இரக்கமே இல்லையா? கால்பந்தில் தோற்ற ஆத்திரம்.. பள்ளி மாணவர்களை ஷூ காலால் நெஞ்சில் உதைத்த ஆசிரியர்

Updated: Sunday, August 11, 2024, 15:42 [IST]

Subscribe to Oneindia Tamil

சேலம்: சேலம் அருகே உள்ள அரசு உதவி பெறும் பள்ளி மாணவர்கள் பள்ளிகளுக்கு இடையேயான கால்பந்து போட்டியில் தோற்றனர். இதனால் கோபமடைந்த அந்த பள்ளியின் உடற்கல்வி ஆசிரியர் மாணவர்களின் நெஞ்சில் ஷூ காலால் எட்டி உதைத்து தலைமுடியை பிடித்து கன்னத்தில் அறைந்து தகாத வார்த்தைகளை சொல்லி திட்டிய வீடியோ வெளியாகி மனதை பதற வைத்துள்ளது. இந்நிலையில் ஆசிரியர் சஸ்பெண்ட் செய்யப்பட்டுள்ளார்.

சேலம் மாவட்டம் மேட்டூர் அருகே கொளத்தூரில் அரசு உதவி பெறும் மேல்நிலைப்பள்ளி உள்ளது. இந்த பள்ளியில் கால்பந்து அணி உள்ளது. சிறப்பாக விளையாடும் மாணவர்களை உள்ளடக்கி இந்த கால்பந்து அணி உருவாக்கப்பட்டுள்ளது.

இந்த அரசு உதவி பெறும் தனியார் மேல்நிலைப்பள்ளியின் கால்பந்து அணி பள்ளிகளுக்கு இடையே நடக்கும் போட்டிகளில் பங்கேற்று வருகிறது. அந்த வகையில் தற்போது பள்ளிகளுக்கு இடையேயான போட்டி நடந்தது. இந்த போட்டியில் உடற்கல்வி ஆசிரியர் அண்ணாமலை தலைமையில் மாணவர்கள் பங்கேற்றனர்.

இந்த போட்டியில் குளத்தூர் அரசு உதவி பெறும் மேல்நிலைப்பள்ளி மாணவர்கள் தோல்வியடைந்துள்ளதாக கூறப்படுகிறது. இதனால் உடற்கல்வி ஆசிரியர் அண்ணாமலை கடும் கோபம் அடைந்தார். மைதானத்திலேயே கால்பந்து அணியில் விளையாடும் மாணவர்களை வரிசையாக உட்கார வைத்து பிற மாணவர்கள் முன்னிலையில் வைத்து தாக்கினார்.

ஷூ காலில் அவர் மாணவர்களின் வயிறு மற்றும் நெஞ்சுப்பகுதியில் எட்டி உதைத்தார். இதில் மாணவர்கள் தரையில் அமர்ந்த நிலையில் கீழே விழுந்தனர். அதுமட்டுமின்றி தலைமுடியை பிடித்தில் மாணவர்களின் கன்னத்தில் அறைந்தார். மேலும் தகாத வார்த்தைகள் பேசி திட்டி வன்மத்தை கக்கினார்.

பிற மாணவர்கள் முன்னிலையில் தங்களுக்கு ஏற்பட்ட இந்த அவமானத்தை நினைத்து மாணவர்கள் கண்கலங்கியபடி அமர்ந்து இருந்தனர். இதனை சாதகமாக பயன்படுத்தி கொண்ட உடற்கல்வி ஆசிரியர் அண்ணாமலை மாணவர்களை தொடர்ந்து திட்டி ஷூ காலால் எட்டி உதைத்தார். இதனை அங்கிருந்த மாணவர்கள் செல்போனில் வீடியோ எடுத்ததாக கூறப்படுகிறது. இந்த வீடியோ தற்போது இணையதளங்களில் வெளியாகி வேகமாக பரவி வருகிறது.

இந்த வீடியோவை பார்க்கும் நெட்டிசன்கள் கடும் கோபமடைந்துள்ளனர். உடற்கல்வி ஆசிரியர் அண்ணாமலையை டிஸ்மிஸ் செய்து நடவடிக்கை எடுக்க வேண்டும் என்று கொந்தளித்துள்ளனர். அதுமட்டுமின்றி, ‛‛போட்டியில் வெற்றியோ, தோல்வியோ எது வந்தாலும் ஏற்க வேண்டும். தோல்வி என்றால் வெற்றிக்கு பயிற்சி வழங்க வேண்டும். அதைவிட்டு விட்டு இப்படி மாணவர்களை தாக்குவது ஏற்கவே முடியாது. இவர் மீது நடவடிக்கை எடுக்க வேண்டும்'' என்று பலரும் தெரிவித்து வருகின்றனர். இத்தகைய சூழலில் தான் பள்ளி உடற்கல்வி ஆசிரியர் அண்ணாமலை அதிரடியாக சஸ்பெண்ட் செய்யப்பட்டுள்ளார்.