மீண்டும் சொதப்பிய திமுக.. திணறுகிறார்களே.. லாவகமாக நர்ரேட்டிவ் செட் செய்த விஜய்.. கவனிச்சீங்களா?

சென்னை: 2026 தமிழக சட்டமன்றத் தேர்தல் முடிவுகள் திராவிட அரசியலின் 60 ஆண்டுகால வரலாற்றில் ஒரு முக்கிய திருப்புமுனையை ஏற்படுத்தியுள்ளன. முதல்வர் விஜய் தலைமையிலான தமிழக வெற்றி கழகம் (தவெக) 108 இடங்களைக் கைப்பற்றி ஆட்சியமைத்த அதிர்ச்சி முடிவு, திமுகவை 59 இடங்களுடன் எதிர்க்கட்சி அந்தஸ்துக்கு தள்ளியது. இந்தத் தேர்தலில் பாரம்பரிய களப்பணி, அரசியல் கூட்டணிகள் ஆகியவற்றை விட, சமூக ஊடகங்களின் சக்தி எப்படி தீர்மானகரமான பங்கு வகித்தது என்பதே பேச்சாக உள்ளது. ஆனால் இப்போது தேர்தலுக்குப் பின்னரும் சமூக ஊடகங்களில் தவெகவின் ஆதிக்கம் தொடர்கிறது

தேர்தல் முடிவுகள் வெளியான பின்னர், திமுக தரப்பில் இருந்து வரும் ஒப்புதல்கள் இந்த டிஜிட்டல் தோல்வியை உறுதிப்படுத்துகின்றன. முன்னாள் முதல்வர் மு.க. ஸ்டாலின், "நாங்கள் களப்பணியில் கவனம் செலுத்தியபோது, அவர்கள் ரீல்ஸ் மூலம் குழந்தைகள் வழியாக குடும்பங்களுக்குள் ஊடுருவினர். இது எங்கள் கண்களில் படவில்லை" என்று வருத்தத்துடன் ஒப்புக்கொண்டார். தவெகவின் இளைஞர் ஈர்ப்பு பிரச்சாரம், குறிப்பாக இன்ஸ்டாகிராம் ரீல்ஸ், ஷார்ட் வீடியோக்கள் மூலம் புதிய தலைமுறையினரை சென்றடைந்தது.

பாரம்பரிய ஊடகங்களை நம்பிய திமுக, இந்த டிஜிட்டல் அலையை சரியாக எதிர்கொள்ளத் தவறியது.
தேர்தலுக்குப் பின்னரும் சமூக ஊடகங்களில் தவெகவின் ஆதிக்கம் தொடர்கிறது. சமீபத்தில் சென்னை திரு.வி.க. நகரில் நடைபெற்ற பள்ளித் திறப்பு விழாவில், சென்னை மேயர் பிரியா ராஜனுக்கும் தவெக எம்.எல்.ஏ. பல்லவிக்கும் இடையே ஏற்பட்ட குத்துவிளக்கு சர்ச்சை பெரும் பரபரப்பை ஏற்படுத்தியது.

வைரலான வீடியோவில், மேயர் பிரியா பல்லவியை வேண்டுமென்றே புறக்கணித்து அதிகாரியிடம் மெழுகுவர்த்தியை கொடுத்ததாகக் காட்டப்பட்டது. திமுக தரப்பு இதை 'புரோட்டோகால்' என்று விளக்கினாலும், "பெண் எம்.எல்.ஏ-வுக்கு இழைக்கப்பட்ட அநீதி" என்ற தவெகவின் பிம்ப அரசியல் சமூக ஊடகங்களில் பெரும் எதிரொலியைப் பெற்றது. திமுகவின் ஐடி விங் தற்காப்பு நிலையில் இருக்க, தவெக தரப்பு தொடர்ந்து தாக்குதலை மேற்கொண்டது.

தற்போதைய மின்வெட்டுப் பிரச்சினைகளுக்கும் திமுகவை இணைக்கும் பிம்பத்தை தவெக மிகவும் லாவகமாக உருவாக்கியுள்ளது. தவெக எம்.எல்.ஏ. பல்லவி, "திமுகவினர் அதிகாரிகளுக்கு லஞ்சம் கொடுத்து வேண்டுமென்றே மின்வெட்டை ஏற்படுத்துகின்றனர்" என்று குற்றம் சாட்டினார். திமுக அவதூறு நோட்டீஸ் அனுப்பிய போதிலும், பொதுமக்களிடையே "திமுக ஆட்சியில் இருந்த மின்வெட்டு மீண்டும் வந்துவிட்டது" என்ற பழைய நினைவுகள் தூண்டப்பட்டன. இதேபோல், சட்டம் ஒழுங்கு சீர்குலைவு, குற்றச் சம்பவங்கள் ஆகியவற்றுக்கு "முந்தைய திமுக அரசின் நிர்வாகச் சீர்கேடுகளே காரணம்" என்று தவெக அமைச்சர்கள் வாதிடுகின்றனர். எதிர்க்கட்சியாக இருந்தும் திமுக, தவெகவின் குற்றச்சாட்டுகளுக்கு பதிலளிப்பதிலேயே நேரத்தை வீணாக்குகிறது.

இந்தத் தோல்வி வெறும் ஆட்சி எதிர்ப்பு அலை மட்டுமல்ல. நவீன டிஜிட்டல் அரசியலை திமுக சரியாக கையாளத் தவறியதே முக்கிய காரணம். தேர்தல் முடிந்த ஒரு மாத காலத்திலும் தவெக கட்டமைக்கும் நேரடித் தாக்குதல்களுக்கு திமுகவிடம் தகுந்த எதிர்வியூகம் இல்லை. "ரீல்ஸ் மூலம் ஆட்சிக்கு வந்தவர்கள்" என்று திமுக கிண்டல் செய்தாலும், அதே ரீல்ஸ் மற்றும் சமூக ஊடகங்கள் மூலம் தவெக இப்போதும் திமுகவின் பிம்பத்தை சிதைத்து வருகிறது.

திராவிட அரசியலின் பாரம்பரிய கோட்டைகளை உடைத்த தவெகவின் வெற்றி, எதிர்கால அரசியலில் டிஜிட்டல் தளங்களின் முக்கியத்துவத்தை உலகுக்கு நினைவூட்டுகிறது. திமுக தன்னை டிஜிட்டல் யுகத்துக்கு ஏற்றவாறு மாற்றிக்கொள்ளாவிட்டால், அக்கட்சியின் அரசியல் இருப்பு இன்னும் சவாலானதாக மாறும் என்பதில் சந்தேகமில்லை. தமிழக அரசியல் இனி ரீல்ஸ், வைரல் வீடியோக்கள் மற்றும் நேரடி டிஜிட்டல் நேர்க்காட்சியின் காலமாக மாறியுள்ளது.

English summary

2026 Tamil Nadu Assembly Elections: How Social Media War Crushed DMK and Propelled Vijay’s TVK to Power