக்கிய நபரிடம் விசாரணை

காரைக்கால்: காரைக்காலில் பொதுக்கூட்டத்தில் மத்திய உள்துறை அமைச்சர் அமித்ஷா இன்று பேசி கொண்டிருந்தார். அப்போது திடீரென்று பறந்து வந்த டிரோனால் பெரும் பரபரப்பு ஏற்பட்டது. இதையடுத்து பாதுகாப்பு காரணங்களால் அந்த டிரோனை அமித்ஷாவின் பாதுகாப்பு பணியில் ஈடுபட்டு இருந்த என்எஸ்ஜி வீரர்கள் சுட்டு வீழ்த்தினர். மேலும் டிரோன் பறக்கவிட்ட நபரை பிடித்து போலீசார் தீவிரமாக விசாரணை மேற்கொண்டு வருகின்றனர்.

தமிழகத்தை போல் புதுச்சேரியிலும் சட்டசபை தேர்தல் நடைபெற உள்ளது. இந்நிலையில் தான் மத்திய உள்துறை அமைச்சர் அமித்ஷா இன்று புதுச்சேரியின் காரைக்காலில் உள்ள பொதுக்கூட்டம் மற்றும் பல்வேறு அரசு நிகழ்ச்சிகளில் பங்கேற்றார்.

காரைக்கால் சந்தை திடல் பகுதியில் பொதுக்கூட்டம் நடந்தது. இந்த கூட்டத்தில் அமித்ஷா பேசினார். அப்போது அமித்ஷாவை நோக்கி டிரோன் பறந்து வந்தது.

சுட்டு வீழ்த்தப்பட்ட டிரோன்

இதனை பார்த்த அமித்ஷாவின் பாதுகாவலர்களான என்எஸ்ஜி வீரர்கள் டிரோன் எதிர்ப்பு துப்பாக்கியை வைத்து சுட்டு வீழ்த்தினர். மேலும் டிரோன் பறக்கவிட்ட நபர்? அவரது பின்னணி? என்பது பற்றி என்எஸ்ஜி வீரர்கள் மற்றும் போலீசார் விசாரணை மேற்கொண்டனர்.

லோகேஷிடம் விசாரணை

அதில் டிரோன் பறக்கவிட்ட நபரின் பெயர் லோகேஷ் என்பதும், அவர் திருநள்ளாறு பகுதியை சேர்ந்தவர்கள் என்பதும் தெரியவந்தது. அதுமட்டுமின்றி அமித்ஷாவின் பொதுக்கூட்டம் நடக்கும் இடத்தின் அருகே உள்ள கடை ஒன்றில் வேலை செய்து வருவதும் தெரியவந்தது.

ரகசிய இடத்தில்...

இதையடுத்து அவரை போலீசார் விரைந்து பிடித்தனர். அவர் எதற்காக டிரோனை பறக்கவிட்டார்? என்பது தெரியவில்லை. இதுபற்றி அவரிடம் ரகசிய இடத்தில் வைத்து போலீசார் விசாரணை மேற்கொண்டு வருகின்றனர்.

தடையை மீறி பறந்த டிரோன்

முன்னதாக அமித்ஷா வருகையையொட்டி காரைக்கால் மாவட்ட எல்லைக்குள் டிரோன்கள் பறக்க தடை விதிக்கப்பட்டது. அமித் ஷா வரும் நாளில் சட்டம் ஒழுங்கு பாதிக்கப்படாத வகையில் அனைத்து முன்னெச்சரிக்கை நடவடிக்கைகளும் எடுக்கப்பட்டது.

சுமார் 700 புதுச்சேரி காவல்துறையினர் மற்றும் 400 மத்திய துணை ராணுவப் படையினர் பாதுகாப்பு பணியில் ஈடுபட்டனர். பல இடங்களில் கண்காணிப்பு கேமராக்கள் பொருத்தப்பட்டன.இருப்பினும் அதனை தாண்டி டிரோன் பறந்து வந்ததால் பெரும் பரபரப்பு ஏற்பட்டது.

English summary

Amit shah meeting drone shoot down in Karaikal: A drone that suddenly flew over Amit Shah's public meeting in Karaikal caused a stir. Following this, the drone was shot down by NSG personnel who were involved in Amit Shah's security due to security reasons. The police are also actively investigating the person who flew the drone.