வேலையைக் காட்டிய வெள்ளி விலை உச்சம்! சேலத்தில் கொலுசு உற்பத்தி கடும் பாதிப்பு! 90% வரை சரிந்த ஆர்டர்

சேலம்: கடந்த சில மாதங்களாக தொடர்ந்து உயர்ந்து வரும் வெள்ளி விலை, சேலம் மாவட்டத்தின் பாரம்பரிய தொழிலான கொலுசு உற்பத்தித் துறையை கடுமையாக பாதித்துள்ளது. வெள்ளி விலை உயர்வின் காரணமாக, கொலுசுகளுக்கான ஆர்டர்கள் சுமார் 90 சதவீதம் வரை குறைந்துள்ளதாக உற்பத்தியாளர்கள் தெரிவிக்கின்றனர்.

தமிழ்நாட்டில் வெள்ளி கொலுசு உற்பத்திக்கு பெயர் பெற்ற மாவட்டமாக சேலம் திகழ்கிறது. இங்கு உள்ள சிவதாபுரம், சேவாபேட்டை, நேத்திமேடு, மணியனூர், பொன்னம்மாபேட்டை, கோட்டை, சூரமங்கலம், சேலத்தாம்பட்டி, ஜாகீர் அம்மாப்பாளையம், பனங்காடு, கொண்டலாம்பட்டி உள்ளிட்ட பகுதிகளில் ஆயிரத்திற்கும் மேற்பட்ட கொலுசு உற்பத்தி யூனிட்கள் இயங்கி வருகின்றன.

இந்தத் தொழிலின் மூலம் நேரடியாகவும் மறைமுகமாகவும் ஒரு லட்சத்துக்கும் மேற்பட்டோர் வாழ்வாதாரம் பெற்று வருகின்றனர். சேலத்தில் தயாரிக்கப்படும் வெள்ளி கொலுசுகள், தமிழ்நாடு மட்டுமின்றி கேரளா, கர்நாடகா, ஆந்திரா, தெலங்கானா, மகாராஷ்டிரா, மத்தியப் பிரதேசம் உள்ளிட்ட பல மாநிலங்களிலுள்ள நகைக்கடைகளுக்கு அனுப்பப்பட்டு வருகிறது.

ஆனால் சமீபகாலமாக வெள்ளி விலை கடுமையாக உயர்ந்ததால், வியாபாரிகள் ஆர்டர்களை குறைத்துள்ளனர். இதன் விளைவாக, வழக்கமாக கிடைக்கும் ஆர்டர்களில் தற்போது 10 சதவீதம் மட்டுமே வருவதாகவும், குறிப்பாக பொங்கல் பண்டிகையை முன்னிட்டு வர வேண்டிய பெரிய அளவிலான ஆர்டர்கள் கூட இந்த ஆண்டு வராததால் தொழிலாளர்கள் கடும் அதிர்ச்சியடைந்துள்ளதாகவும் கூறப்படுகிறது. சேலம் மாவட்டத்தில் சுமார் 10 ஆயிரம் வெள்ளிப் பட்டறைகள் செயல்பட்டு வருகின்றன.

கொலுசு தயாரிப்பில் உருக்குப் பட்டறை, கம்பி பட்டறை, மெருகூட்டும் பட்டறை, பூ பட்டறை உள்ளிட்ட 13 வகையான துணை பட்டறைகள் செயல்பட்டு வருகின்றன. ஆர்டர்கள் குறைந்துள்ளதால், இந்த பட்டறைகளில் பணியாற்றிய ஆயிரக்கணக்கான தொழிலாளர்கள் வேலை இழந்துள்ளனர். பலர் மாற்றுத் தொழில்களை தேடி செல்ல வேண்டிய நிலைக்கு தள்ளப்பட்டுள்ளதாகவும் தெரிவிக்கப்படுகிறது.

வெள்ளி விலை உயர்வு நீடித்தால், சேலத்தின் பாரம்பரிய கொலுசு தொழில் மேலும் நலிவடையும் அபாயம் இருப்பதாக உற்பத்தியாளர்களும் தொழிலாளர்களும் கவலை தெரிவித்து வருகின்றனர். அரசு தரப்பில் உரிய உதவிகள் மற்றும் சலுகைகள் வழங்கப்பட வேண்டும் என்ற கோரிக்கையும் வலுத்து வருகிறது.

கடந்த சில நாட்களாகவே தங்கத்தின் விலை தொடர்ந்து புதிய உச்சத்தை தொட்டு வருவது அனைவரும் தெரிந்த விஷயம் தான். ஆனால், சமீப காலமாக தங்கத்துக்கு நிகராக வெள்ளி விலையும் அதிரடி உயர்வை சந்தித்து வருகிறது. குறிப்பாக 2026 ஆம் ஆண்டின் தொடக்கத்தில், வெள்ளி விலை குறித்த விவாதங்கள் பொருளாதார வட்டாரங்களில் அதிகரித்துள்ளன. சென்னையில் இன்று காலை நேரத்தில் கிராமுக்கு ரூ.10 உயர்ந்த வெள்ளி விலை, பிற்பகல் நேரத்தில் மீண்டும் ரூ.10 உயர்ந்ததால், ஒரே நாளில் மொத்தமாக ரூ.20 உயர்வு ஏற்பட்டுள்ளது. இதன் காரணமாக, தற்போது ஒரு கிராம் வெள்ளி ரூ.365 என்ற விலையில் விற்பனை செய்யப்படுகிறது. அதேபோல், ஒரு கிலோ வெள்ளியின் விலை ரூ.3.65 லட்சமாக நிர்ணயிக்கப்பட்டுள்ளது.

English summary

The sharp rise in silver prices has severely impacted Salem’s traditional silver anklet manufacturing industry, leading to a drastic 90% drop in orders. Thousands of workers face job losses as production units struggle to survive amid soaring raw material costs.