இதுதான்டா கேப்டன் டைமிங்.. சஞ்சு சாம்சன் அவுட்டானால் என்ன.. கடைசி வரை நின்று சம்பவம் செய்த ருதுராஜ்!

சென்னை: மும்பை அணிக்கு எதிரான போட்டியில் சிஎஸ்கே அணியின் கேப்டன் ருதுராஜ் கெய்க்வாட் 34 பந்துகளில் அரைசதத்தை எட்டினார். இந்த சீசனில் முதல் பாதியில் ருதுராஜ் கெய்க்வாட் ஃபார்மின்றி தவித்தார். ஆனால் சஞ்சு சாம்சன் விரைவாக ஆட்டமிழந்த போது, ருதுராஜ் கெய்க்வாட் சரியான நேரத்தில் ஃபார்முக்கு வந்து சிஎஸ்கே அணியை காப்பாற்றி இருக்கிறார்.

மும்பை அணிக்கு எதிரான போட்டியில் சிஎஸ்கே அணி 8 விக்கெட்டுகள் வித்தியாசத்தில் அபார வெற்றியை பெற்றுள்ளது. இந்தப் போட்டியில் முதலில் பேட்டிங் ஆடிய மும்பை அணி 20 ஓவர்களில் 7 விக்கெட்டுகள் இழப்பிற்கு 159 ரன்களை சேர்த்தது. இதன்பின் களமிறங்கிய சிஎஸ்கே அணி 18.1 ஓவர்களில் 2 விக்கெட்டுகள் இழப்பிற்கு 160 ரன்கள் எடுத்து அபார வெற்றியை பெற்றது.

சிஎஸ்கே அணி தரப்பில் சிறப்பாக ஆடிய கேப்டன் ருதுராஜ் கெய்க்வாட் 48 பந்துகளில் 2 சிக்ஸ், 5 பவுண்டரி உட்பட 67 ரன்கள் எடுத்து அசத்தினார். அதேபோல் இளம் வீரர் கார்த்திக் சர்மா 40 பந்துகளில் 3 சிக்ஸ், 4 பவுண்டரி உட்பட 54 ரன்களை எடுத்தார். இந்தப் போட்டியில் ருதுராஜ் கெய்க்வாட் கடைசி வரை களத்தில் நின்று சிஎஸ்கே அணியின் வெற்றியை உறுதி செய்தார்.

இதனால் சிஎஸ்கே ரசிகர்கள் கேப்டன் ருதுராஜ் கெய்க்வாட்டை பாராட்டி வருகின்றனர். ஏனென்றால் இந்த சீசனில் முதல் 7 போட்டிகளில் ருதுராஜ் கெய்க்வாட் ஃபார்மின்றி தவிர்த்தார். அந்த நேரத்தில் சஞ்சு சாம்சன் மற்றும் ஆயுஷ் மாத்ரே ஆகியோரை மட்டுமே நம்பி இருந்தது. ஆனால் ஆயுஷ் மாத்ரே திடீரென காயம் அடைந்து வெளியேறினார்.

இந்த நிலையில் குஜராத் அணிக்கு எதிரான போட்டியில் சிஎஸ்கே பேட்ஸ்மேன்கள் தடுமாற, ருதுராஜ் கெய்க்வாட் 60 பந்துகளில் 74 ரன்கள் எடுத்து கடைசி வரை களத்தில் நின்றார். அப்போது ருதுராஜ் கெய்க்வாட் ஃபார்முக்கு வந்ததாக பார்க்கப்பட்டது. தற்போது மும்பை அணிக்கு எதிரான போட்டியில் ருதுராஜ் கெய்க்வாட் 34 பந்துகளில் அரைசதம் அடித்துள்ளார்.

இந்த போட்டியிலும் சஞ்சு சாம்சன் 11 ரன்களில் ஆட்டமிழந்து வெளியேறிய போது, ருதுராஜ் கெய்க்வாட் பொறுப்பை எடுத்து கொண்டார். அதுமட்டுமல்லாமல் இளம் வீரரான கார்த்திக் சர்மாவுக்கு அழுத்தம் கொடுக்காமல் நிதானமாக ஆட அறிவுறுத்தி, கடைசி வரை களத்தில் நிற்கவும் காரணமாகவும் அமைந்தார். இதனால் சரியான் நேரத்தில் ருதுராஜ் கெய்க்வாட் ஃபார்முக்கு வந்துவிட்டதாக ரசிகர்கள் கொண்டாடி வருகின்றனர்.

English summary

Ruturaj Gaikwad: Ruturaj Gaikwad come back to form and Scored a consecutive half century against Gujarat and Mumbai at Chepauk in IPL 2026