ஜன 5ல் கூடுகிறது தே.மு.தி.க. பொதுக்குழு: கூட்டணி அறிவிப்பு வெளியாகும்?

By Mayura Akilan

Updated: Saturday, December 28, 2013, 13:25 [IST]

Subscribe to Oneindia Tamil

சென்னை: விஜயகாந்த் தலைமையிலான தேசிய முற்போக்கு திராவிடர் கழகத்தின் பொதுக்குழு கூட்டம் ஜனவரி 5ம் தேதி பொன்னேரியில் உள்ள எல்.கே.எஸ். திருமண மண்டபத்தில் கூடுகிறது. இந்த கூட்டத்தில் வருகிற நாடாளுமன்றத் தேர்தலில் யாருடன் கூட்டணி வைப்பது என்பது குறித்து பொதுக்குழு உறுப்பினர்களின் கருத்துக்களை கட்சித் தலைவர் விஜயகாந்த் கேட்கிறார்.

நாடாளுமன்றத் தேர்தலில் கூட்டணி அமைத்து தான் போட்டியிடுவேன் என்றும் எந்த கட்சியுடன் கூட்டணி அமைப்பது என்பது தொடர்பாக கட்சி நிர்வாகிகளிடமும், முக்கிய பிரமுகர்களிடமும் கருத்து கேட்டுத்தான் இறுதி முடிவு அறிவிப்பேன் என்றும் சில நாட்களுக்கு முன்பு விஜயகாந்த் கூறி இருந்தார்.

இந்த சூழலில் கட்சி நிர்வாகிகளின் கருத்தை அறிவதற்காக செயற்குழு மற்றும் பொதுக்குழுவை விஜயகாந்த் கூட்டி பேச உள்ளார்.

இந்த தேர்தலில் தே.மு.தி.க.வுடன் கூட்டணி அமைக்க தி.மு.க.வும், பாரதீய ஜனதா கட்சியும் முயற்சி எடுத்து வருகிறது. காங்கிரசும் தூது விடுகிறது. ஆனால் எந்த கட்சியிடமும் பிடி கொடுக்காமல் விஜயகாந்த் உள்ளார்.

ஏற்கனவே கடந்த சட்டசபை தேர்தலில் அ.தி.மு.க.வுடன் கூட்டணி அமைத்து வெற்றி பெற்ற பிறகு சில மாதங்களிலேயே கூட்டணியில் தே.மு.தி.க. நீடிக்க முடியாமல் போனதுடன் கட்சியிலும் சிலரை இழக்க நேரிட்டது.

எனவே மீண்டும் வேறொரு கட்சியுடன் கூட்டணி வைக்கும் போது, இதேபோல் ஒரு சூழ்நிலை வந்துவிடக் கூடாது என்பதில் விஜயகாந்த் உறுதியாக உள்ளார். அதனால் தான் எனது தலைமையை ஏற்கும் கட்சியுடன் கூட்டணி வைப்பேன் என்று ஏற்கனவே விஜயகாந்த் அறிவித்தார்.

இப்படிப்பட்ட சூழ்நிலையில் ஜனவரி 5-ந் தேதி நடைபெறும் பொதுக்குழுவில் விஜயகாந்த் தனது நிலைப்பாட்டை தெளிவாக விளக்கி அவர் எடுக்கும் முடிவை அறிய பல்வேறு அரசியல் கட்சியினரும் ஆவலுடன் உள்ளனர்.

திமுக, அதிமுக ஆகிய கட்சிகள் பொதுக்குழு கூடி நாடாளுமன்றத் தேர்தலில் தங்களின் நிலைப்பாட்டினை அறிவித்து விட்டனர். காங்கிரஸ், பாஜக அல்லாத கூட்டணி அமைப்போம் என்று திமுக கூறி வருகிறது. அதேபோல அதிமுகவும் தனித்துப் போட்டி என்று கூறிவிட்டது.

தேசியக் கட்சியான பாஜகவோ அதிமுக, திமுக அல்லாத கட்சிகளை இணைத்து கூட்டணி அமைக்க முடிவு செய்து காய் நகர்த்தி வருகிறது. தேமுதிக விற்கு டிமாண்ட் அதிகரித்து வருவதால் அவரது முடிவினை திமுகவும், பாஜகவும் ஆவலுடன் எதிர்நோக்கியுள்ளனர்.